ޑިމޮކްރަޓިކް ރިޕަބްލިކް އޮފް ކޮންގޯގައި، ސަރުކާރުގެ އޮފިޝަލުންތަކެއް ބުރިޖެއް އިފްތިތާހު ކުރުމާއެކު، އެ ބުރިޖް ބިމާހަމަ ވެއްޖެއެވެ.

މި ބުރިޖް އިފްތިތާހު ކުރުމަށް އޮފިޝަލުން ބުރިޖްމަތީގައި ތިބެގެން ރިބަން ފަށް ކަނޑާލުމާއެކު ބުރިޖް މަތީގައި ތިބި އޮފިޝަލުންނާއެކު މި ބުރިޖް ބިމާހަމަވަނިކޮށް ނަގާފައިވާ ވީޑިއޯއެއްވެސް ދަނީ ސޯޝަލް މީޑިއާގައި ދައުރު ވަމުންނެވެ. ދައުރުވަމުންދާ ވީޑިއޯއަށް ކޮމެންޓް ކޮށްފައިވާ އެތައްބަޔަކު ވަނީ ބުރިޖް އަޅާފައިވާ ފެންވަރަށް ހަޖޫޖަހާ ހަދާފައެވެ.

ބުރިޖް މަތީގައި ތިބި އޮފިޝަލުންނާއެކު ބުރިޖް ވެއްޓެމުން ދިޔައިރު، ބައެއް މީހުންވަނީ މި ބުރިޖްމަތީގައި ތިބި ބައެއް އޮފިޝަލުން އުފުލާލައިގެން ބިމަށް ބާލުވާފައެވެ. ބުރިޖް ވެއްޓިފައިވަނީ، މި ބުރިޖަ ހުޅުވުމުގެ ގޮތުން ރިބަންފަށް ކަނޑާލުމާއެކުއެވެ.

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި، މީހުންގެ އެހީތެރިކަމާއެކު ބިމަށް ބާލުވާފައިވަނީ ބުރިޖް ހުޅުވުމުގެ ގޮތުން ރިބަން ފަށް ކަނޑާލި އަންހެން އޮފިޝަލެވެ. ދެންތިބި އޮފިޝަލުން ފެނިފައިވަނީ ވެއްޓިފައިވާ ބުރިޖްގެ އެތަން މިތަނުގައި އެލިގަނެގެން ތިއްބައެވެ.

ކޮންގޯގެ އިހަރަރާރޭ ނޫހުން ރިޕޯޓުކޮށްފައިވާ ގޮތުގައި މި ހާދިސާ ހިނގާފައިވަނީ ފާއިތުވެދިޔަ ހަފްތާގައެވެ. ބުރިޖް ވެއްޓުމުގެ ކުރިންވަނީ މެދުން ބިންދައިގެން ގޮސްފައެވެ.

"މި ބުރިޖްގެ އަގު ޓެކްސް ޕޭޔަރުންގެ ފައިސާއިން އެއް މިލިއަން ޑޮލަރަށްވުރެ މަތި ނުވެއްޖެނަމަ ރަގަޅު،" މި ހާދިސާގެ ވީޑިއޯ ޓުވީޓު ކުރަމުން މީހަކު ބުނެފައި ވެއެވެ.

"މި ބުރިޖް ވެއްޓިގެން ދިޔަނުނީ ހިފަހައްޓަމުން އައިސްފައިވަނީ އެ ރިބަން ފަށް ކަމަށް ބެލެވެނީ،" އެހެން މީހަކު ޓުވީޓް ކޮށްފައި ވެއެވެ.