އިލެކްޝަންސް ކޮމިޝަންގެ ކުރީގެ ރައީސް އަދި މިހާރު ސްޓެލްކޯގެ މެނޭޖިން ޑިރެކްޓަރުގެ މަޤާމުގައި ހުންނެވި އަހުމަދު ޝަރީފު ވެރިކަންކުރާ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް ސޮއިކުރައްވައިފިއެވެ.
ކުރިން ތަޢުލީމީ ދާއިރާގައި މަސައްކަތްކުރައްވާފައިވާ ޝަރީފް، ސިޔާސީ ދާއިރާއިން ފެންނަންފެށީ، ކުރީގެ ރައީސް ޔާމީން އުފެއްދެވި ޕީޕަލްސް އެލަޔަންސް (ޕީއޭ)އިންނެވެ. އޭގެފަހުން ރައީސް ޔާމީން ޕީއޭ އުވާލެއްވުމަށްފަހު ޕީޕީއެމްއާ ގުޅިވަޑައިގަތުމުން ޔާމީނާއެކު ޝަރީފް ވަނީ ޕީޕީއެމްއާ ގުޅިވަޑައިގެންފައެވެ. ޕީޕީއެމްގެ އިންތިޚާބީ ފުރަތަމަ މަޖިލިސް މެމްބަރަށް ވެވަޑައިގެން "ރަންގޮނޑި ޝަރީފް"ގެ ނަމުން ޝަރީފް އަމިއްލައަށް އޭނާއަށް ކިޔަން ފެށިއެވެ. އެއީ އޭރުގެ ވާދަވެރި ސިޔާސީ މަސްރަޙުގައި ހުސްވި މަޖިލިސް ގޮނޑިއެއްގެ ބައިއިލެކްޝަންގައި ވާހަކުރައްވައި ކާމިޔާބު ވުމުންނެވެ.
ޕީޕީއެމްއަށް 2013ވަނަ އަހަރުގެ ރިޔާސީ އިންތިޚާބު ކާމިޔާބުކޮށްދިނުމަށްވެސް ޝަރީފް ކެމްޕެއިން ކުރެއްވިއެވެ. އޭގެފަހުން ޕީޕީއެމްގެ ވެރިކަމުގައި އިލެކްޝަންސް ކޮމިޝަނުގެ ރައީސްކަށް އޭރުގެ ޕީޕީއެމްގެ އަޣުލަބިއްޔަތު އޮތް ރައްޔިތުންގެ މަޖިލީހުން ޝަރީފް ޢައްޔަންކުރިއެވެ.
އެހެންނަމަވެސް ދެންއައި ރިޔާސީ އިންތިޚާބުގައި ޝަރީފް، އިލެކްޝަންސް ކޮމިޝަނުގެ ރައީސްކަމުގައި ހުންނަވައިގެން، މަކަރު ހައްދަވައި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީނަށް އިންތިޚާބު ކާމިޔާބު ނުވާގޮތަށް ކަންކަން ރޭވިކަމުގެ ތުހުމަތު ޕީޕީއެމްއިން ކުރެއެވެ. އަދި މިހާރުގެ ރައީސް އިބްރާހީމް މުޙައްމަދު ޞާލިޙާއި އެމްޑީޕީގެ އަތުން ޝަރީފް ރިޝްވަރު ނެންގެވިކަމަށްވެސް ޕީޕީއެމްއިން ތުހުމަތުކުރެއެވެ.
2018ވަނަ އަހަރުގެ ރިޔާސީ އިންތިޚާބަފަހު ޝަރީފްވަނީ، 2023ވަނަ އަހަރުގެ ރިޔާސީ އިންތިޚާބު ރައީސް ޞާލިޙަށް ކާމިޔާބުކޮށްދެއްވާނެ ކަމަށް ވިދާޅުވެ އިލެކްޝަންސް ކޮމިޝަނުން ވަކިވެ، ސަރުކާރުގެ މިސަރުކާރުގެ ސިޔާސީ މަޤާމަކާ ޙަވާލުވެފައެވެ. އެއީ ސްޓެލްކޯގެ މެނޭޖިން ޑިރެކްޓަރުކަމެވެ.
ޝަރީފު އެމްޑީޕީއަށް ސޮއިކުރެއްވީ މިދިޔަ ބުރާސްފަތި ދުވަހުކަމަށް މަޢުލޫމާތު ލިބެއެވެ. މިކަމާ ގުޅޭގޮތުން އެމްޑީޕީންވެސް އަދި ޝަރީފްވެސް ރަސްމީކޮށް އަދި އެއްވެސް އެއްޗެއް ނުބުނެއެވެ.
