އޮތެންޓިކް މޯލްޑިވްސްގެ ފިހާރައެއް ކްރޮސް ރޯޑްސް މޯލްޑިވްސްގައި ހުޅުވައިފިއެވެ.
މިއީ އެ ފިހާރައިގެ އައުޓްލެޓެއް ހުޅުވި ދެވަނަ ރިސޯޓެވެ. ބިޒްނަސް ސެންޓަރ ކޯޕަރޭޝަނުން ހިންގާ އޮތެންޓިކް މޯލްޑިވްސް ފިހާރައަކީ ދިވެހި އުފެއްދުންތަކަށް މާކެޓް ހޯދައިދިނުމަށް އެ ކުންފުނިން ހިންގާ ފިހާރައެކެވެ.
އޮތެންޓިކް މޯލްޑިވްސްއިން ކްރޮސް ރޯޑްސްގައި ހުޅުވި އައުޓްލެޓް ހުޅުއްވައިދެއްވީ، އެސްޑީ އެފްސީގެ މެނޭޖިންގ ޑިރެކްޓަރ އަޙްމަދު ޒީނާދެވެ. މި ފިހާރަ ހުޅުވުމުގެ ރަސްމިއްޔާތައްފަހު މީޑިއާއަށް މަޢުލޫމާތު ދެއްވަމުން ޒީނާދު ވިދާޅުވީ، އޮތެންޓިކް މޯލްޑިވްސް އަކީ ދިވެހި އުފެއްދުންތަކަށް މާކެޓުގައި ޖާގައޮތްކަމާއި ކޮލިޓީ ރަނގަޅު އުފެއްދުންތައް ދިވެހިން އުފައްދަމުންދާކަން ދައްކުވައިދޭ ފިހާރައެއް ކަމަށެވެ. އަދި އެސްޑީއެފްސީން ވިޔަފާރި ފެށުމަށާޢި ކުރިއެރުވުމަށް ދޫކޮށްފައިވާ އެސްއެމްއީ ލޯނުގެ އެހީގައި ކުރިއަށްގެންދާ ބައެއް ވިޔަފާރިތަކުން އޮތެންޓިކް މޯލްދިވްސްގައި ބައެއް ތަކެތި ވިއްކަމުންދާކަންވެސް ޒީނާދު ވަނީ ފާހަގަކުރައްވާފައެވެ.
އޮތެންޓިކް މޯލްޑިވްސް އަކީ ކުދި އަދި މެދުފަންތީގެ ވިޔަފާރިތަކަށް ފަހި ފުރުޞަތުތައް ހޯދައިދީ އެ ވިޔަފާރިތައް ކުރިއެރުވުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ އިސްނެގުމުގެ ދަށުން ބިޒްނަސް ސެންޓަރ ކޯޕަރޭޝަނުން ހިންގާ ފިހާރައެއް ކަމަށް އެ ކުންފުނިން މަޢުލޫމާތުދެއެވެ. ބީސީސީން މަޢުލޫމާތުދިން ގޮތުގައި އޮތެންޓިކް މޯލްޑިވްސް ފިހާރައިގައި ދިވެހި އުފެއްދުންތައް ވިއްކާ 180އަށްވުރެ ގިނަ ސަޕްލަޔަރުންނަށް މިހާތަނަށް 28 މިލިޔަނަށްވުރެ ގިނަ ފައިސާ އެކުންފުނިން ވަނީ ދޫކޮށްފައެވެ.
ކްރޮސް ރޯޑްސްގައި މިއަދު ހުޅުވި އޮތެންޓިކް މޯލްޑިވްސްގެ އައުޓްލެޓާއެކު އެ ފިހާރައިގެ4 އައުޓްލެޓެއް މިހާރު ވަނީ ހުޅުވާފައެވެ. ކްރޮސް ރޯޑްސް މޯލްޑިވްސްގެ އިތުރުން ކުޑަ ވިލިނގިލި ރިސޯޓާއި ވެލާނާ އިންޓަރނޭޝަނަލް އެއަރޕޯޓުގެ ޑިއުޓީ ފްރީގައިވެސް އޮތެންޓިކް މޯލްޑިވްސްގެ ފިހާރައެއް ހުރެއެވެ.
ބިޒްނަސް ސެންޓަރ ކޯޕަރޭޝަން (ބީސީސީ)އަކީ ރާއްޖޭގައި ހިންގާ ކުދި އަދި މެދުފަންތީގެ ވިޔަފާރިތައް ކުރިއަރުވައި ވިޔަފާރިތަކަށް ބޭނުންވާ އެހީތެރިކަން ފޯރުކޮށްދިނުމަށް ސަރުކާރުން އުފައްދާފައިވާ ކުންފުންޏެކެވެ.
ކޮމެންޓު ފޮނުވާ