ރައްޔިތުންގެ މަޖިލީހުގެ 13 ބުރީގެ އައު އިމާރާތުގައި 21 މީހުންގެ ލިފްޓެއް ބެހެއްޓުމަށްޓަކައި ބޭނުންވާ ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓް (އީ.އައި.އޭ) ތައްޔާރު ކޮށްދޭނެ ފަރާތެއް ހޯދަން އިއުލާންކޮށްފިއެވެ.
މަޖިލީހުގެ އައު ޢިމާރަތަކީ 13 ބުރީގެ ޢިމާރާތެކެވެ. 2019 ގައި ހުޅުވި އެ ޢިމާރާތުގައި މިހާރުވެސް 2 ލިފްޓު ހުރެއެވެ. އެއީ މަޖިލީހުގެ އިދާރީ ބޭނުމަށް ބޭނުންކުރާ ލިފްޓަކާއި، މެންބަރުން ބޭނުންކުރާ ލިފްޓެކެވެ.
މަޖިލީހުގެ އައު ޢިމާރާތުގައި 21 މީހުންގެ ލިފްތެއް ހަރުކުރުމަށް ނިންމާފައިވާއިރު، އެއީ ބޮޑު ލިފްޓެކެވެ. މަޖިލީހުން ކޮށްފައިވާ އިއުލާންގައިވަނީ ރައްޔިތުންގެ މަޖިލީހުގެ 13 ބުރީގެ އައު އިމާރާތުގެ ހުޅަނގު އުތުރު ކަނަށްވާގޮތަށް އިމާރާތް ކުރެވޭ އެނެކްސްގެ ތެރެއިން އިމާރާތުގެ ޓެރަސް ހިމެނޭގޮތަށް ކޮންމެ ބުރިއަކަށް ދެވޭގޮތަށް 21 މީހުންގެ ލިފްޓެއް ބެހެއްޓުމަށްޓަކައި ބޭނުންވާ ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓް (އީ.އައި.އޭ) ތައްޔާރު ކޮށްދޭނެ ފަރާތެއް ހޯދުމަށް ބޭނުންވާކަމަށެވެ.
އެ އިދާރާއިން ބުނީ މިކަމަށް ބީލަން ހުށަހެޅުމަށް ރަޖިސްޓްރީވާންޖެހޭނީ މިމަހުގެ 12 ވަނަ ދުވަހުގެ 12 ޖެހުމުގެ ކުރިންކަމަށެވެ. އަދި 13 ޑިސެންބަރުވާ އަންގާރަ ދުވަހުގެ 23:59 ގެ ކުރިން، ބިޑު ހުށަހެޅުމަށް ރަޖިސްޓްރީކޮށްފައިވާ ހުރިހާ ފަރާތްތަކަށް ފޮނުވޭނެކމަށްވެސް ބުނެފައިވެއެވެ.
މަޖިލީހުގެ އިއުލާންގައި19 ޑިސެންބަރު 2022 ވާ ހޯމަ ދުވަހުގެ 10:30 ގައި ރައްޔިތުންގެ މަޖިލީހުގެ އިދާރާގައި، ބިޑު ހުށަހެޅުމުގެ ފުރުޞަތު ދެވޭނީ މަތީގައި ބަޔާން ކޮށްފައިވާ ލިންކް މެދުވެރިކޮށް ބިޑު ހުށަހެޅުމަށް ރަޖިސްޓްރީކޮށްފައިވާ ފަރާތްތަކަށް އެކަނިކަމަށް ބުނެފައިވެއެވެ. އަދި ބީލަން ހުޅުވުމަށް ހަމަޖައްސާފައިވާ ތާރީޚަކީ އެއްވެސް ސަބަބަކާ ހުރެ ސަރުކާރުން ބަންދު ދުވަހެއްގެ ގޮތުގައި ހަމަޖައްސައިފިނަމަ ބީލަން ހުޅުވުން އޮންނާނީ ޖެހިގެން އަންނަ ރަސްމީ ދުވަހުކަމަށްވެސް ބުނެފައިވެއެވެ.
މަޖިލީހުގައި 21 މީހުންގެ ޖާގައިގެ ލިފްތެއް ބަހައްޓާން ނިންމާފައިވާއިރު، ޢާންމުކޮށް ރާއްޖޭގައި ޢިމާރާތްތަކުގައި ބޭނުންކުރަނީ 15 މީހުންގެ ލިފްޓެވެ.
