2008ވަނަ އަހަރު ދިވެހިން ބަލައިގެންފައިވާ ރިޔާސީ ނިޒާމް، ބަލައިގަތްތާ އެންމެ 13 އަހަރަށްފަހު ނިޒާމް ބަދަލު ކުރުމަށް ވަކާލާތު ކުރައްވަމުން ގެންދަވާ އެމްޑީޕީގެ ރައީސް މުހައްމަދު ނަޝީދުވެސް ބަރުލަމާނީ ނިޒާމަކަށް ތާއީދު ކުރައްވާ ފަދައިން، މިހަފްތާގައި ކުރީގެ ރައީސް ޔާމިން ބޭއްވެވި ނޫސްވެރިންގެ ބައްދަލު ވުމުން ފާހަގަވެގެން ދިޔަ އެއްކަމަކަށް ވެގެން ދިޔައީ، ރައީސް ޔާމިންވެސް އަދިވެސް އެ ނިޒާމަށް ތާއީދު ކުރައްވަމުން ގެންދަވާ ކަމެވެ.
މި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޔާމިން ވިދާޅުވެފައިވަނީ، އެމަނިކްފާނަކީވެސް ވަރަށް ކުރިއްސުރެ، ވެރިކަމުގެ އެންމެ ރަގޅު ނިޒާމަކީ ބަރުލަމާނީ ނިޒާމްކަމުގައި ގަބޫލު ކޮށްގެން ހުރި ބޭފުޅެއް ކަމުގައެވެ. އަދި މިހާރުވެސް އެކަން އެގޮތަށް ގަބޫލު ކުރައްވާ ކަމުގައި ވިދާޅުވެފައި ވެއެވެ.
އަދި ޔާމިން ވިދާޅުވެފައިވަނީ، ކުރީގެ ރައީސް މުހައްމަދު ނަޝީދާއި ޚިޔާލު އެއްގޮތްވާ ހަމައެކަނި ކަމަކީވެސް އެއީ ކަމުގައެވެ.
ބަރުލަމާނީ ނިޒާމަކަށް ވަރަށްކުރިއްސުރެ ތާއީދު ކުރައްވާކަން ޔާމިން ހާމަ ކުރައްވާފައި ވާއިރު، އެމްޑީޕީގެ ރައީސް މުހައްމަދު ނަޝީދު މިހާރުވަނީ، ރާއްޖޭގެ ވެރިކަމުގެ ނިޒާމު ބަދަލު ކުރުމަށް ޚާއްސަ ގަރާރެއް ކުރިޔަށް އޮތް އެމްޑީޕީގެ ކޮންގްރެސްއަށް ހުށަހަޅުއްވާފައެވެ.
މިގަރާރުގައި ނަޝީދު ހިމަނުއްވާފައިވަނީ، ރާއްޖޭގެ ވެރިކަމުގެ ނިޒާމު ބަރުލަމާނީ މިޒާމަކަށް ބަދަލު ކުރުމަށް ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ކޮމްގްރެސް އިގުރާރު ވުމަށެވެ.
އަދި މިގޮތަށް އެމްޑީޕީގެ ކޮންގަރެސްއިން ފާސް ވެއްޖެނަމަ، ރައްޔިތުންގެ މަޖިލިހުގެ އަދަދު 87 މެމްބަރުންނަށްވުރެ އިތުރު ނުކުރުމަށާއި އޭގެ އިތުރުން ސުޕްރީމް ކޯޓުގެ ފަނޑިޔާރުންގެ އަދަދު 5 އަށް ހަމަޖެއްސުމަށް ގާނޫނު އަސާސީއަށް ބަދަލު ގެނައުމަށް އިގުރާރުވުންވެސް މި ގަރާރުގައި ނަޝީދު ހިމަނުއްވާފައި ވެއެވެ.
ބަރުލަމާނީއަށް ތާއީދު، އެހެންނަމަވެސް ޔާމިންގެ ވިސްނުން ތަފާތު!
މިހަފްތާގައި ރައީސް ޔާމިން ބޭއްވެވި ނޫސްވެރިންގެ ބައްދަލު ވުމުގައި، ނޫސްވެރިން ކުރި ސުވާލުތަކަށް ޖަވާބު ދެއްވަމުން ވިދާޅުވެފައިވަނީ، ވަރަށް ކުރިއްސުރެވެސް ތާއީދު ކުރައްވަނީ ބަރުލަމާނީ ނިޒާމަކަށް ކަމަށާއި، އެހެންނަމަވެސް ރާއްޖެ ފަދަ ތަނެއްގަ، އަދި މެމްބަރުން ޕާޓީ ބަދަލުކުރުން ރެގިއުލޭޓް ކުރެވޭނެ ގޮތެއް ނެތް ތަނެއްގައި، ބަރުލަމާނީ ނިޒާމުން ހަމަޖެހުމެއް ނާންނާނެ ކަމުގައެވެ.
އަދި ވިދާޅުވީ، މެމްބަރުން ޕާޓީ ބަދަލު ކުރުން ހުއްޓުވުމަށް ގާނޫނުތަކަށް ބަދަލު ގެނެވިދާނެ ކަމަށާއި އެހެންނަމަވެސް ރާއްޖޭގެ ޝަރުއީ ނިޒާމު އޮތް ގޮތުން އެއީ އަވަސް މުއްދަތެއްގައި ކުރެވޭނެ ކަމެއް ނޫން ކަމުގައެވެ. އެފަދަ ބަދަލެއް ނިމިގެން ދާއިރު، ދައުރު އޮންނާނީ ނިމިގެން ގޮސްފައި ކަމުގައިވެސް ޔާމިން ވިދާޅުވެފައި ވެއެވެ.
މި ނޫސްވެރިންގެ ބައްދަލުވުމުގައި، ގެންގުޅުއްވާ ބަރުލަމާނީ ނިޒާމުގެ ވިސްނުމާއި ގުޅޭގޮތުން ޔާމިން ވިދާޅުވެފައިވަނީ ބަރުލަމާނީ ނިޒާމެއް ފުރިހަމަ ގޮތުގައި މަސައްކަތް ކުރާނީ މެމްބަރުން ޕާޓީ ކްރޮސްކުރުން ހުއްޓުވޭނެ އުސޫލުތަކެއް އެކަށައެޅި، އަދި ސަރުކާރު ފަސޭހަކޮށް ނުރޫޅޭނެ ފުރިހަމަ އުސޫލުތަކެއްވެސް އެކަށައެޅިގެން ކަމުގައެވެ. އެހެންނޫން ނަމަ، އިސްރާއީލު، ނުވަތަ އިޓަލީ ފަދަ ބައެއް ގައުމުތައް ފަދައިން އެ ނިޒާމުގެ ތެރެއިން ދާނީ އަބަދުވެސް ސަރުކާރުތައް ބަދަލުވަމުން ކަމުގައެވެ.
ޔާމިން އިތުރަށް ވިދާޅުވެފައިވަނީ ބަރުލަމާނީ ނިޒާމުތަކާއި ޚިލާފަށް ރިޔާސީ ނިޒާމަކީ، ސަރުކާރުގައި ހަމަޖެހުން އޮންނަ "ސްޓޭބަލް" ނިޒާމެއް ކަމަށާއި، އެހެންނަމަވެސް ހުރިހާ ސިފަތަކެއް ފުރިހަމަވެގެން އަތުވެއްޖެ ނަމަ ބަރުލަމާނީ ނިޒާމަށް އަދިވެސް ތާއީދު ކުރައްވާނޭ ކަމުގައެވެ.
އެމްޑީޕީގެ ރައީސް މުހައްމަދު ނަޝީދު، ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރެއްވުމަށް ބޭނުންފުޅުވެ އެމަސައްކަތް ފެއްޓެވިފަހުން، ނަޝީދު ގެންދަވަނީ، ބަރުލަމާނީ ނިޒާމަކަށް މަގުފަހި ކުރުވުމަށްޓަކާ ގާނޫނު އަސާސީ ބަދަލު ކުރުމަށްވެސް ހުށަހަޅުއްވަމުންނެވެ.
މިގޮތުން އެންމެ ފުރަތަމަ ބަރުލަމާނީ ނިޒާމުގެ ވާހަކަ ދައްކަވަމުން ނަޝީދު މަސައްކަތް ކުރައްވާފައިވަނީ، ރައްޔިތުންގެ ފެންނަ ނުފެންނަ ވޯޓަކަށްވެސް ނުގޮސް، މަޖިލިހުގައި އޮތް ސުޕަރ މެޖޯރިޓިގެ ބޭނުން ކުރައްވައިގެން ގާނޫނު އަސާސީ ބަދަލުކޮށް، ވެރިކަމުގެ ނިޒާމު ބަދަލު ކޮށްލުމަށެވެ. އެހެންނަމަވެސް ނަޝީދުގެ މި ވިސްނުން ދޫކޮށްލުމަށް މަޖުބުރުވީ މިކަމަށް ރައީސް ސާލިހު ދެކޮޅު ހެއްދެވި ހިސާބުންކަން މިފުރުސަތުގައި ފާހަގަ ކޮށްލާން ޖެހެއެވެ.
ބަރުލަމާނީ ނިޒާމަކާއި ގުޅޭގޮތުން ގެންގުޅުއްވާ ވިސްނުން، އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ހާމަ ކުރައްވަމުން ޔާމިން ވިދާޅުވެފައިވަނީ، ގާނޫނު އަސާސީ ބަދަލުކުރުމަށްވެސް ޕީޕީއެއިން ތާއީދު ނުކުރާނެ ކަމަށާ، ރައްޔިތުންގެ މަޖިލިހުގައިވެސް އެކަމަށް އެޕާޓީގެ މެމްބަރުން ތާއީދު ނުލިބޭނޭ ކަމުގައެވެ.
ނިޒާމު ބަދަލު ކުރުމުގެ ފުރުސަތު ލިބުނު ދެ ރައީސުން!
ރާއްޖޭގެ ވެރިކަމުގެ ނިޒާމު އަލުން ބަރުލަމާނީ ނިޒާމަކަށް ބަދަލު ކުރުމުގެ ބަހުސްގެ އަޑު ގަދަވެފައިވާއިރު، މިހާރު ތިއްބެވި ސިޔާސީ ޕާޓީތަކުގެ ލީޑަރުންގެ ތެރެއިން، ވެރިކަމުގެ އެންމެ ރަގަޅު ނިޒާމެއްގެ ގޮތުގައި ބަރުލަމާނީ ނިޒާމް ގަބޫލުކުރާ ހަމައެކަނި ދެބޭފުޅުންނަކީ އެމްޑީޕިގެ ރައީސް މުހައްމަދު ނަޝީދާއި، ޕީޕީއެމްގެ ރައީސް އަބުދުﷲ ޔާމިންއެވެ.
އެހެންނަމަވެސް، ނަޝީދުގެ ވިސްނުމަކީ ކޮންމެ ގޮތެއް ހަދާފައިވަނަމަވެސް، މިހާރު އޮތް ރިޔާސީ ނިޒާމު ބަރުލަމާނީ ނިޒާމަކަށް ބަދަލު ކުރުންކަމަ ވިނަމަވެސް، ޔާމިން ގަބޫލު ކުރައްވާ ގޮތުގައި ބަރުލަމާނީ ނިޒާމު މިވަގުތަށް ރާއްޖެއަށް އެކަށީގެނެއް ނުވެއެވެ. ސަބަބެއް ކަމުގައި ފާހަގަ ކުރައްވާފައިވަނީ، ރައްޔިތުންގެ މަޖިލިހުގެ ހާލަތު އޮތް ގޮތުން، މެމްބަރުން ޕާޓީ ބަދަލު ކުރުމުގެ ސަގާފަތުގެ ތެރެއިން އަވަސް އަވަހަށް ސަރުކާރުތައް ބަދަލުވުމުގެ ފުރުސަތު އިންތިހާއަށް އޮތުމެވެ. އިސްރާއީލް އިޓަލީފަދަ ގައުމުތަކުގެ ހާލަތަށް ރާއްޖޭގެ ސިޔާސީ މަސްރަހު ބަދަލުވެގެން ދިއުމުގެ ފުރުސަތު އޮތުމެވެ.
ހަމަ އެއާއެކު ފާހަގަ ކޮށްލާން ޖެހޭ އެއް ކަމަކީ، ބަރުލަމާނީ ނިޒާމަކީ އެންމެ ރަގަޅު ނިޒާމު ކަމުގައި ގަބޫލުކުރައްވާ ދެ ރައީސުންނަކީވެސް، އެ ނިޒާމު ރާއްޖެއާއި އެކަށީގެންވާ ގޮތަށް ބައްޓަންކޮށް، ނިޒާމުގެ ސިފަތައްވެސް ރާއްޖޭގެ ވެރިކަމުގެ ނިޒާމަށް ފެތޭގޮތަށް ބަދަލުކޮށްގެން، ވެރިކަމުގެ އެ ނިޒާމު ރާއްޖެއަށް ގެނައުމުގެ ފުރުސަތު ލިބިލެއްވި ދެބޭފުޅުންކަމެވެ. އެހެންނަމަވެސް، ދެ ބޭފުޅުންނަކީވެސް، އަމިއްލަފުޅަށް ވެރިކަން ކުރެއްވުމުގެ ފުރުސަތު ލިބުމުން އޭރު ބަރުލަމާނީ ނިޒާމުގެ ރަގަޅުކަމުގެ ވާހަކަ ދެއްކެވި ދެބޭފުޅުން ނޫންކަންވެސް މި ފުރުސަތުގައި ފާހަގަ ކޮށްލާން ޖެހެއެވެ.
އެހެންކަމުން، މިއަދު ގަބޫލުރާން ޖެހިފައިވާ އެއް ހަގީގަތަކީ، ބަރުލަމާނީ ނިޒާމުގެ ވާހަކަ އިޚްލާސްތެރިކަމާއެކު ދެއްކެވެން އޮތް އެއްވެސް ސިޔާސީ ލީޑަރަކު މިއަދު ރާއްޖޭގެ ސިޔާސީ މަސްރަހުގައި ނެތްކަމެވެ. އަދި އެ ނިޒާމުގެ ރަގަޅުކަމުގެ ވާހަކަތަކާއި، އެނިޒާމު ރާއްޖެއަށް ގެންނަވަން ވަކާލާތު ކުރައްވާ ހުރިހާ ސިޔާސީ ލީޑަރުންނަށްވެސް ރާއެއްޖެއަށް އެ ނިޒާމު ގަނައުމަށް އަމިއްލަ ވެރިކަމުގައި އެފުރުސަތުލިބި، އެފުރުސަތު ވަނީ ދޫކޮށްލައްވާފައެވެ.
އެހެންނަމަވެސް ވެރިކަމަށް ވަޑައިގެންވެން އޮތް ހަމަ އެކަނި މަގަކީ އެއީކަމުގައި ފުރިހަމަޔަށް ގަބޫލު ކުރެވި، އެމްޑީޕީގެ ރައީސް މުހައްމަދު ނަޝީދު ގެންދަވަނީ އެމަގަށް މަސައްކަތް ކުރައްވަމުންނެވެ. ރައީސް ޔާމިން ހުންނެވީ، ބަރުލަމާނީ ނިޒާމް އެންމެ ރަގަޅު ވެރިކަމުގެ ނިޒާމެއް ކަމުގައި ގަބޫ ކުރައްވައިގެންނެވެ. އެހެންނަމަވެސް، ގަބޫކުރެވޭ ގޮތުގައި ރައްޔިތުން ތިބީ ބަރުލަމާނީ ނިޒާމަކީ ރަގަޅު ނިޒާމުކަންވެސް، އަދި އެނިޒާމު ރާއްޖެ ގައުމަށްވެސް ތާއީދު ކޮށްގެނެއް ނޫނެވެ.
