ރާއްޖެއަށް ފަހުގެ ތާރީޚުގައި ދިން އުދުވާނީ ހަމަލާގެ ފަހަތުގައިވާ އެއް މޭސްތިރިކަމަށްވާ ސިއްކަ އަޙްމަދު އިސްމާއިލް މަނިކުގެ އަބުރަށް އަރައިގަތުން ބަލައި ނުގަނެވޭކަމަށް ވިދާޅުވެ ރައީސް މުޙައްމަދު ނަޝީދު، ދިފާޢުކުރައްވައިފިއެވެ.
1988 ވަނަ އަހަރުގެ ނޮވެމްބަރ 3ގައި ރާއްޖެއަށް ދިން އުދުވާނީ ހަމަލާއާއި ގުޅިގެން، އެ ހަމަލާގެ ފަހަތުގައި ތިބި ދިވެހިންނަށް ދިވެހިންގެ ފާޑުކިޔުން އަބަދުވެސް އަމާޒުވެއެވެ. ރާއްޖޭގައި ނޮވެމްބަރު 3 ނަސްރުގެ ދުވަހުގެ ގޮތުގައި ކޮންމެ އަހަރަކު ކުލަގަދަކޮށް ފާހަގަކޮށް ޖަލްސާވެސް ބާއްވައެވެ. ނަމަވެސް މިސަރުކާރުން ނަސްރުގެ ދުވަސް ފާހަގަ ނުކުރާތީ ގިނަ ބައެއްގެ ފާޑުކިޔުން އަމާޒުވެއެވެ.
ނަސްރުގެ ދުވަސް މިސަރުކާރުން ފާހަގަނުކުރަނީ އިދިކޮޅު ބައެއް ފަރާތްތަކުން ބުނާގޮތުގައި ފަސްޓްލޭޑީ ފަޒްނާ އަހްމަދުގެ ބައްޕާފުޅު ސިއްކަ އަހްމަދު އިސްމާއިލް (ބޮޑު ސިއްކަ) އާއި އަދިވެސް މިސަރުކާރުގެ ބައެއް ބޭފުޅުންގެ ބައިވެރިވުން އޮތުމުގެ ސަބަބުންނެވެ. އިއްޔެ ނަސްރުގެ ދުވަސް ފާހަގަކުރިއިރު ބައެއް ފަރާތްތަކުނ ސޯޝަލް މީޑިއާގައި ފާޅުކުރި ޚިޔާލުތަކުގައި ސިއްކަ އަހްމަދަށް ބޮޑެތި ފާޑުކިޔުންތަކެއް އަމާޒުކޮށްފައިވެއެވެ.
މިކަމާއި ގުޅިގެން އެމްޑީޕީގެ ރައީސް މުޙައްމަދު ނަޝީދު މިއަދު ކުރެއްވި ޓްވީޓްގައި ވަނީ ސިއްކަ އަހްމަދު ދިފާޢުކުރައްވާފައެވެ. ނަޝީދު ވިދާޅުވީ ނޮވެމްބަރު3 ގެ ހަމަލާގައި ސިއްކަ އަހްމަދު އިސްމާއިލް މަނިކުގެ އަބުރަށް އަރައިގަތުން އެއްގޮތަކަށްވެސް ބަލައިނުގަނެވޭކަމަށެވެ.
އޭނައަށް އިންތިހާއަށް އަނިޔާކޮށް މަރުގެ ތުންފަތް މައްޗަށް ގެނެސް އޭނާ އަތުން ނެގި އިއުތިރާގް ބަޔާނަކީ ބޮޑު އޮޅުވާލުމެއް.
– ރައީސް ނަޝީދު ވިދާޅުވިއެވެ.
3 November ge hamalaiga Sikka Ahamed Ismail Manik ge aburah araigathun eh gothakahves balaeh nuganevey. Eyna ah inthiha ah aniyaakoh maruge thunfaiy mahchah genes eynaa athun negi iuthiraaf bayaanakee bodu olhuvaalumeh.
— Mohamed Nasheed (@MohamedNasheed) November 4, 2022
ރައީސް ނަޝިދު މިހެން ވިދާޅުވިނަމަވެސް، ރާއްޖެއަށް އުދުވާނީ ހަމަލާ ދިނުމުގައި އަމަލީގޮތުން ސިއްކަ އަހްމަދު ބައިވެރިނުވިނަމަވެސް، އެ ހަމަލާ ލަންކާގައި ރޭވުމުގައި އޭނާގެ ބައިވެރިވުން ބޮޑުކަން އެނގެން އެބައޮތެވެ. 3 ނޮވެމްބަރުގެ ހަމަލާއާއި ގުޅިގެން ސިއްކަ އަހްމަދުގެ މައްޗަށް ވަނީ ޖުމްލަ ދެ ކުށެއް ސާބުތުވެ، 15 އަހަރަށް ޖަލަށްލުމާއެކު 40 އެތިފަހަރުން ހައްދު ޖެހުމަށް ޙުކުމްކޮށްފައެވެ.
