މިހާރު ކުރިޔަށްދާ، ޗައިނާގެ ވެރިކަންކުރާ ކޮމިއުނިސްޓް ޕާޓީގެ ކޮންގްރެސްގެ ނިންމުމުގެ ރަސްމިއްޔާތުން ޗައިނާގެ ކުރީގެ ރައީސް ހޫ ޖިންޓާއޯ ބޭރު ކޮށްފިއެވެ.
އުމުރުން 79 އަހަރުގެ، މުސްކުޅި ވުމުގެ ސަބަބުން ހިނގާބިގާވެ އުޅުމަށްވެސް އުދަގޫކަމަށް ފެންނަ، ޗައިނާގެ ކުރީގެ ރައީސް މި ރަސްމިއްޔާތުން ބޭރަށްދިއުމަށް ދެ އޮފިޝަލަކު އޭނާއަށް އެންގިއިރު އޭނާ އިންނެވީ، ޗައިނާގެ ނުފޫޒުގަދަ ރައީސް ޝީ ޖިންގްޕިންގ އާއި ޖެހިވަޑައިގެންނެވެ.
ކުރީގެ ރައީސް މި ޖަލްސައިން ބޭރަށް ގެންދެވުނު ސަބަބެއް ޗައިނާ ސަރުކާރުން ހާމަ ކޮށްފައެއް ނުވެއެވެ.
އެއް ހަފްތާގެ މުއްދަތަށް ކުރިޔަށްދިޔަ މި ކޮންގްރެސްގެ ނިންމުމުގެ ރަސްމިއްޔާތުގައި، މި ކޮންގްރެސްއިން، މިހާރު އުމުރުން 69 އަހަރުގެ ޝީ ޖިންގޕިން އެގައުމުގެ ރައީސްކަމަށް އައްޔަން ކުރާނެއެވެ. ފެށޭ ދައުރު ވެގެންދާނީ ޝީ ޖިންގޕިންގެ 3 ވަނަ ރިޔާސީ ދައުރަށެވެ.
ކޮންމެ 5 އަހަރަކުން އެއްފަހަރު ބޭއްވޭ މިކޮންގްރެސްގައި ޝީ ޖިންގޕިންގ އާ ދައުރަކަށް އައްޔަން ކުރުމާއެކު އޭނާ ވެގެންދާނީ ޗައިނާގެ ކުރީގެ ލީޑަރު މާއޯ ޒެޑޮންގއަށްފަހު ޗައިނާގައި ވެރިކަންކުރާ އެންމެ ނުފޫޒުގަދަ ލީޑަރު ކަމުގައެވެ.
ދެ އޮފޮޝަލަކު ސްޓޭޖްމައްޗަށް ވަޑައިގެން، 2003 އިން 2013 އަށް ޗައިނާގައި ރައީސްކަން ކުރެއްވި ހޫ ޖިންޓޯގެ އަތުގައި ހިފާ އޭނާ ހޯލުން ބޭރަށް ގެންދިޔައިރު އޭނާ އިންނެވީ ސްޓޭޖް މަތީގައި، މިހާރުގެ ރައީސް ޝީ ޖިންގޕިންގއާއި ޖެހިވަޑައިގެން އޭނާގެ އަރިހުގައެވެ.
އަދި އޭނާގެ އަތުގަ ހިފައިގެން ދެ އޮފިޝަލުން އޭނާ ހޯލުން ބޭރަށް ގެންދިޔަވަގުތު، އަރިހުގައި އިންނެވި މިހާރުގެ ރައީސް ޝީ ޖިންގްޕިންގެ އަރިހުގައި އޭނާ ކޮންމެވެސް ވާހަކައެއް ދެެއްކެވި މަންޒަރު ފެނިފައި ވެއެވެ. އަދި ޝީ ޖިންގޕިން ބޮލުން އިޝާރާތް ކުރެއްވި މަންޒަރުވެސް ފެނިފައި ވެއެވެ.
މިހާރު ކުރިޔަށްދާ ކޮންގްރެސްގައި ހޮނިހިރުދުވަހު ވަނީ، ވެރިކަންކުރާ ކޮމިއުނިސްޓް ޕާޓީގެ ސެންޓްރަލް ކޮމިޓީގެ 205 ސީނިއަރ އޮފިޝަލުން އިންތިޚާބު ކޮށްފައެވެ. އަދި މި ކޮންގްރެސްގެ ޑެލިގޭޓުންވަނީ، ޕާޓީގެ އަސާސީ ގަވައިދަށް ގެނެވެނު ބަދަލުތަކުގައި ރަބަރ ސްޓޭޕްޖަހާ އަސާސީ ގަވާއިދު ފާސްކޮށްފައެވެ. ޕާޓީގެ އަސާސީ ގަވާއިދަށް ބަދަލު ގެނެސްފައިވަނީ އެގައުމުގެ ރައީސް ޝީގެ ވިސްނުންފުޅަކީ މި އަސާސީ ގަވާއިދުގެ އަސާސްތައްކަމަށް ބަލައިގެންނެވެ.
ކޮމިއުނިސްޓް ޕާޓީގެ ޖެނެރަލް ސެކެޓްރީގެ އިތުރުން، އެގައުމުގެ ރައީސްކަމާއި އަދި އަސްކަރިއްޔާގެ އެންމެ އިސް ވެރިޔާގެ މަގާމުވެސް ފުރުއްވަމުން ގެންދަވަނީ ރައީސް ޝީއެވެ. އަދި އޭނާ މިހާރު އެގައުމުގައި ނިސްބަތް ކުރަނީ ޗައިނާގެ ރޫހާނީ ލީޑަރުގެ ގޮތުގައެވެ.
މިހަފްތާގެ އާދީއްތަ ދުވަހު ކޮމިއުނިސްޓް ޕާޓީން ރަސްމީކޮށް، ޝީ އެޕާޓީގެ ޖެނެރަލް ސެކެޓްރީގެ މަގާމަށް، ޖެހިޖެހިގެން ތިންވަނަ ދައުރަަކަށް އިންތިޚާބު ކުރާނެއެވެ. އަދި އެއަށްފަހު އޭނާ އާ ލީޑަރޝިޕް ޓީމް އިއުލާން ކުރައްވާނެއެވެ.
ޝީ ވަނީ 2018ވަނަ އަހަރު، ޗައިނާގެ ގާނޫނު އަސާސީގައި، ޖެހިޖެހިގެން 2 ދައުރަށްވުރެ އިތުރަށް ވެރިކަން ނުކުރެވޭ ގޮތަށް އޮތް އޮތުން ބަދަލުކުރައްވާ، އޭނާއަށް އުމުރަށް ވެރިކަމުގައި ހުރެވޭނެ މަގު ތަނަވަސް ކުރައްވާފައެވެ.
