އެމެރިކާއިން ރަޝިއާއަށް ދުރު ރާސްތާ މިސައިލް ފޯރުކޮށް ދޭނަމަ، ރަތް ރޮނގު ހުރަސްކޮށް، އެމެރިކާއަކީ ރަޝިއާ ޔޫކުރެއިން ހަނގުރާމައިގެ ބައިވެރިއެއްގެ ގޮތުގައި ބަލައިގަންނާނޭ ކަމުގެ އިންޒާރު ރަޝިއާގެ ފޮރިންގ މިނިސްޓްރީން އެމެރިކާއަށް ދީފިއެވެ.
ފާއިތުވެދިޔަ ބުރާސްފަތި ދުވަހު ރަޝިއާގެ ފޮރިންގ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ތަރުޖަމާން މާރިއާ ޒަޚަރޯވާ ވިދާޅުވީ، "އަމިއްލަ ބިން ހިމާޔަތް ކުރުމުގެ ހައްގު" ރަޝިއާއަށް އޮތް ކަމުގައެވެ.
މިހާރު 5 މަސްދުވަސް ފާއިތުވެފައިވާ ރަޝިއާ ޔޫކުރެއިން ހަގުރާމައި ފާއިތުވެދިޔަ ތަނުގައި އެމެރިކާއިންވަނީ ފާޅުގައި ޔޫކުރެއިންއަށް އެޑްވާންސް ގައިޑެޑް މަލްޓިޕަލް ރޮކެޓް ލޯންޗު ސިސްޓަމް (GMLRS)ގެ ރޮކެޓްތައް ސަޕްލައި ކޮށްދީފައެވެ. މިއީ 80 ކިލޯ މީޓަރު (50 މޭލު) ދުރުގައިވާ އަމާޒުތަކަށް ހަމަލާ ދިނުމުގެ ގާބިލްކަން ލިބިފައިވާ ރޮކެޓް ސިސްޓަމް ތަކެކެވެ. އަދި މި ރޮކެޓްތައް އުދުއްސާލަނީ، ފަސޭހަކަމާއެކު އެއްތަނުން އަނެއްތަނަށް ދަތުރު ކުރުކުގެ ގާބިލްކަން ލިބިފައިވާ އާރޓިލަރީ ރޮކެޓް ސިސްޓަކް ކަމަށް ވާ (HIMARS) ލޯންޗާރތައް ބޭނުން ކޮށްގެންނެވެ.
"ވޮޝިންގޓަންއިން ކީވްއަށް ދުރު ރާސްތާ މިސައިލްތައް ފޯރުކޮށްދެމުން ދާނަމަ، އެ ހުރަސްކުރެވެނީ ރަތް ރޮނގު، އެ ވެވެނީ މި ހަނގުރާމައިގެ ބައިވެރިއަކަށް،" ޒަޚަރޯވާ ވިދާޅުވެފައި ވެއެވެ.
އެމެރިކާއިން ބުނެފައިވަނީ، އެގައުމުން ފޯރުކޮށްދޭ ރޮކެޓްތަކުން ރަޝިއާއަށް ހަމަލާ ނުދޭނެކަމުގެ ޔަގީންކަން ޔޫކުރެއިންއިން ދީފައިވާ ކަމުގައެވެ.
HIMARS ލޯނޗަރތަކަކީ ދުރުރާސްތާ ATACMS ޓެކްޓިކަލް މިސައިލްތައް އުދުއްސާލުމުގެ ގާބިލްކަން ލިބިފައިވާ ސިސްޓަމްތަކެކެވެ. މި ސިސްޓަމްތަކުގެ ބޭނުން ކޮށްގެން 300 ކިލޯ މީޓަރު (186 މޭލު) ދުރުގައި ހުންނަ އަމާޒުތަކަށް ހަމަލާ ދެވެއެވެ.
ރަޝިއާން ފާއިތުވެދިޔަ ފެބްރުއަރީމަހުގެ 24ވަނަ ދުވަހު ޔޫކުރެއިންއަށް އުދުވާނީ ހަމަލާދޭން ފެށިފަހުން، ރަޝިއާއަށް އެގައުމުގައިދަނީ އަސްކަރީ ގޮތުން ބޮޑެތި ގޮންޖެހުންތަކާއި ކުރިމަތި ވަމުންނެވެ. އަދި ދާދިފަހުން ޔޫކުރެއިން ދޭންފެށި ކައުންޓަރ އެޓޭކްތަކުގައި ޔޫކުރެއިންގެ އަސްކަރިއްޔާއިން ވަނީ ރަޝިއާއިން މިހާތަނަށް ހިފާހައިވާ ސަރަހައްދުތަކުގެ ތެރެއިން ބޮޑުބައެއް މިނިވަން ކޮށްފައެވެ.
ކޮމެންޓު ފޮނުވާ