އެމެރިކާގެ ފްލޮރިޑާގައި ހުންނަ، ކުރީގެ ރައީސް ޑޮނަލްޑް ޓްރަމްޕްގެ އަމިއްލަ ގަނޑުވަރު މަރަ-ލާގޯއަށް ކޯޓު އަމުރަކާއެކީ ވަދެ، އެފްބީއައިގެ އޭޖެންޓުން އެތަން ބަލާ ފާސްކޮށްފިއެވެ.
ޓްރަމްޕް ވިދާޅުވެފައިވަނީ، ޓްރަމްޕް ޗުއްޓީ ހޭދަކުރުމަށް ބޭނުންކުރާ މިތަނަށް އެފްބީއައިގެ އޭޖެންޓުން ކޯޓު އަމުރަކާއެކީ ވަދެފައިވަނީ ކުރިން އެންގުމަކާ ނުލާ ކަމަށާއި، މި ގަނޑުވަރުގައި ހުރި އޭނާގެ ތިޖޫރީވެސް ފަޅާލާފައި ވާކަމުގައެވެ.
ޔުއެސް ފެޑެރަލް ބިއުރޯ އޮފް އިންވެސްޓިގޭޝަން (FBI)ގެ އޮފިޝަލުން މި ޕްރޮޕަރޓީއަށް ވަދެފައިވަނީ "އުސޫލާއި ޚިލާފަށް އަދި ބޭނުމެއް ނެތް ކަމެއްގައި" ކަމަށް ޓްރަމްޕް ނެރުއްވި ބަޔާނުގައި ވިދާޅުވެފައި ވެއެވެ.
އެފްބީއައިގެ އެޖެންޓުން ޓްރަމްޕްގެ ގަޑުވަރު ބަލާފާސް ކުރި އަސްލު ސަބަބު އެ އޭޖެންސީން ހާމަ ކޮށްފައެއް ނުވެއެވެ.
އެފްބީއައިގެ އޭޖެންޓުން މާރަ-ލާގޯއަށް ވަތްއިރު އެތަނުގައި ޓްރަމްޕް ނޫޅުއްވައެވެ. އެވަގުތު ޓްރަމްޕް އުޅުއްވާފައިވަނީ ނިއުޔޯކުގައި ހުންނަ ޓްރަމްޕް ޓަވަރުގައެވެ. މި ޓަވަރުގައި ވެސް ޓްރަމްޕް ދިރިއުޅުވާ އެޕާޓްމަންޓެއް ހުރެއެވެ.
އެފްބީއައިގެ އޭޖެންޓުން ޓްރަމްޕްގެ ޕްރައިވެޓް ޕްރޮޕަޓީ ބަލާ ފާސްކޮށްފައިމިވަނީ، ގިނަ ފޮށިތަކެއްގައި، ސިއްރު މައުލޫތާތު އެކުލެވޭ ދައުލަތުގެ ލިޔުންތައް މިއަހަރު ކުރީކޮޅު މަރަ-ލާގޯއިން ފެނުމާއި ގުޅިގެން ޚާއްސަ ތަހުގީގެއް ކުރިޔަށް ގެންދާން ފެށިތާ މަހެއްހާ ދުވަސް ފާއިތުވެފައި ވަނިކޮށެވެ. އަދި 2020 ވަނަ އަހަރުގެ ރިޔާސީ އިންތިޚާބުގައި ވޯޓު އޮޅުވާލިކަމަށް ބުނެ ހިންގާފައިވާ ހަމަނުޖެހުންތަކާއި ގުޅިގެން އެމެރިކާގެ ސެނެޓުން ޚާއްސަ ތަހުގީގެއްވެސް ކުރިޔަށް ގެންދަނިކޮށެވެ. ހަމަ އެއާއެކު 2024ގެ ރިޔާސީ އިންތިޚާބު ވާދަކުރެއްވުމަށް ޓްރަމްޕް ތައްޔާރު ވަމުން ދަނިކޮށްވެސް މެއެވެ.
މިއަހަރުގެ ފެބްރުއަރީމަހު، ޔޫއެސް ނޭޝަނަލް އާކައިވްއިންވަނީ، ޓްރަމްޕްގެ މަރަ-ލާގޯގައި، ޓްރަމްޕްގެ ރައީސްކަމާއި ގުޅުންހުރު، ދައުލަތުގެ ލިޔުންތައް 15 ފޮށިގަޑު ފުރާ ހުއްޓާ ހޯދާފައެވެ. އެމެރިކާގެ ގާނޫނުތައް ބުނާގޮތުން ރައީސްގެ ޒިންމާތަކާއި ގުޅުންހުރި ހުރިހާ ލިޔެކިޔުންތަކަކީ ދައުލަތުގެ މިލްކެކެވެ.
ނޭޝަނަލް އާކައިވްއިން ވަނީ މިމައްސަލަ ޔޫއެސް ޖަސްޓިސް ޑިޕާޓްމަންޓަށް ހުށަހަޅާފައެވެ.
