ކުރިއަށް އޮތްތަނުގައިވެސް އެމްޑީޕީގެ އެތެރޭގެ ޚިޔާލުތަފާތުވުންތައް އެއްގޮތްކޮށް ނަތީޖާ ނެރެވޭނެކަމަށް އެމްޑީޕީގެ ޗެއަރޕާސަން އަލްއުސްތާޒް ފައްޔާޟް އިސްމާޢީލް ވިދާޅުވެއްޖެއެވެ.
އެމްޑީޕީގެ 4 ވަނަ ކޮންގްރެސް އިއްޔެ ނިންމާލައްވާ ޥާހަކަފުޅު ދައްކަވަމުން ފައްޔާޟް މިހެން ވިދާޅުވީ ބަރުލަމާނީ ނިޒާމާއި ގުޅޭގޮތުން އެމްޑީޕީ ކޮންގްރެސްއަށް ހުށައެޅި ޤަރާރާއި ގުޅިގެން އެޕާޓީގެ ތެރޭގައި ޚިޔާލު ތަފާތުވުންތައް އުފެދިފައިވަނިކޮށް، ރައީސް ޞާލިޙްގެ އެދިވަޑައިގަތުމަށް ރައީސް ނަޝީދު އެ ޤަރާރު ކުރިއަށް ނުގެންދިއުމަށް ނިންމެވި ނިންމެވުމަށް އިޝާރާތްކުރައްވައެވެ.
އެމްޑީޕީގެ ކޮންގްރެސް ފެށުނުއިރު އޮތް އެންމެ ބޮޑު ޚިޔާލު ތަފާތުވުމަކީވެސް ރައީސް ނަޝީދު ހުށައެޅުއްވި ބަރުލަމާނީ ގަރާރެވެ. ފައްޔާޟް ވިދާޅުވީ، އެޕާޓީއަކީ ވަރުގަދަ ޕާޓީއެއް އަދި ބޮޑު ޕާޓީއެއްކަމަށާއި، ތަސައްރަފު ފުދިފައިވާ ޕާޓިއެއްކަަން އަނެއްކާވެސް ދައްކައިދީފައިވާކަމަށެވެ. ރިޔަށް އޮތް ތަނުގައި ވެސް ބޮޑެތި ހިޔާލު ތަފާތުވުންތައް އަންނާނެ ކަމަށާއި ނަމަވެސް އެ ހިޔާލު ތަފާތުވުންތަކުގެ ތެރެއިން ވެސް ނަތީޖާ ހޯދާނެކަމަށްވެސް ފައްޔާޟް ވިދާޅުވިއެވެ.
އަޅުގަނޑުމެންގެ ތެރޭގައި އުފެދޭ ދެބަސްވުންތައް އެއްބަސް ކުރުވައި އެއްގޮތް ކުރުވައި އެއް ގޮތަކަށް ކުރިޔަށް ދިޔުމަށްޓަކައި ކުރަން ޖެހުނު ހުރިހާ ކަމެއްގައި އެއްވެސް ހުރަހެއް ނެތި މަސައްކަތް ކުރާނަން އަދި އެއްވެސް ޝައްކެއް ނެތި އެކަން ކުރެވޭނެ..
– ކޮންގްރެސް ނިންމަވާލައްވަމުން ފައްޔާޟް ވިދާޅުވިއެވެ.
އެމްޑީޕީގެ ކޮންގްރެސްއަށް ރައީސް ނަޝީދު ހުށައެޅުއްވި ބަރުލަމާނީ ގަރާރު ކުރިއަށް ނުގެންދިއުމަށް ނިންމެވީ ރައީސް ޞާލިޙާއެކު މަޝްވަރާކުރެއްވުމަށްފަހު ރައީސް ނަޝީދު ވިދާޅުވިއެވެ. ނަމަވެސް އެ ގަރާރު އެޕާޓީގައި އޮންނާނެކަމަށާއި، އެއަށް ކުރިއަށް އޮތްތަނުގައި މަޝޤވަރާކުރެވޭނެކަމަށްވެސް ރައީސް ނަޝީދު ވިދާޅުވިއެވެ.
އެމްޑީޕީގެ ކޮންގްރެސް ފެށުމުގެ ކުރިންވެސް ރައީސް ޞާލިޙް ވަނީ އެ ގަރާރު އަނބުރާ ގެންދިއުމަށް ރައީސް ނަޝީދަށް ގޮވާލައްވާފައެވެ.
