އާ ބޮޑުވަޒީރަކަށް ވެވަޑައިގަތުމަށް، ރޭހުގެ އެންމެ ކުރީގައި ބޮރިސް ޖޯންސަންއާއި ރިޝީ ސުނަކް

އިނގިރޭސިވިލާތުގެ ބޮޑުވަޒީރުކަން އެންމެ 6 ހަފްތާ ވަންދެން ކުރެއްވުމަށްފަހު، ލިޒް ޓްރަސް ބޮޑުވަޒީރުކަމުން އިސްތިއުފާ ދެއްވުމާއި ގުޅިގެން، އެގައުމުގެ އާ ބޮޑުވަޒީރަަކު އިންތިޚާބުކުރުމަށް ކޮންޒަވޭޓިވް ޕާޓީގެ ތެރޭގައި އާ އިންތިޚާބެއް ބޭއްވުމަށް ތައްޔާރު ވަމުންދާއިރު، އާ ބޮޑުވަޒީރަކަށް ވެވަޑައިގަތުމަށް ރޭހުގެ އެންމެ ކުރީގައި އުޅުއްވަނީ މީގެ 3 މަސްކުރިން އިސްތިއުފާދެއްވި، ކުރީގެ ބޮޑުވަޒީރު ބޮރިސް ޖޯންސަންއާއި ކުރީގެ މާލީ ވަޒީރު ރިޝީ ސުނަކް ކަމުގައި މީޑިއާ ރިޕޯޓުތައް ބުނެފިއެވެ.

އިގުތިސާދީ ސިޔާސަތުތައް ފެއިލްވެ، ލިޒް ޓްރަސް ބޮޑުވަޒީރުކަމުން އިސްތިއުފާ ދެއްވުމާއި ގުޅިން އާ ބޮޑުވަޒީރަކަށް ވެވަޑައިގަތުމަށް، މަގާމަށް ޝައުގުވެރިކަން ހުރި، ކޮންޒަރވޭޓިވް ޕާޓީގެ ގާނޫނުހަދާ މަޖިލިހުގެ މެމްބަރުން މިހާރު ގެންދަވަނީ 100 މެމްބަރުންގެ ސޮއި ހަމަކުރެއްވުމަށް މަސައްކަތް ކުރައްވަމުންނެވެ.

ކޮންޒަރވޭޓިވް ޕާޓީގެ ލީޑަރޝިޕް އިންތިޚާބުގައި ވާދަ ކުރުމަށްޓަކާ، ކޮންމެ ކެނޑިޑޭޓަކުންވެސް ގާނޫނުހަދާ މަޖިލިހުގެ 100 މެމްބަރުންގެ ސޮއި ހޯއްދަވަން ޖެހެއެވެ. މިހާރު ކުރިޔަށްދާ، ކޮންޒަވޭޓިވް ޕާޓީގެ ލީޑަރޝިޕް އިލެކްޝަންއަށްފަހު، އިނގިރޭސިވިލާތުގެ ބޮޑުވަޒީރުކަމަށް ވަޑަގަންނަވާނީ ފާއިތުވި 6 އަހަރުގައި އެގައުމަށް ވަޑައިގަންނަވާ 5 ވަނަ ބޮޑުވަޒީރެވެ.

ވަރަށް އަވަހަށް، ކުރު މުއްދަތެއްގެ ތެރޭގައި ބާއްވާ މި އިންތިޚާބު ކާމިޔާބުކުރައްވާ ބޭފުޅެއްގެ ނަން އިއުލާން ކުރުމަށް ހަމަޖެހިވަނީ އަންނަ ހަފްތާގެ ހޯމަ ދުވަހުއެވެ.

ބޮރިން ޖޯންސަންގެ ކުރީގެ އެޑްވައިޒަރެއް ކަމުގައިވާ ވިލް ވާރލްޑެން ސްކައި ނިއުސްގައި ވާހަކަ ދައްކަވަމުން ވިދާޅުވެފައިވަނީ، ޗުއްޓީ ނިންމަވާލެއްވުމަށްފަހު ގޮތްތަކެއް ނިންމަވާނެ ކަމުގައެވެ.

ގޯލްޑްމަން ސަޗްސްގެ ކުރީގެ އެނަލިސްޓެއް ކަމަށްވާ، އަދި ކޯވިޑް ކާރިސާގެ ތެރޭގައި އިނގރޭސިވިލާތުގެ މާލީ ވަޒީރުކަން ކުރެއްވި ސުނަކްއަކީވެސް ޕާޓީގެ ލީޑަރޝީޕް އިންތިޚާބު ކާމިޔާބު ކުރައްވާނޭކަމަށް ގިނަ ބަޔަކު ގަބޫލުކުރާ އެއް ބޭފުޅެކެވެ. އެންމެ ފަހުން ބޭއްވުނު އިންތިޚާބުގައި ލިޒް ޓްރަސްއާއި ވާދަކޮށް އޭނާ ގޮސްފައިވަނީ ދެނަވައަށެވެ.

ދެން އެންމެ ވާދަވެރި ކެނޑިޑޭޓެއްގެ ގޮތުގައި ގިނަބަޔަކު ގަބޫލުކުރަނީ ޕެނީ މޯޑައުންޓްއެވެ. އޭނާއަކީ ކުރީގެ ޑިފެންސް މިނިސްޓަރުކަން ކުރެއްވި ބޭފުޅެކެވެ. އޭނާއަކީ ކޮންޒްވޭޓިވް ޕާޓީގެ މެމްބަރުންގެ ތެރޭގައި މަގުބޫލު ބޭފުޅަކަށް ވިޔަސްވެސް، އެންމެ ފަހުން ބޭއްވުނު އިންތިޚާބުގައި އޭނާއަށްވަނީ މާބޮޑު ކާމިޔާބެއް ނުލިބިފައެވެ. ޕެނީ މޯޑައުންޓު މިހާރުވަނީ އޭނާގެ ކެމްޕޭން ލޯނޗު ކޮށްފައެވެ.