ރ.މަޑުއްވަރީގައި 14 އަހަރު ކުއްޖަކު ރޭޕްކުރި މައްސަލާގައި ނޫނޫ އިމުގެ ތެެރެއިން ފިޔަވަޅު އެޅުމަށް ޖެންޑާ މިނިސްޓްރީން ކަމާ ބެހޭ އިދާރާތަކުގައި އެދިއްޖެއެވެ.
މިދިޔަ އަހަރުގެ މާރިޗު މަހުގެ ތެރޭގައި މަޑުއްވަރީގައި ޢުމުރުން 14 އަހަރުގެ ކުއްޖަކު ރޭޕް ކުރި ކަމަށް ބުނާ މައްސަލައެއްގައި މަޑުއްވަރީގެ މަސްލަހަތު ގެއްލިގެންދިޔައެވެ. އެރަށުގެ ގިނަ ޢަދަދެއްގެ ބަޔަކު މުޒާހަރާކޮށްފައިވެސްވެއެވެ. މި ރޭޕްގެ، މައްސަލައިގެ ތުހުމަތު ފުލުހަކަށާއި، ޓީޗަރެއްގެ އިތުރުން އިތުރު ބަޔަކަށްވެސް އެރަށު މީހުން ކުރެއެވެ.
އެއެކުއްޖާ ރޭޕްކޮށްފައިވާ ކަމަށް ޑޮކްޓަރުންގެ ރިޕޯޓުގައި ބަޔާންކުރިނަމަވެސް އެ މައްސަލަ ފުލުހުން ފައިލް ކުރީ ތުހުމަތުކުރެވޭ މީހުންނަށް ދައުވާކުރެވޭ މިންވަރަށް ހެކި ނެތްކަމަށް ބުނެ ޕްރޮސެކިއުޓާ ޖެނެރަލްގެ އޮފީހުން މައްސަލަ އަނބުރާ ފޮނުވާލުމުނެވެ.
ނަމަވެސް އެމައްސަލަ ފައިލްކޮށްފައިވަނިކޮށް މި މައްސަލާގައި ތުހުމަތުކުރެވޭ ޓީޗަރު އެހެން ބަޔަކު ގާތު، ކުއްޖާ އެ ވާހަކަ ނުކިޔައިދޭ ނަމަ، އެއީ ނުހިނގާ ކަމެއްކަމަށް ބުނެ ވާހަކަ ދައްކާ އަޑުއިވޭ އޯޑިއޯއެއް ދަނީ ސޯޝަލް މީޑިއާގައި ދައުރުވަމުންނެވެ. އެހެންކަމުން ބަޔަކު ނުފޫޒު ފޯރުވައިގެން މައްސަލަ ހިންދާލަން އުޅޭކަމަށް ތުހުމަތުކޮށް އާއިލާ އިން ވަނީ ކުއްޖާއަށް އިންސާފު ނުލިބި ދިގުލައިގެންދާ މައްސަަލައާ ގުޅިގެން މިމަހުގެ 18 ގައި ޖެންޑާ މިނިސްޓްރީއަށް ސިޓިއެއް ފޮނުވައި، މައްސަލަ ބަލައިދޭން އެދިފައެވެ.
އާއިލާގެ އެ ސިޓީއާއި ހަވާލާދީ ޖެންޑަރ މިނިސްޓަރީން އެކުއްޖާގެ އާއިލާއަށް ފޮނުވި ސިޓީގައިވަނީ އެ މިނިސްޓްރީއަކީ ތަހުގީގީ އިދާރާއަކަށް ނުވާތީ ތަހުގީގާ ގުޅޭ ކޮމެންޓެއް ނުކުރެވޭނެކަމަށާއި، ނަމަވެސް އެ ކޭސްއާ ގުޅިގެން މިނިސްޓްރީގެ މެންޑޭޓުގައިވާ ކަންކަން ކުރަމުން އަންނަކަމަށެވެ. ޗައިލްޑް އެންޑް ފެމިލީ ޕްރޮޓެކްޝަން ސާވިސް އިން ދަނީ އެ ކޭސް މޮނިޓާކުރަމުން އަންނަކަމަށާއި، ކުއްޖާ މިހާރު އުޅޭ މާހައުލަކީ ރައްކާތެރި މާހައުލެއްކަން ވަނީ ކަށަވަރުކުރެވިފައިކަމަށް ޖެންޑާރ މިނިސްޓްރީގެ ސިޓީގައިވެއެވެ.
ސިޓީގައ ބުނެފައިވާގޮތުގައި ޖެންޑާ މިނިސްޓްރީގެ މެންޑޭޓަކީ ސޯޝަލް ޕްރޮޓެކްޝަން އެންޝުއާކޮށްދިނުމެވެ.
މަޑުއްވަރީގައި މިމައްސަލާގައި ކުރިއަށް ގެންދިޔަ އިހުތިޖާޖު ހޫނުވެ ޕޮލިސް ސްޓޭޝަނަށްވެސް ގެއްލުންދިފައިވެއެވެ.
މަޑުއްވަރީ ސްކޫލުގެ ގުރޭޑް 8ގައި ކިޔަވަމުންދާ މި ކުއްޖާގެ މައްސަލަ ފެންމަތިވީ ކުއްޖާ އެހެން މީހުންނާ އެކަހެރިކޮށް އުޅެން ފެށުމުންނާއި ފިރިހެނަކު ފެންނަ އިރަށް ބިރުން ހަޅޭއްލަވާ ހަދަން ފެށުމުން ރަށު ސިއްހީ މަރުކަޒަށް ދެއްކުމުން ކަމަށެވެ. މިކުއްޖާގެ މައްސަލަ ޖެންޑާ މިނިސްޓްރީއަށް ރިޕޯޓްކޮށްފައިވަނީ މަޑުއްވަރީ ސިއްހީ މަރުކަޒުން ކަމަށާއި މި އަންހެން ކުއްޖާ ޖެންޑާ މިނިސްޓްރީގެ ބެލުމުގެ ދަށަށް ގެނެސްފައިވެއެވެ. އަދި ރަށު ސްކޫލަށް ދިއުމަށް އެކުއްޖާ ދެކޮޅު ހެދުމުން މިހާރު އެ ކުއްޖާ ކިވަމަުންދަނީ މާލޭގެ ސްކޫލެއްގައެވެ.
