ކަންތައްތައް އިސްލާހު ކުރުމުގެ ނިޔަތުގައި ނަމަވެސް އެއްބަޔަކު އަނެއްބައެއްގެ އަބުރާއި، ޝަރަފު ނަގައި ލުމާއި، ސިއްރުތައް ހާމަކުރުމަކީ އޭގެ ސަބަބުން ބިމުގައި ފަސާދަ އުފެދިދާނެ ކަންތައްތަކެއް ކަމުގައި މިއަދުގެ ހުކުރު ޚުތުބާގައި ބުނެފިއެވެ.
"ސުލްހަވެރި މުޖްތަމައެއް ބިނާކުރުން" މި މައުލޫއަށް ހާއްސަކޮށްގެން މިއަދުން ދިން ހުތުބާގައި ބުނީ މިއީ އިގްތިސާދީ ހީނަރުކަމާއި، މަގާމާއި ނުފޫޒާއި ޖާހަތައްޓަކައި އެއް ބަޔަކު އަނެއް ބައެއްގެ މައްޗަށް ގަދަވެގަތުމަށް މަސައްކަތްކުރާ ދުވަސްވަރެއް ކަމަށެވެ.
ހުތުބާގައި ބުނި ގޮތުގައި އަރާރުން ވުމާއި، ދެކޮޅުވެރިކަމާއި، ދެބަސްވުމާއި، ގައުމީ ސަލާމަތާއި، އާއްމު މަސްލަހަތައްވުރެ އަމިއްލަ މަސްލަހަތު އިސްކުރުމާއި، އިސްލާމްދީނަށް ފުރައްސާރަ ކޮށް މަލާމާތް ކުރުމާއި، ދީނުގެ ނަމުގައި ހައްދުފަހަނަ އަޅައި ދިއުމާއި، އަނިޔާވެރި ވުމާއި ނުކިޔަވަމަންތެރިވުމުން އުފެދޭ ފިތުނަވެރިކަމުގެ ހިތި ނަތީޖާއެވެ. އޭގެ އިތުރުން އަމިއްލައަށް ނިޔާ ކަނޑައެޅުމާއި، މީހުންގެ ހައްގުތަކަށް އަރައިގަތުމުގެ ނުބައިކަމަށްވެސް މިއަދުގެ ހުތުބާގައި ވަނީ އަލިއަޅުވާލައިފަ އެވެ. ހުތުބާގއި ބުނި ގޮތުގައި މުސްލިމުންގެ މެދުގައި ކަންކަން ކުރުމަށް އަންގަވާފައިވަނީ ކަމުވޮށިގެންވާ މީހުންގެ މެދުގައި މަޝަވްރާ ކޮށްގެންނެވެ.
ކަންތައްތައް އިސްލާހު ކުރުމުގެ ނިޔަތުގައި ނަމަވެސް އެއްބަޔަކު އަނެއްބައެއްގެ އަބުރާއި، ޝަރަފު ނަގައި ލުމާއި، ސިއްރުތައް ހާމަކުރުމަކީ އޭގެ ސަބަބުން ބިމުގައި ފަސާދަ އުފެދިދާނެ ކަންކަން. މުޖުތަމައުގައި ފަސާދަ އާންމު ވެއްޖެނަމަ މާތް ރަސްކަލާންގެ އެބަޔަކަށް އުޤޫބާތް ދެއްވައެވެ.
– ޚުތުބާގައި ބުނެފައިވެއެވެ.
ހުކުރު ޚުތުބާގައި އިތުރަށް ބުނެފައިވަނީ ޤައުމެއްގައި އޮންނަ އެކުވެރިކަމާއި އުޚުވަތްތެރިކަމުގެ ފޭރާން ވީދި ޤައުމު ބައިބައިވެއްޖެނަމަ އެނބުރި ކުރީގެ ހާލަތަށް ސިއުމކީ އުނދަގޫ ކަމެއް ކަމަށެވެ. އަދި އެބައެއްގެ އަމިއްލަ މައްސަލަތައް ހައްލު ނުކުރާނަމަ އަޅުވެތިކަމުގެ ނިމުމެއްނެތް ވޭނާއި ކެކުޅުން ތަހައްމަލު ކުރަން ޖެހޭނެ ކަމަށް ވަނީ ބުނެފައެވެ.
މުސްލިމުންގެ މެދުގައި ކަންކަން ކުރަންވާނީ ކަންވޮށިގެންވާ މީހުންގެ މެދުގައި މަޝްވަރާ ކުރުމަށްފަހު ކަމަށް ޚުތުބާގައި ބުނެފައިވެއެވެ. ޚުތުބާގައި ބުނެފައިވަނީ ރައްޔިތުންނަށް ދިމާވާ މައްސަލަތައް ހައްލުކުރާނީ އެކަންކަމާ ހަވާލުވެގެން ތިބޭ މުއައްސަސާތަކުގެ ވެރިންގެ މެދުގައި މަޝްވަރާ ކޮށްގެން ކަމަށެވެ. ހައްލެއްގެ ގޮތުގައި އެއްބަޔަކު އަނެއް ބަޔަކަށް އަނިޔާކޮށް، ހުތުރު ބަހުން މުޚާތަބުކޮށް ސޯޝަލް މީޑިއާގައި ހަގީގަތާ ޚިލާފު ވާހަކަތައް ދައްކާނަމަ ހެދިބޮޑުވަމުން އަންނަ ޒުވާން ޖީލުތަކަށް އެ ދެއްކެވެނީ ހުތުރު ނަމުނާއެއްކަން ޚުތުބާގައި ވަނީ ފާހަގަކޮށްފައެވެ.
ބައެއް ފަރާތްތަކުން އެކިއެކި ކުށްކުރާ މީހުންނަށް އަނިޔާކުރާ މަންޒަރު މަދުން ނަމަވެސް މުޖްތަމައުން ފެންނަކަމީ ހިތާމަހުރި ކަމެކެވެ. ކުށްކުރާ ފަރާތްތައް އިންސާފުގެ ކުރިމައްޗަށް ގެނައުމާއި، އަދަބު ދިނުމަކީ ކަމާބެހޭ ފަރާތްތަކުގެ ޒިންމާއެކެވެ.
– ޚުތުބާގައި ބުނެފައިވެއެވެ.
އިސްވެދިޔަ އުންމަތްތަކުގެ ވާހަކަ ކީރިތިގުރުއާނުގައި އައިސްފައިވަނީ އެ ގައުމުތަކަށް ކުރިމަތިވި ހާދިސާތަކުން އަހަރެމެން އިބުރަތް ލިބިގަތުމަށް ކަން ހުތުބާގައި ވަނީ ހަނދާންކޮށްދީފަ އެވެ. އެއީ މާތް ރަސްކަލާންގެ ގެ އަމުރުފުޅުތަކަށް ފުރަގަސްދީ، އިސްލާމްދީނަށް ފުރައްސާރަކޮށް، މަލާމާތްކުރާ މީހުންނާއި، އިސްލާމީ ޝަރީއަތް ގާއިމްކުރުމުގެ ނަމުގައި، އަމިއްލައަށް ނިޔާ ކަނޑައަޅައި އަނިޔާކޮށް މީހުން ގަތުލުކުރުން ފަދަ ބޮޑެތި ޖަރީމާތައް ހިންގާ މީހުންނާއި، މީހުންގެ ހައްގުތަކަށް އަރައިގަންނަ މީހުންނަށް ފިލާވަޅަކަށެވެ.
