މާދަމާ ފެށުމަށް ނިންމާފައިވާ އެމްޑީޕީ ކޮންގްރެސް ފަސްކުރަންޖެހޭ އެއްވެސް ސަބަބެއް ނެތްކަމަށް އެމްޑީޕީގެ ޗެއަރޕާސަން އަދި އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވެއްޖެއެވެ. ފައްޔާޟް މިހެން ވިދާޅުވީ ކޮންގްރެސް ފަސްކުރުމަށް މެދު ހެންވޭރު ދާއިރާގެ މެންބަރު އަލީ އާޒިމް ހުށައެޅުއްވުމާއި ގުޅިގެންނެވެ.
އެމްޑީޕީ ކޮންގްރެސްއަށް ރަށްރަށުން މާލެ އައި ގްރޫޕްތަކަށް މަރުހަބާ ދެންނެވުމަށްފަހު މީޑިއާއާއި ވާހަކަފުޅު ދައްކަވަމުން ފައްޔާޟް ވިދާޅުވީ، ކޮންގްރެސް ފަސްކުރުމުގެ ބާރު ޗެއާޕާސަނަށް ނޯންނާނެ ކަމަށާއި، އެއީ އެމްޑީޕީގެ ގައުމީ މަޖިލީހަށް އޮންނަ ބާރެއް ކަމަށެވެ.
ވަކި އެއްޗެއް ފާސް ވެދާނެތީ ނުވަތަ ނުވެދާނެތީ ކޮންގްރެސް ފަސްކުރަން ޖެހޭކަމަށް ވަންޏާވެސް، އެ ގައުމީ މަޖިލީހުން ފާސްކުރީމަ އަޅުގަނޑުމެން ލަސްކުރާނަން..
– ފައްޔާޟް ވިދާޅުވިއެވެ.
ފައްޔާޟް ވިދާޅުވީ، މިފަހަރުގެ ކޮންގްރެސްއަކީ ކުރީގެ ކޮންގްރެސްތަކާއި ޚިލާފަށް މާ ޓްރާންސްޕޭރެންޓުކޮށް ކުރިއަށްދާނެ ކޮންގްރެސްއަކަށް ވާނެކަމަށެވެ.
ފައްޔާޟް މިހެން ވިދާޅުވެފައިވާއިރު، އެމްޑީޕީ ކޮންގްރެސް ފަސްކުރުމަށް ފައްޔާޟް އިސްމާއިލްއަށް ޢާޒިމް ފޮނުއްވި ސިޓީގައި ވަނީ، ޕާޓީގެ އެންމެ އިސްގުނަންގެ ގޮތުގައި އަސާސީ ގަވާއިދުގައި ކަނޑައަޅާފައިވާ ކޮންގްރެސްގައި ގޮފިތަކުގެ ރައީސުންނަށް ބައިވެރިވެ ވޯޓު ދިނުމުގެ ފުރުސަތު ދީފައި އޮންނަކަމަށް ވިދާޅުވެފައެވެ. އަދި ގޮފިތަކުގެ ހިންގާ ކޮމިޓީ އެކުލަވާލަން ޖެހެނީ ގޮފި ގަވައިދުގައި ކަނޑައަޅާފައިވާ ހަމަތަކާއި އުސޫލްތަކުގެ ތެރެއިން އިންތިހާބެއް ބޭއްވުމަށް ފަހު ކަމަށާއި، ކޮންގްރެސްގައި ބައިވެރިވާ ގޮފީގެ ރައީސާއި ނައިބު ރައީސްވާން ޖެހޭނީ އެ އުސޫލުން އިންތިހާބުވެފައިވާ ފަރާތަކަށް ކަމަށް އާޒިމް ވިދާޅުވިއެވެ. މާދަމާ ފެށުމަށް ހަމަޖެހިފައިވާ ކޮންގްރެސްއަށް ގޮފިތަކުން ނޮމިނޭޓްކޮށްފައިވާ ގިނަ މަންދޫބުން އިންތިހާބުކޮށްފައި ވަނީ ގަވާއިދާ އެއްގޮތަށް ނޫން ކަމަށްވެސް އާޒިމް ވިދާޅުވިއެވެ.
ގާނޫނީ ގޮތުން އުފެދިފައި އޮތް ސުވާލަށް ޖަވާބެއް ހޯދާފައި ނޫނީ ކޮންގްރެސް ކުރިއަށް ނުގެންދިއުމަށް އާޒިމް އެދިވަޑައިގެންފައިވެއެވެ. 1،200 އަށް ވުރެ ގިނަ މީހުން ބައިވެރިވާ ކޮންގްރެސް އޮންނާނީ މާދަމާ ސޯޝަލް ސެންޓަރުގައެވެ. ކޮންގްރެސްއަށް ގިނަކަންތައްތަކެއް ހުށައެޅިގެންދާނެއެވެ. އަދި ތާޢީދު ހޯދުމަށް ވޯޓަށް އަހާނެއެވެ.
