އަންނަ އަހަރަށް ލަފާކޮށް ސަރުކާރުން މަޖިލީހަށް ހުށައަޅަފައިވާ ބަޖެޓަކީ، ސަރުކާރާ ވާދަވެރި ފަރާތްތައް މާޔޫސްކުރުވި ބަޖެޓެއްކަމަށް ވިލިނގިލި ދާއިރާގެ މެންބަރު ސައުދު ޙުސައިން ވިދާޅުވެއްޖެއެވެ. ސައުދު މިހެން ވިދާޅުވީ ބަޖެޓު ދިރާސާކޮށް ނިންމިގޮތުގެ ރިޕޯޓަށް ވާހަކަފުޅު ދައްކަވަމުންނެވެ.
ބަޖެޓަށް ތާޢިދުކޮށް ވާހަކަފުޅު ދައްކަވަމުން ސައުދު ވިދާޅުވީ، ބަޖެޓަކީ އުއްމީދީ ބަޖެޓެއްކަމަށް ވާދަވެރި ފަރާތްތަކަށް ބުނަން ނުކެރުނުނަމަވެސް މިއީ އެ ވާދަވެރި ފަރާތްތަކުގެ ދާއިރާތަކަށްވެސް ބޮޑު ބަދަލެއް ގެނުވާނެ ބަޖެޓެއްކަމަށެވެ.
ކޯވިޑް19އާއި، ރަޝިޔާ ޔޫކްރެއިން ހަނގުރާމައިގެ ސަބަބުން ދުނިޔޭޣެ ބޯޑެތި އިޤްތިޞާދުތައް އިނދަޖެހިގެން ދިޔަނަމަވެސް، ރާއްޖޭގެ އިޤްތިޞާދު މެނޭޖުކުރީ ރަނގަލަށް ފާހަގަކުރައްވާ ސައުދު ވިދާޅުވީ އެ ހުރިހާ ކަމަކުން އަރައިގަނެ އަސާސީ އެއްވެސް ކަމެއް ނުހުއްޓި ޤައުމު އިޤްތިޞާދު ހިފެހެއްޓުނީތީ ވާދަވެރިން މާޔޫސްކުރުވިކަމަށެވެ.
ސައުދު ވިދާޅުވީ މާލެއާއި އަތޮޅުތައް އެއްހަމައަކުން ތަފާތުނުކޮށް ތަރައްޤީކުރެއްވި ހަމައެކަނި ލީޑަރަކީ ރައީސް އިބްރާހީމް މުޙައްމަދު ޞާލިޙްކަމަށެވެ.
ދިވެހި ދައުލަތް މިއަދު މިވަނީ ދިވެހިރައްޔިތުންނާ އެކީގައި ސަލާމަތުގެ އައްސޭރިއަކާ ހަމައަށް އާދެވިފައި. މިއީ މިއަދު ރައީސް އިބްރާހިމް މުހައްމަދު ޞާލިޙްގެ ހަރުދަނާ ސިޔާސަތާއި، އެމަނިކުފާނުގެ ލީޑަރޝިޕްގައި ސަރުކާރު ހިންގަން ތިބި ފަރާތްތައް ކުރެއްވި ބުރަ މަސައްކަތް.
– ސައުދު ޙުސައިން ވިދާޅުވިއެވެ.
ސައުދު ވަނީ ރައީސް ޞަލީޙްގެ ތަރައްޤީގެ އެޖެންޑާއަށްވެސް ތަޢުރީފް ކުރައްވާފައެވެ. ސައުދު ވަނީ ދާދި ފަހުން ވެރިކަންކުރާ މައި ޕާޓީ އެމްޑީޕީއާއި ގުޅިވަޑައިގެންފައެވެ. މަޖިލީހަށް ސައުދު އިންތިޚާބުވެވަޑައިގަތީ މިނިވަން މެންބަރެއްގެގޮތުގައެވެ. އެމްޑީޕީއާއި ގުޅިވަޑައިގަތުމަށްފަހު، އެމްޑީޕީގެ ތެރޭގައި ބައިބައިވުން އޮތްނަމަވެސް، ސައުދު ގެންދަވަނީ ރައީސް ޞާލިޙްގެ ސިޔާސަތުތަކަށް ތާޢީދުކުރައްވަމުންނެވެ.
