21 އަހަރަށް ފަހު އެކްޓިން އަށް އެނބުރި އަންނަކަން އިއުލާން ކުރި ކުރީގެ ބަތަލާ ނީލަމް ކޮޓާރީ އާއި އޭނާގެ ފިރިމީހާ ސަމީރު ސޯނީ އެކުގައި ފެނިގެންދާ އިޝްތިހާރެއްގެ މަސައްކަތް ފަށައިފިއެވެ.
އެކަން ވަނީ ނީލަމްގެ އިންސްޓަގްރާމްގައި ވެސް ހިއްސާކޮށްފައެވެ. ނަމަވެސް މިއީ ކޯއްޗެއް އިޝްތިހާރު ކުރުމަށް އަދި ކޮން ބްރޭންޑެއްގެ އިޝްތިހާރެއް ކަމެއް މިހާތަނަށް ހާމައެއް ނުކުރެއެވެ.
ނީލަމް ބުނެފައިވަނީ އަބަދުވެސް ފިރިމީހާ އާއި އެކުގައި ޝޫޓް ކުރާއިރުގައި ވަރަށް މަޖާ ކަމަށާއި ވަރަށް ހިތްހަމަ ޖެހިފައި ހުރި ކަމަށެވެ. އަދި ދެމީހުން އެކުގައި ފެނިގެންދާނެތީ ވަރަށް އެކްސައިޓް ވެފައި ހުރި ކަަމަށް ވެސް އޭނާ ވަނީ ބުނެފައެވެ.
1984ގައި ރިލީޒްކުރި "ޖަވާނީ" އިން ބޮލީވުޑަށް ތާއަރަފްވި ބަތަލާ އަންނަނީ އެނބުރި އެކްޓިންއަށް ނުކުތުމަށް ވެބް ސީރީޒް އެއްގެ މަސައްކަތް ކުރަމުންނެވެ.
1980 އާއި 1990 ގެ ކުރީކޮޅު ބެލުންތެރިންގެ ވަރަށް ބޮޑު މަޤުބޫލުކަން ހޯދި ބަތަލާ ނީލަމް އެންމެ ފަހުން ފެނިގެން ދިއައީ 2001 ވަނަ އަހަރު ރިލީޒްކުރި "ކަސަމް"އިންނެވެ.
