މިއަދު ބޭއްވި ދެ ބައި އިލެކްޝަންވެސް އިދިކޮޅު ޕީޕީއެމްއިން ކާމިޔާބު ކޮށްފިއެވެ.
މިއަދު ބާއްވާފައިވަނީ ނ. މަގޫދޫ ކައުންސިލްގެ އަންހެން މެންބަރު އިންތިޚާބު ކުރުމަށް ބާއްވާ ބައި- އިލެކްޝަނާއި، ލ. ކަލައިދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަނެވެ. މިދެ އިންތިޚާބުވެސް އިދިކޮޅު ޕީޕީއެމްއިން ކާމިޔާބު ކޮށްފައިވަނީ ސަރުކާރު ހިންގާ މައި ޕާޓީ އެމްޑީޕީގެ ކެނޑިޑޭޓުންނާއި ވާދަކޮށެވެ.
މި އިންތިހާބުގައި މަގޫދު ޑަބްލިއުޑީސީގެ ގޮނޑިއަށް އެމްޑީޕީގެ ފަރާތުން ވާދަކުރި ކެންޑިޑޭޓް ފަރީދާ އަދްދާނަށް ލިބިފައި ވަނީ 115 ވޯޓެވެ. ޕީޕީއެމްގެ ކެންޑިޑޭޓް އާމިނަތު ޔުމްނާ އަބްދުލްގަނީ ލިބިފައިވަނީ 124 ވޯޓެވެ. އެހެންކަމުން ޔުމްނާ މި ގޮނޑި ކާމިޔާބު ކުރީ ނުވަ ވޯޓުގެ ތަފާތަކުންނެވެ.
ކަލައިދޫ ޑަބްލިއުޑީސީގެ ގޮނޑިއަށް އެމްޑީޕީގެ ފަރާތުން ވާދަކުރި ކެންޑިޑޭޓް ހުވައިލަތު ރަހީމާއަށް ލިބިފައި ވަނީ 192 ވޯޓެވެ. އަދި ޕީޕީއެމްގެ ފަރާތުން ވާދަކުރި ކެންޑިދޭޓް ސަފިއްޔާއަށް ލިބުނީ 197 ވޯޓެވެ. އެހެންކަމުން ސަފިއްޔާ މި ގޮނޑި ކާމިޔާބު ކުރީ ފަސް ވޯޓުގެ ތަފާތަކުންނެވެ.
މިދެއިންތިޚާބުވެސް ކާމިޔާބު ކުރުމާއި ގުޅިގެން އިދިކޮޅު ޕީޕީއެމްއިން ވަނީ ދެ ކެނޑިޑޭޓުންނަށްވެސް މަރުހަބާ ދަންނަވާފައެވެ. މިއަދަކީ ޕީޕީއެމްގެ އެތެރޭގެ އިންތިޚާބުވެސް އޮތް ދުވަހެވެ.
