ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދުގެ ލާދީނީ ފިކުރު ބޭޒާރުވެއްޖެކަމަށް ވިދާޅުވެ ދީނީ ޢިލްމުވެރިޔާ ޝައިޚް ޢަލީ ޒައިދު ފާޑުވިދާޅުވެއްޖެއެވެ.
ޒައިދު މިހެން ވިދާޅުވެފައިމިވަނީ، އެއް ޖިންސުން ގުޅުން ހިންގި މައްސަލައިގެ ތުހުމަތުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝިދުގެ ކޮއްކޮ، ނާޒިމް ސައްތާރު ހައްޔަރުކުރުމުން އެއީ ސަރުކާރު ކޯލިޝަންގައިތިބި ހައްދުފަހަނަ އެޅުމުގެ ފިކުރުމުގެ މީހުން ރުއްސަން ކުރެއްވިކަމެއްކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވުމާއި ގުޅިގެންނެވެ.
ރައީސް ނަޝީދުގެ މި ވާހަކަފުޅާއި ގުޅިގެން އެތައް ބަޔަކު ދަނީ އެމަނިކުފާނަށް ފާޑުކިޔަމުންނެވެ. އޭގެ ތެރޭގައި އެމްޑީޕީގެ މެންބަރުންނާއި އާންމުންނާއި ދީނީ ޢިލްމުވެރިން ހިމެނެއެވެ.
ރައީސް ނަޝިދުގެ އެ ވާހަކަފުޅަކީ އެއްޖިންސުން ގުޅުންހިންގުމަކީ އިންސާނީ ހައްޤެއްކަމަށް ވަކާލާތުކުރާ ފަރާތްތަކުގެ ސަޕޯޓު ހޯދުމާއި، ދީނީ ޢިލްމުވެރިންނަކީ ހަރުކަށި ފިކުރުގެ މީހުން ކަމަށް ބޭރު ދުނިޔެއަށް ބުނެދޭން މަސައްކަތްކުރުން ކަމަށް ބައެއް ފަރާތްތަކުން ތުހުމަތުކުރެއެވެ.
ރައީސް ނަޝީދުގެ އެވާހަކަފުޅަށް ރައްދު ދެއްވައި ދީނީ ޢިލްމުވެރިޔާ ޢަލީ ޒައިދު ވިދާޅުވީ ލާދީނީ ފިކުރު ބޭޒާރުވެއްޖެކަމަށާއި، ލާދީނީ ފިކުރު ހުރި ލެވެލްވެސް އެންމެންނަށް ފަޟީޙަތްވެއްޖެކަމަށެވެ.
އަމިއްލަ ޕާޓީގެ ތެރޭވެސް ތާއީދު ސުމަކަށް ވެއްޓިއްޖެކަމަށާއި،އެއީ އިސްލާމް ދީނުގެ އަސާސްތަކަށް ފާޑުކިޔާ ހިތުހުރިހާ ގޮތަކަށް އުޅުމުން ކުރިމަތިލައްވަންޖެހުނު ކަމެއްކަމަށް ޒައިދު ވިދާޅުވިއެވެ. ޒައިދު ވަނީ، އެންމެފަހުން ލިވާތު ދިފާޢުކޮށްގެން ނިމިގެން ދަނީކަމަށް ވިދާޅުވެ ނަޝީދަށް ފާޑުވިދާޅުވެފައެވެ.
ލާދީނީ ފިކުރު ބޭޒާރުވެއްޖެ! ލާދީނީ ފިކުރު ހުރި ލެވެލްވެސް އެންމެންނަށް ފަޟީޙަތްވެއްޖެ! އަމިއްލަ ޖަމާޢަތުގެ ތެރޭވެސް ތާއީދު ސުމަކަށް ވެއްޓިއްޖެ! އެހެންނޫންތޯވާނީ އިސްލާމް ދީނުގެ އަސާސްތަކަށް ފާޑުކިޔާ ހިތުހުރިހާ ގޮތަކަށް އުޅެންޏާ! އެންމެފަހުން ލިވާތު ދިފާޢުކޮށްގެން ނިމިގެން އެދަނީ!
— Ali Zaid (@alizaid1000) July 30, 2022
ނާޒިމްގެ ދިފާޢުގައި ރައީސް ނަޝީދު ނިކުމެވަޑައިގަތުމުން އެމްޑީޕީގެ ތެރޭގައި ރައީސް ނަޝީދަށް ތާޢީދުކުރެއްވި އެތައް ބަޔަކުވެސް ވަނީ އެކަން ކުށްވެރިކޮށް ނަޝީދަށް ކުރަމުން އައި ތާޢީދު އަނބުރާ ގެންގޮސްފައެވެ.
ރައީސް ނަޝީދު ވަނީ ރައީސް ޞާލިޙްގެ ބަދުއަޚްލާގީ ފޮޓޯތަކެއް ހުރިކަމަށްވެސް ވިދާޅުވެ ރައީސް ޞާލިޙަށް އިންޒާރު ދެއްވާފައެވެ. ނަމަވެސް ސަރުކާރުން ވަނީ އެފަދަ ފޮޓޯތަކެއް ނުހުންނާނެކަމުގެ ޔަޤީންކަން ދެއްވާފައެވެ.
