ޚަބަރު އޮންލައިން، އޮންލައިން ނޫހެއްގެ ގޮތުގައި ހޯމް މިނިސްޓްރީގައި ރަޖިސްޓްރީ ކުރެވިފައިވަނީ، 2020 ވަނަ އަހަރުގެ ސެޕްޓެމްބަރު މަހުގެ 7 ވަނަ ދުވަހުއެވެ.

އެދުވަހަށްފަހު، މެދު ކެޑުމެއް ނެތި، ފާއިތުވެދިޔަ މުއްދަތުގައި ޚަބަރު އޮންލައިންއިން މަސައްކަތް ކޮށްފައިވަނީ، ތާޒާކަމާއެކު، ދުނިޔެއާއި ރާއްޖޭގެ އެކި ކަންކޮޅުތަކުގައި ހިގަމުންދާ ތެދު ޚަބަރާއި މަޢުލޫމާތު ކިޔުންތެރިންނާ ހަމައަށް ވަގުތުން ވަގުތަށް ފޯރުކޮށްދިނުމަށެވެ.

މިގޮތުން ފާއިތުވި ކޯވިޑް ކާރިސާގެ ތެރޭގައާއި އަދި އޭގެ ފަހުން ދުނިޔެއަށް ކުރިމަތިވި ޔޫކުރެއިން ހަގުރާމައާއި އެ ހަނގުރާމައިގެ ސަބަބުން ދުނިޔެއާއި ރާއްޖޭގެ އިގްތިސާދަށް ކުރިމަތިވި ބޮޑެތި ގޮންޖެހުންތަކުގެ ޚަބަރުތައް ތާޒާކަމާއެކު ކިޔުންތެރިންނާއި ހަމައަށް ގެނެސް ދިނުމަށް ޚަބަރު އޮންލައިނުން ފާއިތުވެ 2021 ވަނަ އަހަރާއި އަދި މިހިގާ 2022ވަނަ އަހަރުވެސް ވަނީ ޚާއްސަ ސަމާލުކަމެއް ދީފައެވެ.

ހަމަ އެއާއެކު، ރާއްޖޭގެ ސިޔާސީ މަސްރަހުގައި ހިގަމުންދާ ސިޔާސީ ހަލަބޮލިކަމާއި ގުޅުންހުރި ތާޒާ ޚަބަރުތައް އާންމު ރައްޔިތުންނާއި ހަމައަށް ފޯރުކޮށްދިނުމުގެ އިތުރުން، ރާއްޖޭގެ އިޖުތިމާއީ އަދި ދީނީ ކަންކަމާއި ގުޅުންހުރި ޚަބަރުތައްވެސް އުނި އިތުރަކާއި ނުލާ ރިޕޯޓު ކުރަމުން ދިއުމަކީ ފެށުނީއްސުރެ ޚަބަރު އޮންލައިންއިން ކަނޑައަޅާފައިވާ މުހިންމު ލަނޑުދަނޑިއެކެވެ.

މީގެ އިތުރުންވެސް ރާއްޖޭގައި ދުވަހުން ދުވަހަށް ހިގަމުންދާ މުހިންމުކަންކަމާއި ގުޅުންހުރި ދިރާސާ ރިޕޯޓުތައް ޚަބަރު އޮންލައިންއިން ކިޔުންތެރިންނާއި ހަމައަށް ގެނެސް ދެމުން ގެންގޮސްފައިވަނީ، އިންވެސްޓީގޭޓިވް ޖާނަލިޒަމްއަކީ ނޫސްވެރިކަމުގެ ޒިންމާއާއި މަސްއޫލިއްޔަތުގެ ތެރޭގައި ހިމެނޭ، އަދި އެއީ ޒިންމާދާރު މަގާމުތަކުގައި ތިއްބަވާ ފަރާތްކާއި، މުވައްސަސާތައް ޒިންމާދާރުކުރުވުމުގެ މުހިންމު ވަސީލަތެއްކަމުގައި ދެކިގެންނެވެ.

އަމާޒަކީ ޒިންމާދާރު ނޫސްވެރިކަމެއް!

ޚަބަރު އޮންލައިންގެ މެނޭޖުމަންޓުން ފާހަގަ ކޮށްފައިވާ ގޮތުގައި، ނޫހުގެ އުމުރުން ފާއިތުވެގެންދިޔަ 2 އަހަރު ދުވަހަކީ ޒިންމާދާރުކަމާއެކު ޚަބަރާއި މައުލޫމާތު ފޯރުކޮށްދިނުމަށް މަސައްކަތް ކުރެވުނު، އެހެންނަމަވެސް ގިނަގުނަ ގޮންޖެހުންތަކާވެސް ކުރިމަތިލާންޖެހުނު ދެ އަހަރު ދުވަހެވެ.

މިގޮތުން، ރާއްޖޭގެ އެކިއެކި މުވައްސަސާތަކާއި އަދި ސަރުކާރުގެ އިސް މަގާމްތަކުގައި ތިއްބެވި ފަރާތްތަކުން މައުލޫމާތު ހޯދާ ލިބިގަތުމުގައި އަދިވެސް ކުރިމަތިވަމުންދާ ގޮންޖެހުންތަކުގެ އިތުރުން، ނޫސްވެރިކަމުގެ ސިނާއަތުގައި މަސައްކަތް ކުރާ ނޫސްވެރިންނަށް، ކުރެވޭ މަސައްކަތްތަކާއި އެކަށީގެންވާ ވަރުގެ އުޖޫރަ ލިބުމުގައި ހުރި ހުރަސްތަކަކީ، މިދާއިރާގައި ކުރިޔަށް ދިއުމަށް ނޫސްވެރިންނަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި ޚަބަރު އޮންލައިންގެ މެނޭޖްމަންޓުން ފާހަގަ ކޮށްފައި ވެއެވެ.

ހަމަ އެފަދައިން، ރާއްޖޭގެ ނޫސްވެރިކަމުގެ ދާއިރާގައި ސިޔާސީ ކުލަ އިންތިހާއަށް ބޮޑަށް ޖެހިގެންދާ ދިއުމުގެ އިތުރުން، ސިޔާސީ ފަރާތްތަކުގެ މެދުގައި އުފެދިފައިވާ ފިތުނަވެރިކަމާއި ހަމަނުޖެހުންތަކުގެ ޝިކާރައަކަށް ނޫސްވެރިންނާއި ނޫސްވެރިކަންވެ، ނޫސްވެރިންނަށް ރައްކާތެރިކަމާއެކު މަސައްކަތް ކުރެވޭނެ ޖާގަ ހަނިވަމުންދާ ދިއުމަކީވެސް ރާއްޖޭގެ ނޫސްވެރިކަމުގެ ދާއިރާއަށް ކުރިމަތިވަމުންދާ ބޮޑު ގޮންޖެހުމެއްގެ ގޮތުގައިވެސް ޚަބަރު އޮންލައިންއިން ފާހަގަ ކުރެއެވެ.

މީގެތެރެއިންވެސް އެންމެ ޚާއްސަ ގޮތެއްގައި ފާހަގަ ކޮށްލެވެނީ، ގާނޫނު އަސާސީން ނޫސްވެރިންނަށް ލިބިދީފައިވާ މަސްދަރު ރައްކާތެރި ކުރުމުގެ މިނިވަންކަން، ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ތަސްދީގު ކުރައްވާފައިވާ ހެއްކާބެހޭ ގާނޫނުން އިންތިހާއަށް ހަނިވެގެން ގޮސްފައިވާއިރު، ގާނޫނު އަސާސީން މުތުލަގަށް ފޯރުކޮށްދީފައިވާ މި ރައްކާތެރިކަމުން މަހުރޫމްވެ ތިބެ، ނޫސްވެރިކަމުގެ ދާއިރާގައި މިނިވަންކަމާއެކު މަސައްކަތް ކުރުމުގެ ޖާގަ މިއަދު ގެއްލިގެން ގޮސްފައިވުމެވެ.

އެހެންނަމަވެސް، އިސްވެ ދެންނެވުނު ހުރިހާ ގޮންޖެހުންތަކާއެކުވެސް، ފާއިތުވެދިޔަ 2 އަހަރުގެ މުއްދަތުގައި ޚަބަރު އޮންލައިންއިން މަސައްކަތް ކޮށްފައިވާނީ، ދައްޗާއި، އުދަގުލާއި އަދި ގޮންޖެހުންތައްވެސް ގިރާކޮށް، ޒިންމާދާރު، ވަކިފަރާތަކަށް ނުޖެހޭ ނޫސްވެރިކަމެއް ކުރުމުގައި ފައިތިލަ ސާބިތު ކުރުމުގެ ވަރުގަދަ އަޒުމުގައެވެ.

ޚަބަރާއި މައުލޫމާތު ތެދުވެރިކަމާއެކު ފޯރުކޮށްދިނުމަކީ ގައުމީ، ފަރުދީ ޒިންމާއެއް ކަމުގައި ދެކިގެންނެވެ. އެއީ ގާނޫނު އަސާސީންނާއި، ހެދިފައިހުރި ގާނޫނުތަކުންވެސް ލާޒިމްކުރާ އަދި، ނޫސްވެރިކަމުގެ އެންމެ މުހިންމު ވާޖިބު ކަމުގައި ދެކިގެންވެސްމެއެވެ.

ހިމާޔަތާއި ރައްކާތެރިކަން ބޭނުން!

މިނިވަން ޑިމޮކްރަސީއެއްގެ 4 ވަނަ ބާރަކީ މިނިވަން މީޑިއާކަމަށް ވުމާއެކު، ޑިމޮކްރަސީ ފޯދި ފައްކާވުމުގައި މީޑިއާއިން އަދާކުރާ ދައުރަކީ ދެބަސް ވެވެން ނެތް ހަގީގަތެވެ. މިނިވަން މީޑިއާއެއް ނެތް ތަނެއްގައި މިނިވަން ޑިމޮކްރަސީއެއް ވުޖޫދުވެގެން ނުދާނޭކަމީ އޭރުވެ މިހާރުވެސް ދުނިޔޭ އެކި ކަންކޮޅުތަކުން ފެންނާން އޮތް ސާފު ހަގީގަތެވެ.

އަދުގެ ދުނިޔޭގައި ޚުދުމުޚުތާރު ވެރިކަންތައް ކުރަމުން އަންނަ ގައުމުތަކުގައި، ރައްޔިތުން އަޅުވެތިކޮށް، ނުފޫޒާއި ބާރު މުށުތެރެއަށް ލުމަށް ޚުދުމުޚްތާރުވެރީންގެ އެންމެ ފުރަތަމަވެސް އަމާޒަކަށް ވެގެން ގޮސްފައިވަނީ، މީޑިއާގެ ވަސީލަތްތައް އަޅުވެތި ކުރުމުވެ. ޒިންމާދާރު މީޑިއާއެއް ވުޖޫދުވެގެންދިޔަ ނުދިނުމެވެ.

އެހެންކަމުން، ފުރިހަމަ ޑިމޮކްރަސީއެއްގެ އަސާސްތައް ދަމަހައްޓާއި، މިނިވަން މުސްތަގިއްލު ގައުމެއްގެ ގޮތުގައި ދެމިއޮތުމަށް ފުރިހަމަވާންޖެހޭ އެންމެ އަސާސީ އެއްރުކުނުގެ ގޮތުގައި އަބަދުވެސް ދެމިއޮންނާން ޖެހެނީ ޒިންމާދާރު، މިނިވަން މީޑިއާތައް ވުޖޫދުވެފައި އޮތުމެވެ. އެއީ ނުފޫޒެއްނެތި ޚަބަރާއި މައުލޫމާތު ހޯދާ ލިބިގަނެ، އަދި ފޯރުކޮށްދެވޭނެ މާހައުލެއް ތަނަވަސް ވެފައި އޮތުމެވެ.

ހަމައެއާއެކު، މީޑީއާތައްވެސް ގާނޫނު އަސާސީންނާއި ގާނޫނުތަކުން އެކަށައަޅާދީފައިވާ އިންތަކާއި މިންތަކުގެ ތެރޭގައި ހަރަކާތްތެރިވެ، މީޑިއާތައް ރެގިއުލޭޓް ކުރުމަށް އުފައްދާފައިވާ މުވައްސަސާތައް އެންމެ އެކަށީގެންވާ ގޮތުގައި މަސައްކަތް ކުރުކަމީ މުހިންމު ކަމެކެވެ.

މިފުރުސަތުގައި ފާހަގަކޮށްލާން ޖެހޭ އަނެއް ނުކުތާއަކީ މިއަދު ރާއްޖޭގައި ގިނަ އަދަދެއްގެ އޮންލައިން ނޫސްތަކެއް ވުޖޫދުވެފައި ވާއިރު، އެކަށީގެންވާ ގޮތެއްގައި މަސަައްކަތް ނުކުރާ، އެހެންނަމަވެސް ނޫސްވެރިކަމުގެ ލޭބަލް ޖަހައިގެން މަސައްކަތް ކުރަމުންދާ ނޫސްތަކަކީ ކޮބައިކަން ދެނެގަނެވި، ޒިންމާދާރުކަމާއެކު މަސައްކަތް ކުރަމުންދާ ނޫސްވެރިންނާއި ނޫސްތަކުން ކުރަމުންދާ ބުރަ ޒިންމާދާރު މަސައްކަތްތަކުގެ އަގު ވަޒަންކުރެވޭނެ އެކަށީގެންވާ މެކޭނިޒަމައެއް އަދިވެސް އެކަށައެޅިފައި ނުވާކަމެވެ.

މިގޮތުން، މިއަދުވެސް، ހޯމް މިނިސްޓްރީގައި ރަޖިސްޓްރީ ކުރެވިފައިވާ، އެހެންނަމަވެސް ހިނގަމުން ނުދާ ގިނައަދަދެއްގެ ނޫސްތަކެއް ވުޖޫދުވެފައި ވާއިރު، މީގެ ތެރޭގައި ހިމެނޭ ގިނަ ނޫސްތައް ތަމްސީލު ކުރުމުގެ ނަމުގައި، މީޑިއާކައުންސިލްގެ އިންތިޚާބުގައި ވަކިވަކި ފަރުދުންނަށް ވޯޓު ލުމުގެ ފުރުސަތު ވަނީ ތަނަވަސްވެފައެވެ. މީގެ ތެރޭގައި ހިމެނޭ ބައެއް ނޫސްތަކަކީ، ސިޔާސީ މަގުސަދުތައް ހާސިލްކުރުމަށްޓާކާ އެކަނި އުފައްދާ، ސީދާ ވަކިބަޔަކަށް އަމާޒުކޮށް، އަބުރު ކަތިލުމުގެ މަގުސަދުގައި ރަޖިސްކޮށްގެން ހިންގާ ނޫސްތަކަށް ވާއިރުވެ، ހޯމް މިނިސްޓްރީގައި ރަޖިސްޓްރީ ކޮށްފައިވާ މިފަދަ ނޫސްތައް އުވާލުމުގެ ފުރުސަތު ފަހިވެގެން ގޮސްފައިނުވާ ނުވުމަކީ ހަގީގަތުގައިވެސް ނޫސްވެރިކަމުގެ ދާއިރާއަށް އޮތް ބޮޑު ގޮންޖެހުމެއްގެ ގޮތުގައި މިފުރުސަތުގައި ފާހަގަ ކޮށްލާން ޖެހެއެވެ.

ޝުކުރު!

ޚަބަރު އޮންލައިގެ މެނޭޖުމަންޓުން ދެކޭ ގޮތުގައި، ޚަބަރާއި މައުލޫމާތު ތެދުވެރިކަމާއި ތާޒާކަމާއެކު، ވަގުތުން ވަގުތަށް އާންމު ރައްޔިތުންނާ ހަމައަށް ފޯރު ކޮށްދިނުމުގައި މި ނޫހަށް ދެމި އޮވެވުމުގެ ހަގީގީ ސިއްރަކީ، މި ނޫހުގެ ކިޔުންތެރިންނެވެ. އެއީ ޚަބަރު އޮންލައިންގެ އޯޑިއަންސެވެ. މިގޮތުން، މިނޫހުގެ ކިޔުންތެރިން، ފާއިތުވި ދެ އަަހަރު ދުވަހުގެ ތެރޭގައި، ވިދާޅުވެ ދެއްވި ބިނާކުރަނިވި ފާޑުކިއުންތަކަކީ، ހަގީގަތުގައިވެސް، މިނޫސް ދިރިދެމި އޮތުމުގެ ހަގިގީ ސިއްރުކަމުގައި ޚަބަރު އޮންލައިންގެ މެނޭޖްމަންޓުން ދެކެއެވެ.

އެކަމަށްޓަކާ، ހަޔާތުން އިތުރު އަހަރެއް ފަސްމަގަށް ޚަބަރު އޮންލައިން މިއަދު ދޫކޮށްލާއިރު، މިނޫހުގެ އެންމެހާ ކިޔުންތެރީންނަށް މެނޭޖްމަންޓުން ވަރަށް ޚާއްސަ ޝުކުރެއް އަރިސްކުރެއެވެ. ހަމަ އެފަދައިން، މި ނޫހުގެ އެންމެހާ ސްޕޮންސަރުނާއި، އަދި އެނޫން ގޮތްގޮތުންވެސް، ފާއިތުވެދިޔަ ދެއަހަރެއްހާ ދުވަހުގެ ތެރޭގައި، ނޫސްވެރިކަމުގެ ގަދަ ކަނޑުގައި، މި ނޫހުން ކުރި ދަތުރުގައި އެހީތެރިކަން އެކި ގޮތްގޮތުން ފޯރުކޮށްދެއްވި އެންމެހާ ފަރާތްތަކަށްވެސް ޚަބަރު އޮންލައިގެ މެނޭޖްމަންޓުން ހިފެހެއްޓުމެއްނެތް ޝުކުރު އަދާކުރެއެވެ.

ޚަބަރު އޮންލައިންގެ އަބަދުގެވެސް އަމާޒަކީ، އެންމެ ތާޒާ، ސާދާ ސީދާ މައުލޫމާތާއި ޚަބަރު، އެއްވެސް ފޮރުވުމެއްނެތި، ތެދުވެރިކަމާއެކު ވަގުތުން ވަގުތަށް ފޯރުކޮށްދެމުން ދިއުމެވެ.