ނޫސްވެރިންގެ މައްޗަށް ސަރުކާރު އަންގަދަ ކުރާނެ ޖާގައެއް މިއަދަކު ނެތް ކަމަށާއި، ދުނިޔެއަށް ހެޔޮ ބަދަލު ގެނައުމަށް ނޫސްވެރިކަމުގެ މިނިވަންކަން އޮންނާން ޖެހޭ ކަމުގައި ރައީސުލްޖުމްހީރިއްޔާ އިބުރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ބްރޯޑްކާސްޓިން ދާއިރާގެ އަގު ވަޒަންކުރުމަށް ބްރޯޑްކާސްޓިންގ ކޮމިޝަނުން ރޭ ބޭއްވި ޚާއްސަ ހަފްލާގައި ވާހަކަ ދައްކަވަމުންނެވެ.
"މޯލްޑިވްސް ބްރޯޑްކާސްޓް އެވޯޑް 2022″ ގެ ނަމުގައި ރޭ ބޭއްވި މި ޖަލްސާ ޝަރަފްވެރި ކޮށްދެއްވާ، މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، މީޑިއާގެ ދާއިރާއަށް ބޮޑު ހުރަހެއްގެ ގޮތުގައި އޮތް އަބުރުގެ ގާނޫނު އުވާލީ މިސަރުކާރު ވެރިކަމަށް އައިސް ކަމަށާއި، ރައްޔިތުންގެ މަޖިލިހުން މިހާރު ފާސްކޮށްފައިވާ ހެެއްކާބެހޭ ގާނޫނުގައިވެސް ހުރި ނޫސްވެރިން ކަންބޮޑުވާ ކަންކަމާއި ގުޅޭގޮތުން މަޝްވަރާކޮށް، އެ މައްސަލަވެސް ހައްލުކުރުމަށް ސަރުކާރުން ނިންމާފައިވާ ކަމުގައެވެ.
މިޖަލްސާގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ، ރާއްޖޭގެ ނޫސްވެރިކަން އަންނަން އޮތް ޖީލުތަކާއި ހަމައަށް ރައްކާތެރިކަމާއެކު ފޯރުކޮށް ދިނުމަށްޓަކާ ކުރާންޖެހޭ ގިނަ މަސައްކަތްތަކެއް އަދިވެސް ހުރިކަމުގައެވެ. އަދި ނޫސްވެރިކަން ކުރިއެރުވުމުގައި މާލީގޮތުން ކުރިމަތިވެފައިވާ ގޮންޖެހުންތައްވެސް އެނގިވަޑައިގަންނަވާކަމަށްވެސް ރައީސް ސާލިހު ވިދާޅުވިއެވެ. މިގޮތުން ރައީސް ސާލިހު ވިދާޅުވީ ޗެނަލަތައް ހިންގާ ނިޔަތާ އެއްވަރަށް ކޮންޓެންޓް މުއްސަދި ނުކުރެވޭނަމަ، ފެންނަ މަންޒަރާއި އަޑުތައް އައިލީ ސިޓިންރޫމްތަކަށް ނުފެތޭނެ ކަމަށެވެ.
ކުރަންޖެހޭ ކަންކަން އަދިވެސް އެބަހުރި. މާލީދަތިތައް ހުރިކަން އަޅުގަނޑުވެސް ގަބޫލުކުރަން. އެހެންނަމަވެސް ޗެނަލް ހިންގާ ނިޔަތާ އެއްވަރަށް ކޮންޓެންޓްގެ ކަޅުކަން ބޮޑުވުމުން އެމަންޒަރާ އަޑު އާއިލީ ސިޓިން ރޫމްތަކަކަށް ނުފެތޭ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
ރާއްޖޭގައި ފުރަތަމަ ފަހަރަށް، ބްރޯޑްކާސްޓިން ދާއިރާގެ އަގު ވަޒަންކުރުމަށް ބޭއްވި އެވޯޑް ހަފުލާގައި ވާހަކަ ދައްކަވަމުން ރައީސް ސާލިހު ވިދާޅުވީ، އެމަނިކްފާނަކީވެސް ޒުވާން އުމުރުގައި ބްރޯޑްކާސްޓިންގ ދާއިރާގައި މަސައްކަތް ކުރެއްވި ބޭފުޅެއް ކަމަށާއި، ޓީވީ ސްކްރީނުން ރީތި މަންޒަރެއް ގެނެސްދިނުމަށް އެދާއިރާގައި މަސައްކަތް ކުރާ ފަރާތްތަކުން ބުރަ މަސައްކަތްތަކެއް ކުރާކަން އެގިވަޑައިގަންނަވާ ކަމަށެވެ.
އެހެންކަމުން، މި ދާއިރާގައި މަސައްކަތްކުރާ ފަރާތްތަކުގެ ޚިދުމަތިގެ އަގު ވަޒަންކުރުން ކިތަންމެ ލަސްވެގެން ދިޔަނަމަވެސް މިއީ ދޭންޖެހޭ އެވާރޑެއްކަން ރައީސް ސާލިހުގެ ވާހަކަފުޅުގައި ފާހަގަ ކުރައްވާފައި ވެއެވެ.
ރައީސް ސާލިހު ވިދާޅުވީ ރާއްޖޭގެ ބްރޯޑްކާސްޓިންގގެ ޚިދުމަތް ފެށިގެން އައީ ދެކުނު ގަޑުބަޑުގެ ޚަބަރު ރައްޔިތުންނާއި ހަމައަށް ފޯރުކޮށް ދިނުމަކަށް ކަމަށާއި، އެއަށްފަހު ބްރޯޑްކާސްޓިންގެ ދާއިރާގެ ސަބަބުން ރާއްޖެއަށް ބޮޑެތި ފައިދާތަކެއް ކޮށްފައިވާ ކަމުގައެވެ.
ވަރަށް ގިނަ ތަކުލީފާއި ދައްޗާއެކު ސްކްރީނު ރީތިކުރުމަށް މުވައްޒަފުން ކުރި ބުރަ މަސައްކަތް އަޅުގަނޑަށް އެނގޭ. އަދި މިހާރު ރާއްޖޭގެ ވަރަށް ގިނަ ޕްރައިވެޓް ޓީވީ ޗެނަލްތަކުން ކުރަމުންދާ މަސައްކަތްތުގެ އަގު ވެސް އަޅުގަނޑު ވަޒަންކުރަން.
އެކި ޓީވީ ޗެނަލްތަކުން ކުރަމުންދާ މަސައްކަތްތަކުގެ އަގު ސަރުކާރުން ވަޒަންކުރާނޭކަން ހާމަކުރައްވަމުން ރައީސް ސާލިހު ވިދާޅުވެފައި ވެއެވެ.
ރޭ ބޭއްވުނު "މޯލްޑިވްސް ބްރޯޑްކާސްޓް އެވޯޑް 2022″ ހަފްލާގައިވަނީ އެދާއިރާއަށް ޚިދުމަތް ކުރަމުންދާ ގިނަ ފަރާތްތަކެއްގެ ޚިދުމަތުގެ އަގު ވަޒަންކުރުމުގެ ގޮތުން އެފަރާތްތަކާއި އެވާރޑްތައް ހަވާލު ކޮށްފައެވެ.
