ނިއުކުލިއަރ ހަކަތައާއި ގުޅުންހުރި ސައިޓިފިކް މުޅިން އާ ހޯދުމެއް އިއުލާންކުރަން ޔޫއެސް ޑިޕާޓްމަންޓް އޮފް އެނަރޖީން ތައްޔާރު ވެއްޖެއެވެ. އާދީއްތަ ދުވަހު އެމެރިކާގެ އެނާރޖީ ޑިޕާޓްމަންޓުން މިކަން ހާމަ ކޮށްފައިވަނީ، އެގައުމުގެ ފެޑެރަލް ލެބޯޓުރީގައި ނިއުކުލިއަރ ފިޝަން ރިސާޗާއި ގުޅުންހުރި މުހިންމު އާ ހޯދުމެއް ހޯދާފައިވާކަމަށް ބައިނަލްއަގުވާމީ ނޫސްތަކުން ރިޕޯޓު ކޮށްފައި ވަނިކޮށެވެ.
މި ހަފްތާގެ އާދީއްތަ ދުވަހު ފައިނޭންޝަލް ޓައިމްސްއިން ރިޕޯޓު ކޮށްފައިވާ ގޮތުގައި، އެމެރިކާގެ ކެލިފޯނިއާގައި ހުންނަ ލޯރެންސް ލިވަރމޯ ނޭޝަނަލް ލެބޯޓްރީ (LLNL)ގައި، ފިއުސަން ރިއެކްޓަރުގައި ކުރި އެކްސްޕެރިމެންޓްތަކުން، ނުސާފުކަމެއް ނެތް އަދި ނިއުކުލިއަރ ކުނިބުނިވެސް އުފެއްދުމަކާއި ނުލާ، ނިއުކުލިއަރ ހަކަތަ ވަނީ އުފައްދާފައެވެ.
ކާމިޔާބުކަމާއެކު ފިއުޝަން ރިއެކްޝަންއިން ސައިންސްވެރިން މުޅިން އާ ނިއުކުލިއަ ހަކަތަ އުފައްދާފައިވާއިރު، މިއީ ފިއުޝަން ރިއެކްޝަންގެ ވަސީލަތުން ސައިންސްވެރިންނަށް ނިއުކުލިއަ ހަކަތައް އުފެއްދުނު ފުތަތަމަ ފަހަރެވެ. މިއީ އިރުގައި އުފައްދާ ބާވަތުގެ ހަކަތައެވެ. އަދި މިއީ ކާބަންގެ މާއްދާއަކާއި ނުލާ ހަކަތައް އުފެއްދުމުގައި ލިބިގެންދިޔަ ބޮޑު ކުރިއެރުމެއްކަންވެސް ސައިންސްވެރިން ވަނީ ފާހަގަ ކޮށްފައެވެ.
އެމެރިކާގެ އެނާޖީ ޑިޕާޓްމަންޓް LLNLގެ ތަރުޖަމާން އޭއެފްޕީއަށް މައުލޫމާތު ދެމުން ވިދާޅުވެފައިވަނީ ފައިނޭންޝަލް ޓައިމްސްގެ ރިޕޯޓާއި ގުޅޭގޮތުން އޭނާއަށް ކޮމެންޓެއް ނުކުރެވޭނެ ކަމަށާއި، އެހެންނަމަވެސަ އެމެރިކާގެ އެނާރޖީ ސެކެޓްރީ ޖެނިފަރ ގްރެންހޯމް މިހަފްތާގެ އަންގާރަދުވަހު، ހޯދާފައިވާ ސައިންޓިފިކް މުޅިން އާ އީޖާދަކާއި ގުޅުންހުރި މައުލޫމާތު އާންމު ކުރުމަށް ހަމަޖެހިފައިވާ ކަމުގައެވެ.
އޭނާ ވިދާޅުވި ގޮތުގައި، ސައިންސްވެރިން ހޯދާފައިވާ މި އާ ހޯދުމާއި ގުޅުންހުރި ދިރާސާތައް އަދިވެސް ދަނީ ކުރިއަށް ކަމުގައެވެ.
ދުނިޔޭގެ ބައެއް ސައިންސްވެރިން ފާހަގަކުރާ ގޮތުގައި، ދުނިޔޭގެ މުސްތަގްބަލުގެ ހަކަތައިގެ އެންމެ މުހިންމު ވަސީލަތަކަށް ވެގެންދާނީ ނިއުކުލިއަރ ފިއުޝަންގެ ވަސީލަތުން އުފައްދާ ހަކަތައެވެ. މިއީ ބޭކާރު ކުނި ބުނި އުފެއްދުމެއް ނެތް، އަދި މިހަކަތައިގެ ވަސީލަތުން ޖައްވަށް ގެއްލުންދޭ އެއްވެސް ބާވަތެއްގެ ގްރީންހައުސް ގޭހެއްވެސް އުފައްދާ ނުދޭ ހަކަތައިގެ ވަސީލަތެކެވެ.
ފިއުޝަން އަނީ، ދުނިޔޭގެ އެކި ކަންކޮޅުތަކުގައިވާ ނިއުކުލިއަރ ރިއެކްޓަރުތަކުގައި ހަކަތައް އުފައްދާ ފިޝަން ޕްރޮސެސްއާއި ތަފާތު ވަސީލަތެކެވެ. މިގޮތުން ފިއުޝަން ޕްރޮސެސްއަކީ ދެ އެޓޮމެއްގެ ނިއުކުލިއައި ވަކި ކުރުމުގެ ބަދަލުގައި، ދެ އެޓޮމިކް ނިކުލިއައި އެއްކޮށްގެން ހަކަތަ އުފައްދާ ވަސީލަތަކަށް ކިޔާ ނަމެކެވެ. މި ގޮތުން އުފައްދާ ނިއުކުލިއަ ހަކަތައިން، ނިއުލުކިއަ ވޭސްޓް މެޓީރިއަލް އެއްވެސް މިންވަރަކަށް އުފައްދައެއް ނުދެއެވެ.
އެހްނަމަވެސް މިހާރު ދުނިޔޭގެ އެކި ކަންކޮޅުތަކުގައި ހުންނަ ނިއުކުލިއަރ ރިއެކްޓަރުތަކުން އުފަދާ ހަކަތައިން ނިއުކުލިއަރ ވޭސްޓް މެރީއަލްތައް އުފަދައެވެ. މިއީ ދިގު ޒަމާންތަކަކަށް ބަލަހައްޓަންޖެހޭ، ސިއްޙީގޮތުން ރިސްކު ބޮޑު ޕްރޮސެސްއެވެ.
