ބާކީވާން ދިމާވީ ހައްދެއް ނެތްމިންވަރަށް ދީނުގެ އަސާސްތަކަށްް ހައްދެއް ނެތްމިންވަރަށް ފުށުއަރާގޮތަށް އަމަލުކުރުމުންކަމަށް ވިދާޅުވެ ދީނީ ޢިލްމުވެރިޔާ ޝައިޚް ޒައިދު، އެމްޑީޕީގެ ރައީސް އަދި މަޖިލީހުގެ ރައީސް މުޙައްމަދު ނަޝީދަށް ފާޑުވިދާޅުވެއްޖެއެވެ.
ޒައިދު މިހެން ވިދާޅުވީ ރައީސް ނަޝީދު ބަރުލަމާނީއަށް ތާއީދު ހޯއްދެވުމަށް ކުރިއަށް ގެންދެވާ ހަރުގެ ސިލްސިލާ ޖަލްސާއަށް ރޭ ހަރުގެއަށް ވަޑައިގަތްއިރު އެއްވެސް މީހެއްނެތި ޖަގަހަ ހުސްކޮށް ހުރުމުންނެވެ. މިއާއެކު ގިނަބަޔަކު ވަނީ ރައީސް ނަޝީދު އެމްޑީޕީން ބާކީކޮށްލިކަމަށް ބުނަމުންނެވެ.
މިކަމާއި ގުޅިގެން ޝައިޚް ޒައިދު ވިދާޅުވީ، ރައީސް ނަޝީދު ބާކީވާން ދިމާވީ ދީނުގެ އަސާސްތަކާއި ފުށުއަރާގޮތަށް ބަހާ ޢަމަލުތައް ބަހައްޓައި އަމިއްލަ އެދުން ހައްދެއްނެތް މިންވަރަށް އިސްކުރާތީކަމަށެވެ. އަދި ދޮގު ހެދުމުގައި، ވަކި ލިމިޓެއް ނުގެންގުޅޭތީއާއި، ހަތްފަހަރު ހަތް ގޮތަށް ވާހަކަ ބަދަލުކުރާތީ ބާކީވީކަމަށް ޒައިދު ވިދާޅުވިއެވެ. ޒައިދު ވަނީ ޖުހާވެސް ނުކުރާކަހަލަ ކަންކަން ރައީށް ނަޝީދު ކުރައްވާތީ ބާކީކުރީކަމަށާއި، ކަނުލޯބިން ހޭލެވިއްޖެކަމަށްވެސް ވިދާޅުވެ ފާޑުވިދާޅުވެފައެވެ.
ބާކީވާން ދިމާވީ ދީނުގެ އަސާސްތަކާއި ފުށުއަރާގޮތަށް ބަހާ ޢަމަލުތައް ބަހައްޓައި އަމިއްލަ އެދުން ހައްދެއްނެތް މިންވަރަށް އިސްކުރާތީ! ދޮގު ހެދުމުގައި، ވަކި ލިމިޓެއް ނުގެންގުޅޭތީ! ހަތްފަހަރު ހަތް ގޮތަށް ވާހަކަ ބަދަލުކުރާތީ! ޖުހާވެސް ނުކުރާކަހަލަ ކަންކަން ކުރާތީ! ކަނުލޯބިން ހޭލެވިއްޖެ!
— Ali Zaid (@alizaid1000) August 18, 2022
އެމްޑީޕީގެ ކޮންގްރެސްއަށް ހުށަހަޅާފައިވާ ބަރުލަމާނީ ގަރާރަށް ތާއީދު ހޯއްދެވުމަށް އެމްޑީޕީގެ ރައީސް މުހައްމަދު ނަޝީދު މިހާރު ކުރިޔަށް ގެންދަވާ ހަރުގެ ޖަލްސާތަކަށް ހާޒިރުވާ އެޕާޓީގެ މެމްބަރުންގެ އަދަދު އާދަޔައި ޚިލާފަށް މަދުވުމާއި ގުޅިގެން ގިނަ ބަޔަކު އެކަން ސޯޝަލް މީޑިއާގައި ފާހަގަ ކުރާން ވަނީ ފަށާފައެވެ.
ބަރުލަމާނީ ނިޒާމަކަށް ތާއީދު ހޯއްދެވުުމަށް މިހާރު ނަޝީދު ކޮންމެރެއަކު ބާއްވަން ފަށާފައިވާ ހަރުގެ ޖަލްސާތަކުގައި ބަރުލަމާނީ ނިޒާމުގެ ފައިދާތަކާއި ގުޅެގޮތުން ގިނަ މައުލޫމާތުތަކެއް ދެއްވަމުން ގެންދަވާއިރު، ރޭގެ ޖަލްސާ ވެގެން ދިޔައީ އާދަޔާ ޚިލާފަށް މަދުން މީހުން ހަރުގެއައް ހާޒިރުވި ރެއަކަށެވެ.
އަދި ރޭ ނަޝީދު އެންމެ ފުރަތަމަ ހަރުގެއައަށް ވަޑައިގެންނެވިއިރު، މުޅި ހަރުގެ އޮތީ ހުސްކޮށްކަން ފާހަގަ ކޮށްލެވުނެވެ. އެއަށްފަހު ހަރުގޭގެ ކުރިމައްޗަށް މަގަށް ނިކުމެވަޑައިގެން މީހުންނާ ވާހަކަ ދައްކަވަން ކުޑަ އިރުކޮޅަކު ހުންނެވުމަށްފަހުވެސް ހަރުގެއަށް ހާޒިރުވެ ތިބި މީހުންގެ އަދަަދު މަދު ވުމުގެ ސަބަބަކުން ޖަލްސާ ފެށިފައިވަނީވެސް އިތުރަކެއް ފަހުންނެވެ. އަދި ފެށިގެން ކުރިޔަށްދިޔަ ޖަލްސާގައި ހާޒިރުވެތިބީވެސް ޕާޓީގެ އާދަޔާ ޚިލާފު މަދު އާންމު މެމްބަރުން ކޮޅެކެވެ.
ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ނަޝީދު ކުރައްވަމުން ގެންދަވާ މަސައްކަތުގައި އެމްޑީޕީގެ އިސް ފަރާތްތަކުންވެސް ގެންދަވަނީ އެ ވިސްނުމަށް ތާއީދު ނުކުރާކަން ހާމަ ކުރަމުންނެވެ. އޭގެތެރޭގައި ރައީސް ސާލިހުގެ އިތުރުން ކެބިނެޓްގެ ގިނަ ވަޒީރުންނާއި އިސް އެހެން ގިނަ ފަރާތްތައްވެސް ހިމެނެއެވެ.
