ބޮލީވުޑްގެ އެންމެ ލޯބި އެއް ޖޯޑުގެ ގޮތުގައި މަޝްހޫރު ކެޓްރީނާ ކައިފް އާއި ވިކީ ކޯޝަލް ކައިވެނި ކުރީ މިދިއަ އަހަރުގެ ޑިސެމްބަރު މަހުގެ 9 ވަނަ ދުވަހުއެވެ.
ގިނަ ބައެއްގެ މެދުގައި މިޖޯޑަކީ ވަރަށް މަގުބޫލު ޖޯޑެކެވެ. ކައިވެނި ކުރި ފަހުން ހިންދޫއިންގެ ސަގާފަތުގައި ކުރަމުން އަންނަ ގިނަ ކަންކަން ކެޓްރީނާ ވެސް އަންނަނީ ކުރަމުންނެވެ. އެގޮތުން އެމީހުން ފާހަގަ ކުރި ކަރްވާޗޯތު ކެޓްރީނާވެސް ވަނީ ފާހަގަކޮށްފައެވެ.
ކެޓްރީނާ މިވަގުތު ވަރަށް ބިޒީ ކޮން އުޅެމުން އަންނަނީ އޭނާގެ ކުރިއަށް އޮތް ފިލްމް "ފޯން ބޫތު" ގެ ޕްރޮމޯޝަންގައެވެ. އެގޮތުން ތަފާތު އިވެންޓް ތަކާއި ނޫސްވެރިންގެ ބައްދަލުވުންތަކުގައި އޭނާ އަންނަނީ ބައިވެރި ވަމުންނެވެ.
View this post on Instagram
ފިލްމަށް ވުރެ ބޮޑަށް ނޫސްވެރިންގެ ސުވާލުތައް ކެޓްރީނާ އަށް އަމާޒުވަނީ ވިކީ އާއި އޮތް ގުޅުމުގެ ސުވާލުތަކެވެ. ކައިވެންޏަށްފަހު ދިރިއުޅުމަށް އައި ބަދަލުތަކާއި ޕާސަނަލް ސުވާލުތަކެވެ.
ވިކީއާ އޮތް ގުޅުމުގެ ވާހަކަ ދައްކަމުން ކެޓްރީނާ ބުނެފައިވަނީ އޭނާ އާއި ވިކީ އަކީ ވަރަށް މިޒާޖުގެ ގޮތުން ތަފާތު ދެމީހުން ކަމަށެވެ. އެކަކު އަނެކަކާއި މިޒާޖު ދިމާ ނުވާ ކަމަށާއި އެގުޅުން އެހާ ވަރުގަދައީ އެހެނެވެ ކަމަށް އޭނާ ވަނީ ބުނެފައެވެ.
ކެޓްރީނާ ގެ ފިލްްމު "ފޯން ބޫތު" ރިލީޒް ކުރުމަށް ތާވަލް ކޮށްފައިވަނީ އަންނަ މަހުގެ 4 ވަނަ ދުވަހަށެވެ. މި ފިލްމް އަކީ ހޮރޯ ކޮމެޑީއެކެވެ. ފިލްމުގައި ކެޓްރީނާ ފެނިގެން ދަނީ ގޯސްޓްއެއްގެ ގޮތުގައެވެ. ކެޓްރީނާ އާއެކުގައި ފިލްމްގައި ޒުވާން ދެ އެކްޓަރުން ފެނިގެންދާނެއެވެ. އެއީ އިޝާން ޚައްޓަރު އާއި ސިދާންތު ޗަތުރުވޭދީ އެވެ. މި ފިލްމު ޑައިރެކްޓް ކޮށްފައިވަނީ ގުރްމީތު ސިންގްއެވެ.
