ރާއްޖޭގެ ސިޔާސީ މަސްރަހުގައި އަދާލަތު ޕާޓީއަށް ފުރުޞަތު އެންމެ ފަހިވާނީ ބަރުލަމާނީ ނިޒާމެއްގައިކަމަށް ވިދާޅުވެ އަދާލަތު ޕާޓިގެ ރައީސް އަދި ހޯމް މިނިސްޓަރ ޢިމްރާން ޢަބްދުﷲ، އެމްޑީޕީގެ ރައީސް މުޙައްމަދު ނަޝީދަށް ރައްދު ދެއްވައިފިއެވެ.
ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކުރުމަށް ރައީސް ނަޝީދު އެމްޑީޕީ ކޮންގްރެސްއަށް ހުށައަޅަން ނިންމާފައިވާއިރު، އެމަނިކުފާނު ވަނީ މިހާރު ސަރުކާރުގައި ހިމެނޭ ބައެއް ޕާޓިތަކަކީ މަޖިލީހާއި އެނޫންވެސް ގޮތްގޮތުން މާ ބޮޑު ކާމިޔާބު ޕާޓީއަކަށް ނުވިނަމަވެސް ސަރުކާރުގައި ފުރުޞަތު ލިބޭކަމަށެވެ. އެއީ އެންމެ ރަނގަޅު ގޮތް ނޫންކަމަށާއި، ނަމަވެސް ބަރުލަމާނީ ނިޒާމެއްގައި ސަރުކާރުގައި ފުރުޞަތު ލިބޭނީ ޤާނޫނީ މަޖިލީހުން ގޮނޑި ކާމިޔާބު ކުރެވޭ ޕާޓީތަކަށްކަމަށްވެސް ރައީސް ނަޝީދު ވިދާޅުވިއެވެ.
ނަމަވެސް އަދާލަތު ޕާޓީގެ ރައީސް ޝައިޚް ޢިމްރާން ވިދާޅުވީ ރާއްޖޭގެ ސިޔާސީ މަސްރަހުގައި އަދާލަތު ޕާޓީއަށް ފުރުޞަތު އެންމެ ފަހުވާނީ ބަރުލަމާނީ ނިޒާމެއްގައިކަމށެވެ. ނަމަވެސް ޤައުމީ މަސްލަހަތަށްވުރެ ޕާޓީގެ މަސްލަހަތު އިސްކުރާކަމަށް އަދާލަތު ޕާޓީގެ މެންބަރުން އެއްގޮތަކަށްވެސް ނުރުހޭކަން އެމަނިކުފާނަށް ޔަޤީންކަމަށްވެސް އިމްރާން ވިދާޅުވިއެވެ.
Raajjeyge siyasee masrahugai AP ah furusathu enme fahivaanee barulamanee nizaamehgai. Namaves qaumee maslahathahvure party ge maslahathu iskuraakah AP ge memberun ehgothakahves nuruheynekan alhugadah yageen.
— Imran Abdulla (@ShimranAb) August 16, 2022
ބަރުލަމާނީ ނިޒާމަށް ތަޢީދުކުރާކްނ މިހާތަނަށް ހާމަކޮށްފައިވާ ސިޔާސީ ލީޑަރަކީ ރައީސް ނަޝީދު އެކަންޏެވެ. ދެން ތިއްބެވި ސިޔާސީ ލީޑަރުން ތާޢީދުކުރައްވަނީ ރިޔާސީ ނިޒާމަށެވެ. ބަރުލަމާނީ ނިޒާމަކަށް ތާއީދުކޮށް އެމްޑީޕީގެ ރައީސް ނަޝީދު އެޕާޓިގެ ކޮންގްރެސްއަށް ހުށައެޅި އިޞްލާހު ނެންގެވުމަށް ރައީސް ޞާލިޙް ވެސް ވަނީ ގޮވާލައްވާފައެވެ.
ރައީސް ސާލިހު ވިދާޅުވީ ބަރުލަމާނީ ނިޒާމަށް ދިއުމަށް އެމްޑީޕީގެ ކޮންގްރެސްއަށް ރައީސް ނަޝީދު ހުށަހަޅުއްވާފައިވާ ގަރާރު ފާސްވާނެކަމަށް ގަބޫލުފުޅު ނުކުރައްވާ ކަމަށެވެ. އަދި އެ ގަރާރު ޕާޓީގެ ތެރެއިން ފާސްވެއްޖެނަމަ އެކަމާއި ގުޅޭގޮތުން ގާނޫނުއަސާސީއަށް ބަދަލު ގެނައުމަށް މަޖިލީހަށް އެ މައްސަލަ ވައްދާ ބަހުސް ކުރަންޖެހޭނެކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިވަގުތަށް ރާއްޖެއަށް މުހިންމީ، ގައުމަށް ދިމާވެފައިވާ މައްސަލަތައް ހައްލު ކުރުން ކަމަށާއި، މިވަގުތަކީ ނިޒާމު ކަނޑައެޅުމަށް މަސައްކަތް ކުރައްވަންވީ ވަގުތު ނޫން ކަމަށެވެ.
ރައީސް ސާލިހު ވިދާޅުވީ އަދި ރާއްޖެއަށް ބަރުލަމާނީ ނިޒާމެއް ގެނައުމަށްވުރެ އަދި އޮތީ މާ ޅަފަތުގައި ކަމަށެވެ. އަދި ނިޒާމާއި ގުޅޭގޮތުން ރައްޔިތުން ކައިރިއަށް ގޮސް މިކަމުގައި ވާހަކަދައްކާ، ރައްޔިތުންނަށް ނިޒާމު އޮޅުންފިލުވައިދީ، މިކަމާއި ގުޅޭގޮތުން ބަހުސް ކުރެވި، ރާއްޖެއަށް ބަރުލަމާނީ ނިޒާމް ގެނައުމަށް އޭގެ ފަހުން މަސައްކަތް ކުރެއްވިދާނެކަމަށް ރައީސް ވިދާޅުވިއެވެ.
ރައީސް ވިދާލުވީ އެމަނިކުފާނަށް ގަބޫލުކުރެއްވެނީ މިހާރު އޮންނަ ގޮތަށް ރައްޔިތުންގެ ސީދާ ވޯޓަކުން، ރައްޔިތުންގެ ފުރިހަމަ އަގުބަލިއްޔަތަކުން ހޮވޭ ރައީސަކާއެކު އެކުލެވޭ ސަރުކާރަކަށް ހިންގުމުގެ ބާރު އޮތުން ކަމަށެވެ. އަދި ދެވަނަ ކަމަކަށް ރައްޔިތުން އިންތިހާބުކުރާ މަންދޫބުންގެ މައްޗަށް އެކުލެވޭ ރައްޔިތުންގެ މަޖިލީހަކުން ގާނޫނު ހެދުމުގެ ބާރު އޮވެފައި މިނިވަންކަމާއެކީގައި ޝަރީއަތްކުރެވޭ ގޮތަށް ޖުޑިޝަރީ އޮތުމާއި، ތިންބާރު ވަކިކުރެވިފައި އޮތް މިފަދަ ނިޒާމެއް އެއީ އެމަނިކުފާނު ގަބޫލުކުރައްވާ ނިޒާމް ކަމަށް ރައީސް ވިދާޅުވިއެވެ.
