އެމެރިކާއިން ރާއްޖެއަށް ފުރަތަމަ ފަހަރަށް ސަފީރަކު އައްޔަންކުރުމަށް ނިންމާ އެކަން އިއުލާންކޮށްފައެވެ.
އެމެރިކާ ސަރުކާރުން ނެރެފައިވާ ބަޔާނެއްގައި ވަނީ، ރާއްޖޭގެ ސަފީރުކަމަށް ހޫގޯ.ވައި.ޔޮން އައްޔަންކުރުމަށް އެޤައުމުގެ ރައީސް ޖޯ ބައިޑަން ނިންމަވާފައިވާކަމަށެވެ. ހޫގޯ އަކީ ކެރިއަރ ޑިޕްލޮމޭޓެކެވެ. އޭނާ މިވަގުތު ހުންނެވީ ސްޓޭޓް ޑިޕާޓްމެންޓްގެ އޮފީސް އޮފް ދަ އަންޑަރަ ސެކްރެޓަރީ އޮފް އެކޮނޮމިކް ގްރޯތް، އެނަރޖީ އެންޑް އެންވައިރަމެންޓްގެ ސީނިއަރ އެޑްވައިޒަރުގެ މަޤާމުގައެވެ.
އޭނާ ވަނީ އެމެރިކާގެ ޔުނިވަރސިޓީ އޮފް ކެލިފޯނިއާ އިން ފަސްޓް ޑިގްރީ ހައްދަވާފައެވެ. އަދި ޕްރިންސްޓަން ޔުނިވަސިޓީން ޕަބްލިކް އެފެއަރޒް ދާއިރާއިން މާސްޓާސް ހައްދަވާފައިވާ ޔޮން، އިނގިރޭސި ބަހުގެ އިތުރަށް ކެންޓޮނީޒް، މެންޑަރިން ޗައިނީޒް އަދި އިންޑޮނޭޝިއާ ބަސް އެނގިވަޑައިގަންނަވައެވެ.
އެމެރިކާއިން ރާއްޖެއަށް ސަފީރެއް އައްޔަން ކުރަން ނިންމާފައިވާއިރު، ރާއްޖޭގައި އެމެރިކާގެ އެމްބަސީ ހިންގާނެ ތަނެއް ހޯދަން އެ ގައުމުގެ ސަރުކާރުން މިދިޔަ އަހަރު މަސައްކަތް ފަށާފައިވެއެވެ.
އެމްބަސީ ހިންގާނެ ތަނެއް ކަނޑައެޅުމަށްޓަކައި ދިވެހި ސަރުކާރުގެ ކަމާބެހޭ ފަރާތްތަކާ އެކު އެމެރިކާގެ އިސް އޮފިޝަލުންތަކެއް ވަނީ ބައްދަލުވުމެއް ބާއްވައިފަ އެވެ. މާލޭ ސިޓީ ކައުންސިލާއި ކަމާ އެހެން ފަރާތްކަކާ އެކު ބޭއްވި އެ ބައްދަލުވުމުގައި އެމެރިކާ އިން ހިޔާލު ހޯދީ ސަލްޓަންޕާކާއި ޕާކިސްތާނު ހައިކޮމިޝަނާ ކައިރި ސަރަހައްދަކުން ޖާގައެއް ހޯދުމާ ގުޅޭ ގޮތުންނެވެ.
ރާއްޖޭގައި އެމްބަސީއެއް ގާއިމު ކުރުމުގެ ޝައުގުވެރިކަން އެމެރިކާ އިން ފާޅުކުރީ އެ ގައުމުގެ ކުރީގެ ރައީސް ޑޮނަލްޑް ޓްރަމްޕް ސަރުކާރުގެ ފަހު ދުވަސްކޮޅު، އޭރުގެ ސެކްރެޓަރީ އޮފް ސްޓޭޓް މައިކް ޕޮމްޕިއޯ ރާއްޖެ އަށް ކުރެއްވި ރަސްމީ ދަތުރުގައެވެ.
މިހާރު އެމެރިކާއިން ސަފީރަކު ކަނޑައަޅާފައިވަނީ ރާއްޖެއާއި ލަންކާއަށެވެ.
