އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އާއި އެސްޓަން ވިލާ ބައްދަލުކުރި މެޗު 1-1 އިން އެއްވަރުވެއްޖެއެވެ.
ފުރަތަމަ ހާފުގައި ދެޓީމަށް ވެސް ލަނޑެއް ޖެހިފައި ނުވާއިރު، ލީޑު ނެގީ ސިޓީ އިންނެވެ، ދެވަނަ ހާފު ފަށައިގެން ފަސްވަނަ މިނިޓުގައި ކެވިން ޑިބްރޭނާ ނަގައިދިން ހުރަހަކުން އެޓީމަށް ލީޑު ނަގައިދިނީ އާލިން ބްރައުޓް ހާލަންޑެވެ. މިއީ ހާލަންޑް ލީގުގައި ކުޅުު ހަ މެޗުން ކާމިޔާބުކުރި 10 ވަނަ ލަނޑެވެ. ހާލާންޑް ވަނީ ޕްރިމިއާ ލީގުގެ ސީޒަނެއްގައި ކުޅުނު ފުރަތަމަ ހަ މެޗުން 10 ލަނޑު ޖަހައި 1992 ވަނަ އަހަރު މިކީ ކުއިން ހަދާފައިވާ ރެކޯޑާ އެއްވަރުކޮށްފައެވެ.
އެސްޓަން ވިލާ އަށް އެއްވަރު ކޮށްދިނީ މެޗުގެ 74 ވަނަ މިނިޓުގައި ލިއޯން ބެއިލީއެވެ. މިއީ އެސްޓަން ވިލާގެ ޒުވާން މިޑްފީލްޑަރު، ޖޭކަބް ރަމްސީ އޭރިއާތެރެއަށް ބޯޅަ ހިފައިގެން ވަދެ، ހުރަސްކޮށްލި ބޯޅައެއް ގޯލުގެ މަތީ ކަނަށް ފޮނުވާލައިގެން ބެއިލީ ޖެހި ލަނޑެކެވެ.
ސިޓީ އެއްވަރުވުމުގެ ފައިދާ ނެގުމުގެ ފުރުސަތު އާސެނަލަށް އެބައޮތެވެ. އެ ގޮތުން އާސެނަލުން މާދަމާރޭ މެންޗެސްޓާ ޔުނައިޓެޑް ދަނޑުގައި މޮޅެއް ހޯދަައިފިނަމަ ލީގުގެ ކުރީގައި ހަތަރު ޕޮއިންޓަށް ލީޑުފުޅާ ކުރެވޭނެއެވެ. އާސެނަލް އެއް ވަނައިގައި އޮތީ ފަސް މެޗުން 15 ޕޮއިންޓް ހޯދައިގެންނެވެ. ދެ ވަނައިގައި އޮތް ސިޓީ އާއި ތިން ވަނައިގައި އޮތް ޓޮޓެންހަމް ހޮޓްސްޕާސް އަށް ވަނީ ހަ މެޗުން 14 ޕޮއިންޓް ލިބިފައެވެ.
