ކުރީގެ ރައީސް ޔާމީންގެ ވެރިކަމުގައި ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކުރި އާ ރަންވޭ މިސަރުކާރުން ބޭނުން ކުރަން ފެށި ކަމުގައި ވީނަމަވެސް އެމަސައްކަތަކީ ރައީސް ޔާމީންގެ ވެރިކަމުގެ މަސައްކަތެއް ކަމާއިމެދު ސުވާލު އުފެއްދޭނެ ޖާގައެއް ނެތްކަމަށް ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
އާރަންވޭ ބުރާސްފަތި ދުވަހު ބޭނުން ކުރުމަށް ފެށުމަށް ބޭއްވި ރަސްމިއްޔާތަށްފަހު ގިނަ ބަޔަކު ދަނީ ސޯޝަލް މީޑިއާގައި މިމަސައްކަތާއި ގުޅޭގޮތުން އެކި ގޮތްގަށް ވާހަކަ ދައްކަމުންނެވެ. ގިނަ ބަޔަކު ދަނީ މިމަސައްކަތުގެ ފުރިހަމަ ތައުރީފް ނިމިދޔަ ސަރުކާރަށް ހައްގު ކަމަށެވެ.
ޝައިޚު ޒައިދު ވިދާޅުވީ އާރަންވޭގެ މަސައްކަތަކީ އެއްވެސް ޝައްކެއް ނެތް ގޮތުގައި ރައީސް ޔާމީންގެ ވެރިކަމުގައި ނިންމާފައިވާ މަޝްރޫއެއްކަމަށެވެ. މިމަޝްރޫއަކީ ނިމިދިޔަ ވެރިކަމުގައ ހުޅުވާފައިވާ މަޝްރޫއަކަށްވާއިރު ރަންވޭ މިސަރުކާރުން ބޭނުން ކުރަން ފެށުމަކީ ކުރީ ސަރުކާރުން ކުރި މަސައްކަތަށް ކްރެޑިޓް ލިބެނުޖެހެންވީ ސަބަބެއް ނޫންކަމަށެވެ.
އާ ރަންވޭ އެޅީ މިދިޔަ ވެރިކަމުގައި! އެއީ ސުވާލު އުފެދޭ ނުވަތަ އުފައްދަންޖެހޭ ވެސް ކަމެއް ނޫން! އޭރު ރަންވޭ އަޅައި އެ ހުޅުވި! އަދި މިހާރު ރަންވޭ ދެވަނަ ފަހަރަށް މި ހުޅުވުނީ! ކޮންމެ މަސައްކަތެއްކުރި މީހަކަށްވެސް އެމަސައްކަތެއްގެ ކްރެޑިޓް ދިނުމަކީ އަމާނާތްތެރި ޢަދުލުވެރި ގޮތް!
– ޒައިދު ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓް ޒަމާނީ ފެންވަރަށް ތަރައްޤީކުރުމަށް ހިންގާ ބިޔަ މަޝްރޫޢުގެ ތެރެއިން އައު ރަންވޭގެ މަސައްކަތް ފަށާފައިވަނީ 2017 ވަނަ އަހަރުގެ ތެރޭގައެވެ. މި ރަންވޭ އަޅާފައިވަނީ އެއަރޕޯޓު ފަޅުން ގާތްގަނޑަކަށް 70 ހެކްޓަރުގެ ސަރަހައްދެއް ހިއްކައިގެންނެވެ. މިއާއެކު ހުޅުލޭ ބިމަށް 33 އިންސައްތަ ވަނީ އިތުރުވެފައެވެ. މި ރަންވޭގެ މަސައްކަތްކޮށްފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއި ޙަވާލުކޮށްގެންނެވެ. މި މަސައްކަތަށް އެކަނިވެސް 400 މިލިއަން ޑޮލަރު ޚަރަދުކޮށްފައިވެއެވެ.
އެއަރޕޯޓުގެ އައު ރަންވޭ ތަރައްޤީކުރުމުގައި އެމް.އޭ.ސީ.އެލުން އެންމެ ބޮޑަށް ވިސްނާފައިވަނީ މި ރަންވޭއަކީ ދެމެހެއްޓިނިވި ގޮތަކަށް ދިގު މުއްދަތަކަށް ބޭނުންކުރެވޭނެ ތަނަކަށް ހެދުމަށެވެ. އެގޮތުން 200 މިލިމީޓަރު ބޯމިނުގައި ފައުންޑޭޝަން ރަންވޭގައި އަޅާފައިވެއެވެ. އަދި އައު ރަންވޭ އަޅާފައިވަނީ ކުރިން ބޭނުންކުރަމުންދިޔަ ރަންވޭއަށް ވުރެ އުސްކޮށެވެ.
އައު ރަންވޭގެ މަސައްކަތްތައް ނިންމައި އެންމެ ފުރަތަމަ ޓެސްޓް ފްލައިޓް ޖައްސާފައިވަނީ 2018 ވަނަ އަހަރު ސެޕްޓެމްބަރމަހު 18 ވަނަ ދުވަހުއެވެ. އޭގެ ފަހުން އައު ރަންވޭ ޓެކްސީވޭއެއްގެ ގޮތުގައި ބޭނުންކުރަން ފަށާފައިވަނީ މިއަހަރުގެ ފެބުރުއަރީ 1 ވަނަ ދުވަހުއެވެ.
ކޮމެންޓު ފޮނުވާ