ޔޫކުރެއިންގައި ހުރި އެގައުމުގެ އެންމެ ބޮޑު އެންމެ ބޮޑު އެއް މަހުޖަނު، އަދި މަޝްހޫރޫ ވިޔަފާރަ ވެރިއާ ދިރި އުޅުއްވާ އިމާރާތަށް ރަޝިއާއިން ދިން މިސައިލް ހަމަލާތަކުގައި މަރު ވެއްޖެއެވެ.
ޔޫރެއިން ގޮދަން އެކްސްޕޯޓު ކުރާ، މިހާރު އުމުރުން 74 އަހަރުގެ އޮލެސްކީ ވަޑަޓުސްކީ އާއި އޭނާގެ އަނބިކަބަލުން މަރުވެފައިވަނީ ޔޫކުރެއިންގެ ސިޓީއެއް ކަމުގައިވާ މައިކޮލައިވްގައި އެދެމީހުން ދިރުއުޅެމުންދިޔަ އެޕާޓްމަންޓަށް މިހަފްތާގެ ހޮނިހިރު ދުވަހު ރަޝިއާން ދިން ވަރުގަދަ މިސައިލް ހަމަލާތަކުގައެވެ.
ވަޑަޓުސްކީއަކީ ޔޫކުރެއިންގެ ދަނޑުވެރިކަމާބެހޭ ކުންފުންޏެއް ކަމުގައިވާ ނިބުލޮންގެ ވެރިފަރާތެވެ. އަދި އޭނާ ފާހަގަ ކުރެވިފައިވާ ޔޫކުރެއިންގައި މިވަގުތުހުރި އެންމެ ކާމިޔާބު އެއް ވިޔަފާރަވެރިޔާގެ ގޮތުގައެވެ.
ރަޝިއާ ސިފައިން މި ހަފްތާގައި ހަމަލާތައް އަމާޒު ކޮށްފައިވާ މައިކޮލައިވް އޮންނަނީ ޔޫކުރެއިންގެ މުހިންމު ޕޯޓު ސިޓިއެއް ކަމުގައިވާ އޮޑެއްސާއަށް ދާން އޮންނަ މުހިންމު މަގަކާއި ގުޅިަފއެވެ. އަދި ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާ ސިފައިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން މި ސިޓީއަކީ ރަޝިއާގެ ހަމަލާތައް އެތައް ފަހަރެއްގެމަތިން އަމާޒު ވެފައިވާ ސިޓީއެކެވެ.
ޔޫކުރެއިންގެ ރައީސް ވޮލޮޑޮމީރް ޒެލެންސްކީގެ އެޑްވައިޒަރަކު ބައެއް މީޑިއާތަކަށް މައުލޫމާތު ދެމުން ވިދާޅުވެފައިވަނީ ރަޝިއާ ސިފައިންވަނީ ވަޑަޓުސްކީއަށް އަމާޒުކޮށް ހަމަލާ ދީފައި ކަމަށާއި، ރަޝިއާގެ މިސައިލް ހަމަލާތައް އަމާޒު ވެފައިވަނީ އޭނާގެ ގޭގެ ނިދާ ކޮޓަރިއަށް ކަމަށެވެ.
ޔޫކުރެއިންގެ ލޯކަލް ނޫހެއް ކަމުގައިވާ ކީވް އިންޑެޕެންޑެންސްއިން ރިޕޯޓު ކޮށްފައިވާ ގޮތުގައި 2021ވަނަ އަހަރުގެ ހިސާބުތައް ދައްކާ ގޮތުން ވަޑަޓުސްކީގެ މިލްކިއްޔާތު 400 މިލިއަން ޑޮލަރަށް އަރައެވެ.
އޭނާއަކީ ޔޫކުރެއިން ގޮދަން އިންޑަސްޓްރީގެ އެންމެ ބޮޑު އެއް ހިއްސާދާރެވެ. ޔޫކުރެއިންގެ ގްރެއިން އިންޑަސްޓްރީއަށް މިހާރު ކުރިޔަށްދާ ހަނގުރާމައިގެ ސަބަބުން ވަނީ ވަރަށް ބޮޑު ނޭދެވޭ އަސަރެއް ކޮށްފައެވެ.
