އިނގިރޭސި ޕްރިމިއާ ލީގުގެ ކްލަބް އެސްޓަން ވިލާގެ ކޯޗުގެ މަގާމުން ސްޓީވެން ޖެރާޑް ވަކިކޮށްފިއެވެ.
އެސްޓަން ވިލާގެ ކޯޗުކަމާ ޖެރާޑް، 42، ހަވާލުވީ މިދިޔަ އަހަރުގެ ނޮވެމްބަރު މަހު, ތިން އަހަރާ ބައިގެ ކޮންޓްރެކްޓެއްގައެވެ. އެކަމަކު، އަހަރެއް ވެސް ނުވަނިސް އެ ޓީމުން މި ވަނީ ޖެރާޑް ވަކިކޮށްފައެވެ.
ޖެރާޑަށް އެސްޓަން ވިލާގެ ކޯޗުކަމުގެ ވަޒީފާ ގެއްލުނީ އިނގިރޭސި ޕްރިމިއާ ލީގުގައި ރޭ ރަށުންބޭރުގައި ފުލަމް އަތުން 3-0 އިން ބަލިވި މެޗަށް ފަހުއެވެ. އެސްޓަން ވިލާ އިން ބުނީ މިއީ ކްލަބްގެ ބޯޑު މެމްބަރުންގެ އިއްތިފާގުން މި ވަގުތުގެ ހާލަތަށް ބަލާފައި ނިންމި ނިންމުމެއް ކަމަށެވެ.
ކުރިން އިންގްލެންޑާއި ލިވަޕޫލްގެ ކެޕްޓަން ޖެރާޑް، އެސްޓަން ވިލާއާ އެކު މި ވީ 11 މަސް ދުވަހުގެ ތެރޭގައި 40 މެޗެއްގައި އިރުޝާދު ދީފައި ވާއިރު، މޮޅު ވެވުނީ 13 މެޗުންނެވެ. މި މުއްދަތުގައި 19 މެޗުން ވަނީ ބަލި ވެފައެވެ. ކުރިން ލިވަޕޫލްގެ ކެޕްޓަނަކަށް ހުރި، ޖެރާޑް، ކޯޗިން ކެރިއަރު ފެށީ 2018 ވަނަ އަހަރު ރޭންޖާސް އިންނެވެ. އޭގެ ކުރިން އޭނާ ވަނީ ލިވަޕޫލްގެ 18 އަހަރުން ދަށުގެ ޓީމަށް ކޯޗުކޮށްދީފައެވެ.
ވިލާއާ ހަވާލުވެ، ޖެރާޑް ވަނީ ޔޫރަޕުގެ ގިނަ ޓީމުތަކަކާ ވާދަކޮށް މަޝްހޫރު ނަންތަކެއް ޓީމަށް ގެނެސްފައެވެ. އޭގެ ތެރޭގައި ބާސެލޯނާ އަށް ކުޅުނު ބްރެޒިލްގެ ފިލިޕޭ ކުޓީނިއޯ އާއި ސެވިއްޔާގެ ޑިފެންޑަރު ޑިއޭގޯ ކާލޯސް އާއި ފްރާންސްގެ މިޑްފީލްޑަރު ބައުބަކާ ކަމާރާ ހިމެނެ އެވެ. ނަމަވެސް ނަތީޖާ ނެރެން ފަސޭހައެއް ނުވިއެވެ.
ޖެރާޑަކީ ޕްރިމިއާ ލީގުގައި މި ސީޒަންގައި ވަޒީފާ ގެއްލުނު ހަތަރު ވަނަ ކޯޗެވެ. އެންމެ ފުރަތަމަ ގެއްލުނީ ބޯންމަތުގެ ކޯޗު ސްކޮޓް ޕާކާގެ މަގާމެވެ. އެއަށް ފަހު ޗެލްސީގެ ކޯޗު ތޯމަސް ޓުޗެލް އާއި ވުލްވްސްގެ ކޯޗު ބްރޫނޯ ލާޖް ވެސް މަގާމުން ދުރުކުރިއެވެ.
