އެއްޖިންސުން ގުޅުން ހިންގި ނޫސްވެރިޔާ ނަސީރު އިބްރާހީމްގެ މައްސަލަ ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހެޅުމުން ކޯޓުން އެމައްސަލަ ބަލައި ނުގަނެ އަނބުރާ ފޮނުވާލައިފިއެވެ.

މައުލޫމާތު ލިބިފައިވާ ގޮތުގައި ޕީޖީ އޮފީހުން ކްރިމިނަލް ކޯޓަށް ފޮނުވި ދައުވާގައި އަސާސީ ކަންތައްތަކެއް ފުރިހަމަ ނުވާތީ އެ ކޯޓުގެ ރަޖިސްޓްރާ ވަނީ ނަސީރުގެ މައްސަލަ ބަލައި ނުގަތުމަށް ނިންމާފައެވެ.

ޕީޖީ އޮފީހުން މިހާރު ވަނީ ކްރިމިނަލް ކޯޓުގެ ރަޖިސްޓްރާގެ ނިންމުން ރިވިއުކުރަން ކްރިމިނަލް ކޯޓުގެ ގާޒީންގެ މަޖިލީހަށް ހުށަހަޅައިފައެވެ. ނަމަވެސް ރަޖިސްޓްރާގެ ނިންމުން ރިވިއުކޮށްދިނުމަށް އެދި ޕީޖީން ހުށަހެޅީ ގާނޫނުގައި އެކަމަށް ކަނޑައަޅާފައިވާ މުއްދަތު ހަމަވި ފަހުންނެވެ. އެހެންކަމުން އެމައްސަލަ ދެން ބަލައި ގަންނާނެ ކަމަކަށް ނުބެލެވެއެވެ.

ނަސީރު އެއްޖިންސުން ގުޅުންހިންގާ ވީޑިއޯއެއް އާންމުވީ ޖޫން މަހުގެ ތެރޭގައެވެ. އެކަމަކު އެއީ އޭގެ މާ ކުރީގެ ވޯޑިއޯއެއް ކަމަށްވެއެވެ. ސޯޝަލް މީޑިއާގައި އާންމުވި އެ ވީޑިއޯއިން ފެންނަނީ ނަސީރު ކަމަށް ތުހުމަތު ކުރެވޭ މީހަކާއި އެހެން ފިރިހެނަކު ޖިންސީ ގުޅުން ހިންގާ މަންޒަރެވެ.

އެ މައްސަލައިގައި މިދިޔަ ޖުލައި މަހު ނަސީރު ހައްޔަރުކުރި ނަމަވެސް ބަންދުގައި ދުވަސްކޮޅަކު ބެހެއްޓުމަށްފަހު ފުލުހުން އޭނާ ދޫކޮށްލީ ދައުވާކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އަށް މައްސަލަ ފޮނުވުމަށްފަހުއެވެ.

އެއްޖިންސުން ގުޅުން ހިންގި ގިނަ ބައެއްގެ މައްސަލަ ފުލުހުން އަންނަނީ ތަހްގީގު ކުރަމުންނެވެ. އޭގެތެރެއިން ބައެއް މީހުންގެ މައްޗަށް ހުކުމް ވެސް މިހާރު އިއްވައިފިއެވެ. އެގޮތުން އެމްޑީ އަލާމްގިރި އާއި ރައީސް ނަޝީދުގެ ކޮއްކޮ ނާޒިމް ސައްތާރުގެ މައްސަލާގައި ވަނީ ހުކުމްކޮށްފައެވެ.