އެމްޑީޕީގެ ގޮފިތަކުގެ ރައީސުންނާ، ކުރިޔަށް އޮތް ކޮންގްރެސްގެ ކުރިން ގުޅުއްވަމުން ގެންދަވާ ކަމަށާއި، އަދި މިގޮތުން ގުޅުއްވަމުން ގެންދަވާއިރު، ވަރަށް ދެރަ ކަންކަމާ ދިމާވަމުންދާ ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅު ވެއްޖެއެވެ.
ރޭ ބޭއްވުނު ހަރުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވި ގޮތުގައ،ި ގުޅުއްވަމުން ގެންދަވަނީ އެބޭފުޅުންނަކީ ގޮފިތަކުގެ ރައީސުންނަށް ވާތީ ކަމަށާއި، ގޮތްޕެއްގެ ރައީސަކަށް ވެވެނީ ގޮތްޕެއްގެ މެމްބަރުން އޭނާ ރައީސަކަށް ހެދީމަ ކަމުގައެވެ.
މިސާލަކަށް އިހަވަންދޫ ގޮތްޕެއްގެ ރައީސަކަށް ހުންނެވި ހާމިދު ޝަފީއު، އެބޭފުޅާއަކީ ރައީސް އޮފީހުގެ ކޮންމެވެސް މަގާމެއް އަދާކުރައްވާ ބޭފުޅެއް… ދެން އެހެންނަމަވެސް މި ބޭފުޅާ ގޮތްޕެއްގެ ރައީސަކަށް ހެދުމަށް ވޯޓުދިން ބޭފުޅެއް އިހަވަންދޫއަކުން އަދި އެހެން ތަނަކުންވެސް ނުފެނޭ. މިދެންނެވިގޮތަށް ހުރި ގޮފިތަކުން، ޚާއްސަކޮށް، ގޮފީގެ ރައީސުން ކޮންގްރެސްއަށް ވަޑައިގެން ވޯޓު ދެއްވައިގެން ނުވާނެ.
އެމްޑީޕީގެ މަދު އާންމު މެމްބަރުން ކޮޅަކާއެކު ރޭގެ ބޭއްވި ހަރުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވިއެވެ.
ނަޝީދު ވިދާޅުވީ، އިންތޚާބު ވެފައިތިބި ކަންސިލަރުންވެސް އެބަތިބި ކަމަށާއި، އަދި އޭގެ އިތުރުން ގައުމީ މަޖިލިސްވެސް، ރައްޔިތުންގެ މަޖިލިސްވެސް، ދާއިރާ މަޖިލިސްވެސް އޮތީ އިންތިޚާބު ވެފައިކަމަށާއި، އެހެންނަމަވެސް ގޮފިތަކުން އިންތިޚާބު ނުވެ ރައީސުންގެ ގޮތުގައި ވަޑައިގެން އެމްޑީޕީގެ ކޮންގްރެސްގެ ނިންމުމެއްގައި ބައިވެރިވެ ވަޑައިގެންނަވައިގެން ނުވާނެ ކަމުގައެވެ.
ނަޝީދު ވިދާޅުވީ އެމްޑީޕީގެ ޗެއަރޕާރސަންވެސް އަދި ކޮންގްރެސްގެ ރައީސްވެސް އެކަމަށް ފުރުސަތެއް ދެއްވާނެކަމަށް ދެކެވަޑައި ނުގަންނަވާނެ ކަމުގައެވެ.
ސައްހަ ގޮތުގައި އިންތިޚާބުވެފައި ނެތް ގޮފިތަކުގެ ރައީސުންނަށް ކޮންގްރެސްގައި ބައިވެރި ނުވެވޭނެކަމަށް ނަޝީދު ވިދާޅުވެފައިވާއިރު، ކޮންގްރެސްގެ ގާނޫނީ ހައިސިއްޔަތާމެދު ސުވާލު އުފެދިދާނެތީ މާދަމާ ފެށުމަށް ހަމަޖެހިފައިވާ ކޮންގްރެސް ފަސްކޮށްދިނުމަށް އެދި އެމްޑީޕީގެ ޕާލަމެންޓްރީ ގުރޫޕްގެ މެމްބަރު އަލީ އާޒިމްވަނީ ޗެއަރޕާރސަން ފައްޔާޒު އިސްމާއިލްއަށް ސިޓީއެއް ފޮނުވާފައެވެ.
ކޮންގްރެސް ފަސްކޮށްދިނުމަށް އޭނާ އެދިފައިވަނީ، މާދަމާ ފެށުމަށް ހަމަޖެހިފައިވާ ޕާޓީގެ ކޮންގްރެސްއަށް ގޮފިތަކުން ނޮމިނޭޓް ކޮށްފައިވާ ގިނަ މަންދޫބުންނަކީ ގޮފި ގަވާއިދާ އެއްގޮތަށް އިންތިޚާބު ވެފައިވާ ފަރާތްތަކެއް ނޫންކަމަށާއި، އަދި ގޮފިތަކުން ކޮންގްރެސްގައި ތަމްސީލުކުރާ ފަރާތްތަކުގެ މައުލޫމާތު މިއަދާއި ހަމައަށްވެސް ހިއްސާ ކޮށްފައި ނުވާތީ އެފަރާތްތައް ކޮންގްރެސްގައި ބައިވެރި ވެއްޖެނަމަ، ކޮންގްރެސްގެ ގާނޫނީ ހައިސިއްޔަތާމެދު ސުވާލު އުފެއްދުމަށް ޖާގަ ދެވިގެންދާނެކަމަށް ކަމަށް ވިދާޅުވެއެވެ.
އެހެންނަމަވެސް، އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެފައިވަނީ މާދަމާ ފެށުމަށް ނިންމާފައިވާ އެމްޑީޕީ ކޮންގްރެސް ފަސްކުރަންޖެހޭ އެއްވެސް ސަބަބެއް ނެތްކަމުގައެވެ.
އެމްޑީޕީ ކޮންގްރެސްއަށް ރަށްރަށުން މާލެ އައި ގްރޫޕްތަކަށް މަރުހަބާ ދެންނެވުމަށްފަހު މީޑިއާއާއި ވާހަކަފުޅު ދައްކަވަމުން ފައްޔާޟް ވިދާޅުވީ، ކޮންގްރެސް ފަސްކުރުމުގެ ބާރު ޗެއާޕާސަނަށް ނޯންނާނެ ކަމަށާއި، އެއީ އެމްޑީޕީގެ ގައުމީ މަޖިލީހަށް އޮންނަ ބާރެއް ކަމަށެވެ.
ކުރިޔަށް އޮތް އެމްޑީޕީގެ ކޮންގްރެސްގައި ރާއްޖޭގެ ވެރިކަންކުރާ ނިޒާމް ބަރުލަމާނީ ނިޒާމަކަށް ބަދަލު ކުރުމަށް ގަރާރެއް ކޮންގްރެސްއަށް ހުށަހަޅުއްވާ، އެގަރާރަށް ތާއީދު ހޯދުމަށް ނަޝީދު ގެންދަވަނީ މަސައްކަތް ކުރައްވަމުންނެވެ. އެހެންނަމަވެސް، ރައީސް ސާލިހުގެ އިތުރުން، އެމްޑީޕީގެ ގިނަ އިސް ބޭފުޅުން ވަނީ މި ގަރާރަށް ތާއީދު ނުކުރައްވާނޭކަން ހާމަ ކުރައްވާފައެވެ.
