ތަރައްޤީގެ އެންމެ މަޝްރޫޢުއެއްވެސް ލޮލަށް ނުފެންނަކަަމށް ވިދާޅުވެ މާލެ ސިޓީގެ ހުޅުމާލެ ދާއިރާގެ ކައުންސިލް މެންބަރު އަދި ޕީއެންސީގެ ނާއިބު ރައީސް އިބްރާހީމް ޝުޖާޢު ސަރުކާރުގެ ތަރުޖަމާން މިޢުވާން މުހައްމަދަށް ރައްދު ދެއްވައިފިއެވެ.
ޝުޖާޢު މިހެން ވިދާޅުވީ މިސަރުކާރުން ކުރިއަށްގެންދާ ތަރައްޤީގެ ކޮންމެ މަޝްރޫޢަކީ ހަމައެކަނި ޢުމްރާނީ ތަރައްޤީގެ މަޝްރޫޢެއް ނޫންކަމަށާ، ތަރައްޤީގެ ކޮންމެ މަޝްރޫޢަކީ ލޮލަށް ފެންނާނެ ކަމެއްވެސް ނޫންކަމަށް ރައީސް އޮފީހުގެ ތަރުޖަމާނު މިޢުވާން މުޙައްމަދު ވިދާލުވުމުންނެވެ.
މިއުވާން ވިދާޅުވީ ތަރައްޤީގެ ކޮންމެ ކަމަކީ ޢުމްރާނީ ވަސީލަތެއްގެގޮތުގައި ލޮލަށް ފެންނަން ހުންނާނެކަންކަން ނޫންކަމަށާ، ލޮލަށް ނުފެންނަ އެތައް ކަމެއްވެސް ތަރައްޤީގެތެރޭގައި ހިމެނޭކަމަށެވެ. އެގޮތުން މުވައްޒަފުންގެ މުސާރައަށް ގެންނަ ހެޔޮބަދަލުތަކާއި މަތީ ތަޢުލީމަށް ކުރާ ހޭދައާއި ފަހިކޮށްދޭ ފުރުސަތުތަކަކީ ޢިމާރާތެއްގެގޮތުގައި ފެންނަން ހުންނާނެ އެއްޗެއް ނޫންކަމަށް އޭނާ ވިދާޅުވިއެވެ. އެހެންނަމަވެސް މިއީ ސީދާ ރައްޔިތުންނަށް އެކަމުގެ މަންފާކުރާނެ މުހިންމު ބޮޑެތި މަޝްރޫޢުތަކުގެގޮތުގައި މިސަރުކާރުން ކުރިއަށްގެންދާ ކަންކަން ކަމުގައި މިއުވާން ވިދާޅުވިއެވެ. މިޢުވާން މިމޭރުމުން ވާހަކަދެއްކެވީ މިސަރުކާރުގެ ތަރައްޤީގެ މަޝްރޫޢުތައް ނުފެންނަކަމަށް ބުނާ އިދިކޮޅު ފަރާތްތަކަށް ރައްދު ދެއްވަމުންނެވެ.
މިޢުވާންގެ އެ ވާހަކަތަކަށް ރައްދު ދެއްވައި ޝުޖާޢު ވިދާޅުވީ، މިޢުވާން ވިދާޅުވީ ހެޔޮކޮށްކަމަށާއި، އެއްވެސް މަޝްރޫޢުއެއް ލޮލަށް ނުފެންނަކަމަށެވެ.
ތެދެއް ތިބުނީ @Miuvaan.ހަމަ އެންމެ މަޝްރޫޢެއް ވެސް ލޮލަކަށް ނުފެނޭ.ހަމަ އެންމެ މަޝްރޫޢުއެއްވެސް ނުފެންނަނީ އޭ! pic.twitter.com/DBItNxSXeg
— Ibrahim Shujau (@IbrahimShujaau) November 6, 2022
ޝުޖާޢުގެ ވާހަކަތަކަށް މިޢުވާން ވަނީ ރައްދު ދެއްވާފައެވެ. އޭނާ ވިދާޅުވީ ބާރަށު ރައްޔިތުންވެސް އެހެން ޤައުމެއްގެ ބައެއްގެ ގޮތުގައި ފެނުނު ބޭފުޅަކު އެހެން ވިދާޅުވުމަކުން ހައިރާން ނުވާކަމަށެވެ.
ބާރަށު ރައްޔިތުންވެސް އެހެން ޤައުމެއްގެ ބައެއްގެ ގޮތުގައި ފެނުނު އިރު، ތިޔަހެން ބުނެގެން އަދި ހައިރާނެއް ނުވޭ! 🤷♂️
— Miuvan (@Miuvaan) November 6, 2022
ބުރާސްފަތި ދުވަހުގެރޭ ޓީވީ ޕްރޮގްރާމެއްގައި ވާހަކަދައްކަވަމުން މިއުވާން ވިދާޅުވީ، މިސަރުކާރުގެ ތަރައްޤީގެ މަޝްރުޢުތަކަކީ ހަމައެކަނި ޢުމްރާނީ ތަރައްޤީގެ މަޝްރޫޢުތައް ނޫންކަމަށެވެ. މިސަރުކާރުން ބޮޑެތި މަޝްރޫޢުތަކުގެ ގޮތުގައި، އިޖުތިމާޢީ ކަންކަމުގެ ތެރެއިން ރައްޔިތުންނާ ގުޅުންހުރި ހުރިހާ ޕްރޮގްރާމްތަކެއްވެސް ހިމެނޭކަމަށް މިޢުވާން ވިދާޅުވިއެވެ. އެހެންކަމުން މިސަރުކާރުން ކުރިއަށްގެންދާ ތަރައްގީއެއް ނުފެނެއޭ ބުނަނީ ރަށްރަށަށް ނުދާތީކަމަށާ، ރަށްރަށުގެ ރައްޔިތުންނަށް ވަރަށް ރަނގަޅަށް ހަޤީޤަތް ސާފުވާނެކަމަށް އޭނާ ވިދާޅުވިއެވެ. އަދި ސަރުކާރުން ކުރައްވާ މަސައްކަތްތްކާއި ރައީސް އިބްރާހީމް މުޙައްމަދު ޞާލިޙުގެ ޚިދުމަތް ރައްރަށުގެ ރައްޔިތުންނާއި ކައުންސިލްތަކުން ބަލައިގަންނަކަމަށް މިއުވާން ވިދާޅުވިއެވެ.
