ސްރީ ލަންކާގެ ރައީސްކަމުގެ މަގާމުން ގޮޓަބަޔަ ރާޖަޕަކްސަ އިސްތިއުފާ ދެއްވުމާއި ގުޅިގެން، މި ދައުރުގެ ކުރިޔަށް އޮތް ތަނުގައި އެގައުމުގެ ރައީސްކަން ކުރައްވާނޭ ބޭފުޅަކު އައްޔަން ކުރުމަށް ލަންކާގެ ގާނޫނުހަދާ މަޖިލިހުގައި ވޯޓު ލާން ފަށައިފިއެވެ.
ސްރީ ލަންކާގެ ގާނޫނު ހަދާ މަޖިލިހުން އާ ރައީސަކު އިންތިޚާބު ކުރަނީ، ސްރީ ލަންކާގެ އިގްތިސާދީ ހާލަތު ދަށްވެ، ގައުމުގައި ހަމަނުޖެހުން ހިނގާ، އިގްތިސާދީ އަދި ސިޔާސީ ބޮޑު ކާރިސާއެއްގެ ތެރެއަށް ގައުމުގެ ވެއްޓި، ރައީސް ކަމުގެ މަގާމުގައި ހުންނެވި ގޮޓަބަޔަ ރާޖަޕަކްސަ ގައުމު ދޫކޮށް ފިއްލަވާ، އަދި ފާއިތުވެދިޔަ ހަފްތާގައި މަގާމުން އިސްތިއުފަ ދެއްވުމާއި ގުޅިގެންނެވެ.
ސްރީ ލަންކާގެ ގާނޫނު އަސާސީގައި އޮންނަ ގޮތުން ދައުރުގެ މެދުތެރޭގައި ރައީސްކަމުގެ މަގާމް ހުސްވެއްޖެނަމަ، ދައުރުގެ ބާކީއޮތްތަނުގައި ގައުމުގެ ރައީސްކަމުގެ މަގާމްގައި ހުންނަވާނޭ ބޭފުޅަކު އައްޔަން ކުރާނީ ގާނޫނުހަދާ މަޖިލީހުންނެވެ.
ސްރީ ލަންކާގެ ގާނޫނުހަދާ މަޖިލިހުން އިއްޔެ ނެރުނު ބަޔާނެއްގައި ވިދާޅުވެފައިވަނީ، ފާއިތުވެދިޔަ ތަނުގައި އެގައުމުގެ ގާނޫނުހަދާ މަޖިލިހުން ރައީސަކު އައްޔަން ކޮށްފައިވަނީ އެންމެ ފަހަރަކު ނަމަވެސް، މާދަމާ ނެގުމަށް ހަމަޖެހިފައިވާ ވޯޓަކީ ޚާއްސަ ވޯޓެއް ކަމުގައެވެ.
1993 ވަނަ އަހަރު، ތަމަޅަ ޓައިގަރުން ސްރީ ލަންކާގެ އޭރުގެ ރައީސް ރަނަސިންގހެ ޕްރަމްދާސާ އަވަހާރަ ކޮށްލުމާއި ގުޅިގެން، ދައުރުގެ ބާކީ އޮތް ބަޔަށް، އެގައުމުގެ ގާނޫނުހަދާ މަޖިލިހުން ޑީ.ބީ. ވިޖޭތުންގާ އައްޔަން ކޮށްފައިވަނީ ވޯޓު ނެގުމަކާ ނުލައެވެ.
މާދަމާ ބޭއްވުމަށް ހަމަޖެހިފައިވާ ގާނޫނުހަދާ މަޖިލިހުގެ ވޯޓުގައި ވާދަ ކުރުމަށް ހަމަޖެހިފައިވަނީ، މިހާރުގެ ވަގުތީ ރައީސް އަދި ބޮޑުވަޒީރު ރަނިލް ވިކްރެމެސިންހެގެ އިތުރުން އިދިކޮޅު ޕާޓީން ތާއިދުކުރަމުންދާ ދުލާސް އަލަހައްޕެރުމާގެ އިތުރުން މާކުސިސްޓް ޕާޓީގެ ލީޑަރު އަނޫރާ ކުމާރަ ޑިސަނަޔަކައެވެ.
ގާނޫނުހަދާ މަޖިލީހުގައި ބޭއްވުމަށް ހަމަޖެހިފައިވާ މިއިންތިޚާބުގެ އެންމެ ކުރީގައި ވާދަކުރާނެ ކަމަށް ކުރިން ބެލެވެމުންއައި، އިދިކޮޅު ކެނޑިޑޭޓް ސަޖިދު ޕްރަމަދާސާ ވަނީ އޭނާގެ ނަން އަނބުރާ ގެންދަވާ، ގައުމީ މަސްލަހަތައްޓާކާ ދުލާސް އަލަހައްޕެރުމާއަށް ތާއީދު ކުރައްވާނޭކަން ހާމަ ކުރައްވާފައެވެ.
ޕްރަމްދާސާގެ ނަން އޭނާ އަބުރާ ގެންދިއުމާއި ގުޅިގެން، މިހާރު މިއިންތިޚާބު ބެލެވެނީ، މިހާރުގެ ވަގުތީ ރައީސް ރަނިލްއާއި ދުލާސް އަލަހައްޕެރުމާއާއި ދެބޭފުޅުންގެ މެދުގައި ބޭއްވޭ ވަރަށް ވާދަވެރި ރޭހަކަށް ވެެގެންދާނޭ ކަމަށެވެ.
މިގޮތުން، މިހާރުގެ ވަގުތީ ރައީސް ރަނިލްއަށް ކުރިމަތިލައްވަން ޖެހިވަޑައިގެންފައިވާ ވަރުގަދަ ގޮންޖެހުމެއްގެ ގޮތުގައި ބެލެވެމުންދާ އަލަހައްޕެރުމާއަކީ ސްރީ ލަންކާގެ ކުރީގެ އެޑިއުކޭޝަން މިނިސްޓަރެވެ. އަދި އޭނާ ނިސްބަތްވަނީ، ރާޖަޕަކްސަ އާއިލާގެ ނުފޫޒުގަދަ، ސްރީ ލަންކަން ޕޮޑުޖަނަ ޕެރަމުނާ (SLPP) ޕާޓީއަށެވެ.
މިގޮތުން އަލަހައްޕެރުމާއަށް SLPPގެ ޗެއަރމަން ޖީއެލް ޕެއިރިސް ތާއީދު ކުރައްވާނޭކަން ހާމަކޮށްފައި ވާއިރު، މި ވޯޓުގައި އެޕާޓީވެސް ވަނީ ވަރަށް ބޮޑަށް ބައިބައި ވެފައެވެ. މިގޮތުން SLPP ގިނަ އަދަދެއްގެ މެމްބަރުން ރަނިލް ވިމްރެމެސިންހެއަށް ތާއީދު ކުރާނޭކަންވެސް ވަނީ ހާމަ ކޮށްފައެވެ.
މި އިންތިޚާބުގައި ވާދަކުރާ 3 ވަނަ ކެނޑިޑޭޓް ކަމުގައިވާ، ނޭޝަނަލް ޕީޕަލްސް ޕަވަރ ޕާޓީގެ ލީޑަރު ވިކްރެމެސިންގެ ޕާޓީން ގާނޫނުހަދާ މަޖިލިހުގައި ތިއްބަވަނީ އެންމެ ތިން މެމްބަރުން ކަމަށް ވާތީ އޭނާއަށް މާބޮޑު ތާއީދެއް ލިބިދާނެ ކަމަކަށް ނުބެލެވެއެވެ.
