2022 ވަނަ އަހަރުގެ ބަޖެޓުގެ ޑެފިސިޓް ހުންނާނެކަމަށް ބެލެވެނީ 13.6 ބިލިއަން ރުފިޔާގައި ކަމަށާއި މިއީ. ޖީ.ޑީ.ޕީގެ ނިސްބަތުން 14.3 އިންސައްތަ ކަމުގައި ފިނޭންސް މިނިސްޓަރު އިބުރާހިމް އަމީރު ވިދާޅުވެއްޖެއެވެ.
މިއަދު ރައްޔިތުންގެ މަޖިލީހަށް، 2023 އަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން ފިނޭންސް މިނިސްޓަރު އިބުރާހިމް އަމީރު ވިދާޅުވި ގޮތުގައި، އިޤްތިސާދަށް ދިމާވާ ގޮންޖެހުންތައް މެނޭޖްކޮށް ވިލުންވެރިކަން އިތުރުކުރުމަކީ މެދުރާސްތާގައި ބަޖެޓާއި ދަރަނީގެ ދެމެހެއްޓެނިވިކަމަށް މުހިއްމުކަމެއް ކަމުގައެވެ.
މިގޮތުން އޭނާ ވިދާޅުވި ގޮތުގައި މިިކަމަށްޓަކައި ފިސްކަލް ސްޓްރެޓެޖީގައި މުހިއްމު 4 ޓާގެޓެއް، 2023ގެ ބަޖެޓުގައި ސަރުކާރުން ވަނީ ހިމަނާފައެވެ.
އޭގެ ތެރޭގައި ހިމެނޭ އެންމެ ފުރަތަމަ ކަމެއްގެ ގޮތުގައި އޭނާ ފާހަގަ ކުރައްވާފައިވަނީ، 2025ގެ ނިޔަލަށް ދައުލަތުގެ ސީދާ ދަރަނި ޖީ.ޑީ.ޕީގެ ނިސްބަތުން 100 އިންސައްތައަށްވުރެ ތިރިކުރުމެވެ.
އަދި 2023 ގެ ނިޔަލަށް ބަޖެޓުގެ ޕްރައިމަރީ ޑެފިސިޓް ޖީ.ޑީ.ޕީގެ ނިސްބަތުން 5 އިންސައްތައަށްވުރެ ތިރިކުރުމަށް ބަޖެޓްގައި ހުށަހަޅުއްވާފައިވާއިރު، އުފެއްދުންތެރިކަމުގެ ނިސްބަތުން ދައުލަތުގެ ދަރަނި ދަށަށް ދާނެ މިސްރާބެއްގައި ހިފެހެއްޓުމަކީވެސް ދަރަނި މެނޭޖުކުރުމަށް ސަރުކާރުން ހުށަހަޅުއްވާފައިވާ ފިސްކަލް ސްޓްރަޓަޖީގައި ހިމަނުއްވާފައި އަމާޒެއްކަމުގައިވެސް ފިނޭންސް މިނިސްޓަރު ވިދާޅުވެފައި ވެއެވެ.
އޭގެ މީގެ އިތުރުން 2023 ގެ ނިޔަލަށް ރިކަރަންޓް ޚަރަދު، ދައުލަތުގެ އާމްދަނީއަށްވުރެ އިތުރު ނުވާނެ މިންވަރަށް ތިރިކޮށް އެ މިންގަނޑުގައި ހިފެހެއްޓުމަކީވެސް 2023ގެ ބަޖެޓިގައި ހިމަނާފައިވާ ފިސްކަލް ސްޓްރަޓަޖީގެ މުހިންމު ޓާރގެޓެއްކަމުގައިވެސް މިއަދު މަޖިލިހަށް ހުށަހެޅުއްވި ބަޖެޓް ބަޔާނުގައި ފިނޭންސް މިނިސްޓަރު ވިދާޅުވެފައި ވެއެވެ.
އޭނާ ވިދާޅުވީ މި އަމާޒުތައް ހާސިލުކުރެވޭނީ ވަރުގަދަ އަޒުމެއްގައި، ހިކުމަތްތެރިކަމާއެކު މަސައްކަތްކޮށްގެން ކަމަށާއި، މި އަމާޒުތަކަކީ ރާއްޖޭގެ އިޤްތިސާދީ ހަމަޖެހުމަށާއި ދަރަނީގެ ދެމެހެއްޓެނިވިކަމަށް މުހިއްމު އަމާޒުތަކެއް ކަމުގައެވެ.
މިގޮތުން މި ސަރުކާރުން ބަޖެޓު އެކުލަވާލައި ތަންފީޒުކުރަމުންދާނީ މި އަމާޒުތައް ހާސިލުކުރެވޭނެ މަގުން ކަމަށާއި، އަދި ރާއްޖޭގެ ދަރަނި މެނޭޖްކޮށް ފިސްކަލް ހިރާސްތައް ކުޑަކުރުމަކީ މާލީ ދެމެހެއްޓެނިވިކަން ކަށަވަރުކޮށް، ރާއްޖޭގެ އިޤްތިސާދު ރަނގަޅު މިސްރާބެއްގައި ބެހެއްޓުމުގެ އިތުރުން، ދެން އަތުވެދާނެ އިޤްތިސާދީ އަދި މާލީ ކާރިސާއަކަށް ތައްޔާރުވުމުގެ ގޮތުން މި ވަގުތުކުރަން ޖެހޭ ކަމެއްކަމުގައިވެސް ފިނޭންސް މިނިސްޓަރު ވިދާޅުވެފައި ވެއެވެ.
އޭނާ ވިދާޅުވީ 2023 ވަނަ އަހަރުގެ ބަޖެޓު އެކުލަވާލުމުގައި ބަލާފައިވާނީ މެދުރާސްތާގައި ރާއްޖޭގެ އިޤްތިސާދީ ކުރިއެރުން ދަމަހައްޓައި، ފިސްކަލް އަދި ދަރަނީގެ ދެމެހެއްޓެނިވިކަން ކަށަވަރުކުރުމުގެ މައްޗަށްކަމުގައެވެ.
