މިއަދު ފާހަގަކުރާ "އިންޓަނޭޝަނަލް ޑޭ ޓު އެންޑް އިމްޕިްއުނިޓީ ފޯ ކްރައިމްސް އަގެއިންސްޓް ނާޖަލިސްޓްސް" ނުވަތަ ނޫސްވެރިންނާ ދެކޮޅަށް ހިންގާ ކުށްތަކަށް އަދަބު ނުދެވޭ ނުދެވުން ހުއްޓުވުމަށް ގޮވާލައި ފާހަގަކުރާ ބައިނަލް އަޤުވާމީ ދުވަހާ ގުޅިގެން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން 6 ކަމަކަށް ސަރުކާރަށް ގޮވާލައިފިއެވެ.
އެޖަމްޢިއްޔާއިން ގޮވާލާފައިވާ ފުރަތަމަ ކަމަކީ ނޫސްވެރިންނާ ދެކޮޅަށް ހިންގާ ޖަރީމާތައް ފާޅުގައި ހާމަކަންބޮޑު ގޮތެއްގައި އެންމެ މަތީ ދަރަޖާގައި ކުށްވެރިކުރުމެވެ. އަދި ކުށްކުރާ ފަރާތްތައް ޖަވާބުދާރީކުރުވަން އެކަށީގެންވާ މަސައްކަތްތަކެއް ކުރުމެވެ. ދެވަނަ ކަމަކީ ނޫސްވެރިންނަށް އަމާޒުކޮށް ހިންގޭ ކުށްތަކާއި އެފަދަ ކަންކަން އިންސާފުވެރި އަވަސް ހަރުދަނާ ގޮތެއްގައި ތަހްޤީޤުކުރުމެވެ. ތިންވަނަ ކަމަކީ ކުށްވެރިންގެ މައްޗަށް ދަޢުވާކުރުމާއި އަދަބު ދިނުން ހަރުދަނާ ކުރުމެވެ. ހަތަރުވަނަ ކަމަކީ އަނިޔާގެ ޝިކާރައަކަށްވާ ނޫސްވެރިންނާއި އެމީހުންގެ ޢާއިލާތަކަށް އެހީތެރިވުމެވެ. ފަސްވަނަ ކަމަކީ އޮންލައިންކޮށް ކުރާ ފުރައްސާރައާއި ބިރުދެއްކުންތަކުން ރައްކާތެރިކަން ހޯދައިދިނުމެވެ. ހަވަނަ ކަމަކީ ނޫސްވެރިންގެ ރައްކާތެރިކަމަށް އަހަމިއްޔަތުކަންދީ އެކަން ކުރިއެރުވުމެވެ.
މީގެ އިތުރުން 2014ވަނަ އަހަރު ގެއްލުވާލާފައިވާ ނޫސްވެރިޔާ އަޙްމަދު ރިޟުވާން ޢަބްދުﷲގެ މަރުގެ މައްސަލަ ތަހްޤީޤުކުރުމާއި ތުހުމަތުވާ ބައެއް މީހުންގެ މައްޗަށް ޝަރީޢަތް ހިންގުމުގައި ކޮންމެވެސް ވަރެއްގެ ކުރިއެރުމެއް ހޯދާފައިވާކަން އެމްޖޭއޭއިން ފާހަގަކޮށްފައިވެއެވެ. އެހެންނަމަވެސް އަނިޔާވެރިގޮތެއްގައި މަޔާލާފައިވާ ބްލޮގަރ ޔާމީން ރަޝީދުގެ މަރުގެ މައްސަލައިގެ ތަހްޤީޤާއި އެކަމަށް އިންސާފު ހޯދުމުގެ މަސައްކަތާމެދު އެމްޖޭއޭއިން ވަނީ ކަންބޮޑުވުން ފާޅުކޮށްފައެވެ.
