މި ސީޒަނުގެ އިނގިރޭސި ޕްރިމިއާ ލީގަށް އަލަށް ޕްރޮމޯޓްވި ބޯންމަތުގެ ކޯޗުގެ މަގާމުން ސްކޮޓް ޕާކާ ވަކިކޮށްފިއެވެ.
އޭނާ މަގާމުން ވަކިކޮށްފައި ވަނީ އެންމެ ފަހުން ކުޅުނު މެޗުގައި ލިވަޕޫލް އަތުން 9-0 ގެ ތަފާތު ބޮޑު ނަތީޖާއަކުން ބަލިވުމުންނެވެ. ސީޒަންގެ ފުރަތަމަ މެޗުން މޮޅުވި ނަމަވެސް ޖެހިގެން އައި ތިން މެޗުންވެސް ބޯންމޯތުވަނީ ތަފާތު ބޮޑުކޮށް ބަލިވެފައެވެ. ނަމަވެސް ގިނަ ބަޔަކު ގަބޫލް ކުރާގޮތުގައި ޕާކަރ މަގާމުން ވަކިކޮށްފައިވަނީ އެމެޗުން ބޮޑު ތަފާތަކުން ބަލިވުމުގެ ބަދަލުގައި މެޗަށްފަހު އޭނާ މެޗާއި ބެހޭގޮތުން ކުރި ކޮމެންތްތަކުގެ ސަބަބުންނެވެ. މެޗަށްފަހު ވާހަކަ ދައްކަމުން ޕާކަރވަނީ މެޗުން ބަލިވީތީ ހައިރާން ނުވާކަމަށާއި މިފެންވަރުގެ މެޗްތައް ކުޅުމަށް އޭނާގެ ތީމް ތައްޔާރުވެފައިނުވާކަމަށެވެ.
ސްކޮޓް ޕާކާ މަގާމުން ވަކިކުރިކަން ހާމަކުރަމުން ކްލަބްގެ ވެރިޔާ މެކްސިމް ޑެމިން ހާމަކުރިގޮތުގައި މިޓީމް ޓީމެއްގެ ގޮތުގައި އަދި ކްލަބް ކުރިއަށް ދާން ބޭނުންވާކަމުގައިވާނަމަ އެންމެން އެއްގަލަކަށް އަރާ އެކައްޗެއް ކިޔަންޖެހޭ ކަމަށެވެ. އަދި ކުރިއަށް ދިއުމުގައި އުންމީދު އާކޮށް އެކަކު އަނެކަކަށް އޮންނަ އިހްތިރާމް ބަހައްޓަންޖެހޭ ކަމަށެވެ. އަދި މިކްލަބް މިހާހިސާބަށް މިއާދެވިފައިމިވަނީ އެގޮތުގައި މިހާތަނަށް އެންމެން މަސައްކަތް ކޮށްގެން ކަމަށާއި އަދި އާކޯޗެއް ހޮޗުމުގެ މަސައްކަތް ވަގުތުން ފަށާފައިވާކަމަށެވެ. މައުލޫމާތުލިބޭގޮތުގައި އެޓީމާއި ވަގުތީގޮތުން ހަވާލުވާނީ ގެރީ އޯނީލް ކަމަށާއި އޭނާއަށް އެހީތެރިވެދިނުމުގައި ޝޯން ކޫޕަރ އާއި ޓެމީ އެލްފިކް މަސައްކަތް ކުރާނެކަމަށެވެ.
ޕާކާ ބޯންމޯތާއި ހަވާލުވެފައިވަނީ 2021 ވަނަ އަހަރުގެ ސީޒަނާއެކުއެވެ. އަދި އެއާއެކު އޭނާ ވަނީ އެޓީމް ޕްރިމިއަރ ލީގަށް ޕްރޮމޯޓް ކޮށްދީފައެވެ. ނަމަވެސް އާސީޒަން ފެށުނުތަ 25 ދުވަސް ތެރޭ އޭނާ މިވަނީ މަގާމުން ވަކިކޮށްފައެވެ. އަދި މިވެފައިވަނީ އަލަށް ޕްރޮމޯޓްވި ކޯޗަކު މިހާއަވަހަށް ވަކިކުރި ފުރަތަމަ ފަހަރަށެވެ. އަދި މިއީ ވޭތުވެދިޔަ 18 އަހަރުގެ ތެރޭގައި އޮގަސްޓް މަހުގެ ތެރެގައި ކޯޗްކަމުން ވަކިކުރި ފުރަތަމަ ކޯޗްވެސްމެއެވެ. އެންމެފަހުން އޮގަސްޓް މަހު ޕްރިމިއަރ ލީގުގެ ކޯޗެއް މަގާމުން ވަކިކޮށްފައިވަނީ 2004 ވަނަ އަހަރު ނިއުކާސްލް ޔުނައިޓެޑްގެ ކޯޗްކަމުން ބޮބީ ރޮބްސަންއެވެ.
