ކަނާތު ފިޔައިގެ ހަރުކަށި ވިސްނުމަށް ތާއީދުކުރާ، ޖޯޖިއާ މެލޯނީ، އިޓަލީގެ ފުރަތަމަ އަންހެން ބޮޑުވަޒީރުގެ ގޮތުގައި މަގާމުގެ ހުވާ ހޮނިހިރުދުވަހު ކުރައްވައިފިއެވެ.
މެލޯނީ އިޓަލީގެ ބޮޑުވަޒީރުކަމަށް ވަޑައިގެންފައިވަނީ، އޭނާގެ ކެމްޕޭންގައި، އެގައުމަށް ހިޖުރަކުރުން ހުއްޓުވުމަށާއި، ޒަމާންވީ އާއިލީ އާދަތައް ދަމަހައްޓަވާނެ ކަމަށާއި، އެއްޖިންސުގެ (LGBTQ) ހައްގުތަކާއި ދެކޮޅަށް އޭނާ ވެވަޑައިގެންނެވި ވައުދުތަކާއެކުއެވެ.
އިޓަލީގެ ރޯމުގައި ހުންނަ ކުއިރިނާލޭ ޕެލަސްގައި ބޭއްވުނު ރަސްމިއްޔާތެއްގައި މެލޯނީއަށް ބޮޑުވަޒީރުކަމުގެ ހުވާ ލައިދެއްވީ އެގައުމުގެ ރައީސް ސާގިއޯ މަޓަރެއްލާއެވެ.
މެލޯނީ ވެރިކަމަށް ވަޑައިގެންނެވީ ކަނާތުފިޔައިގެ ހަރުކަށި އުސޫލުތަކަށް ތާއީދުކުރާ ޕާޓީތަކާއި، ކަނާތުފިޔައިގެ މެދުމިނަށް ތާއީދުކުރާ ޕާޓީތަކާއެކު އޭނާގެ "ބްރަދާރސް އޮފް އިޓަލީ" ޕާޓީން ކޯލިޝަން ހަދައިގެން އެކުލަވާލި ސަރުކާރަކާއެކީއެވެ. މަސްރަހު ދިރާސާކުރާ ފަރާތްރަކުން ވިދާޅުވަނީ، މެލޯނީގެ ސަރުކާރު ވެގެންދާނީ، ފާއިތުވެދިޔަ އެތައް އަހަރެއްގެ ތެރޭގައި އިޓަލީއަށްއައި ކަނާތުފިޔައަށް އެންމެ ބޮޑަށް ނިސްބަތްވާ ސަރުކާރު ކަމުގައެވެ.
މެލޯނީ އުފެއްދިވި ކޯލިޝަންގައި، ކަނާތުފިޔައިގެ އިތުރު ދެ ލީޑަރުން ހިމެނެއެވެ. އޭގެތެރެއިން އެއް ބޭފުޅަކީ އެގައުމުގެ ކުރީގެ އިންޓީރިއަރ މިނިސްޓަރު މައްޓެއޯ ސަލްވިނިއެވެ. އޭގެ އިތުރުން މެލޯނީގެ ކޯލިޝަންގައި، އެގައުމުގެ ކުރީގެ ބޮޑުވަޒީރު، ކަނާތުފިޔައިގެ މެދުމިނަށް ތާއީދުކުރާ ސިލްވިއޯ ބެރެލުސްކޯނީވެސް ހިމެނިވަޑައިގަންނަވައެވެ. މި ދެބޭފުޅުންނަކީވެސް ރަޝިއާގެ ރައީސް ލާޑިމިރު ޕުޓިންއަށް ތާއީދުކުރާކަން އާންމުކޮށް ކުރިން ހާމަކުރައްވާފައިވާ ދެބޭފުޅުންނެވެ.
އޭގެ ނަތީޖާއެއްގެ ގޮތުން، މެލޯނީގެ ސަރުކާރުން ރަޝިއާއާއެކު ގެންގުޅޭނެ ސިޔާސަތަކާއި ގުޅޭގޮތުން ގިނަބަޔަކު ވަނީ ސުވާލު އުފައްދާފައެވެ.
މެލޯނީގެ 24 ވަޒީރުންގެ މައްޗަށް އެކުލެވޭ ކެބިނެޓްގެ 6 ވަޒީރުންނަކީ އަންހެން ބޭފުޅުންނެވެ.
