މާލެ ސަރަހައްދުގައި ދިރިއުޅޭ ރައްޔިތުން ދަތުރުގޮސް ހިތްހަމަޖައްސާލުމަށްޓަކައި، ސަރުކާރުން ތަރައްޤީ ކުރަމުންދާ ކުޑަގިރި ޕިކްނިކް އައިލެންޑަކީ ވަރަށް ފެހި ހިތްފަސޭހަ ތަނަކަށް ހަދައިދޭނެކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރ އައިޝަތު ޖެނިފާ ކުޑަގިރީގެ ފެހިކަމެއްނެތުމުން އެކަމާއި ކަންބޮޑުވެ ވަޑައިގެން ކުރެއްވި ޓުވީޓަކަށް ޖަވާބު ދެއްވަމުންނެވެ. އާޒިމް އަކީ އަބަދުވެސް އެކުންފުނިން ކުރަމުންދާ އެކި މަސައްކަތްތަކާއި، ފޯރުކޮށްދޭ ޚިދުމަތްތަކުގައި އެކި ފަރާތްތަކުން ކުރައްވާ ކޮމެންޓުތަކަށް ސޯޝަލް މީޑިއާގައި ޖަވާބު ދެއްވާ ބޭފުޅެކެވެ.
މިކަމުގައިވެސް އާޒިމް ވިދާޅުވީ ކުޑަގިރި ފެހި ކުރުމުގެ މަސައްކަތަކީ އެންމެ އިސްކަންދީގެން ކުރިއަށް ގެންދާ އެއްމަސައްކަތް ކަމުގައެވެ. ކުރިއަށް އޮތް ދުވަސްތަކުގައި ކުޑަގިރި ފެނިގެންދާނީ އާންމު ރަށްޔިތުންނަށް ހިތްފަސޭހަ އަދި ފެހިކަން ގަދަ ޕިކްނިކްދާ ރަށެއްގެ ގޮތުގައިކަމަށް އާޒިމް ވިދާޅުވިއެވެ.
ޕިކްނިކް އައިލެންޑް ފެހި ކުރުމަކީ އެންމެ ބޮޑު އިސްކަމެއްދޭ އެއް ކަންތައް. އިރާދަ ކުރެއްވިއްޔާ ކުޑަގިރި ޕިކްނިކް އައިލެންޑް ވަރަށް ފެހި ތަނެއްގެ ގޮތުގައިވެސް ރައްޔިތުންނަށް ފެނިގެންދާނެ. ގަސްތައް ހެދެން ވަގުތު ނަގާނެ.
– އެމްޓީސީސީގެ ސީއީއޯ އާޒިމް ވިދާޅުވިއެވެ.
Picnic island fehi kurumakee emme bodu iskameh dhey eh kanthah. Iraadha kurehviyyaa Kuda Giri Picnic Island varah fehi thnehge gothugaves Raiyyithunah fenihen dhaane. Gasthah hedhen vaguthu nagaane. https://t.co/q2EWgAjcVa
— Adam Azim (@adamazim) July 16, 2022
ސަރުކާރުން ތަރައްޤީކުރަން ފަށާފައިވާ ކުޑަގިރި ޕިކްނިކް އައިލެންޑް މިމަހުގެ 26 ވަނަ ދުވަހު ޢާއްމުނަށް ބޭނުންކުރުމަށް ހުޅުވާލުމަށް މަސައްކަތް ކުރައްމުންދާކަމަށް ސަރުކާރުންވަނީ ހާމަކުރައްވާފައެވެ. މިމަސައްކަތުގައި އެންމެ މުހިންމު ދައުރެއް އަދާކުރާ އެއް ކުންފުޏަކީ އެމްޓީސީސީއެވެ.
މާލޭގައި ދިރިއުޅޭ މީހުން ދަތުރުދިއުމަށް އެންމެ ކުރީއްސުރެ ބޭނުން ކުރަމުން އައިސްފައި ވަނީ ކުޑަ ބަނޑޮހެވެ. ނަމަވެސް ރިސޯޓެއް ހެދުމަށް އެރަށް ބަންދުކޮށްފައިވަނީ 2013 ވަނަ އަހަރުއެވެ. ކުޑަބަނޑޮހަށް ދަތުރުދިއުން ޢާއްމުންނަށް ބަންދުވުމާއެކު މާލޭގައި ދިރިއުޅޭ މީހުން ހިތްހަމަ ޖައްސާލައި ދަތުރުދިޔުމަށް އޮތް ހަމައެކަނި ފުރުސަތު ވަނީ ބަންދުވެފައެވެ. މިހާރު ގިނަ ބަޔަކު އާއިލާއާއެކު މޫދަށްގޮސްލާ ހަދަން ބޭނުންވާނަމަ ދާންޖެހެނީ ހުޅުމާލެ ނުވަތަ ވިލިމާލެއަށެވެ. ނޫނީ ފިނޮޅުތަކަށެވެ.
އެހެންނަމަވެސް މިހާރު ތަރައްޤީ ކުރަމުން އަންނަ ކުޑަގިރި ޕިކްނިކް އައިލެންޑާއިއެކު މާލެ ސަރަޙައްދުގައި ދިރިއުޅޭ ރައްޔިތުން ހިތްހަމަޖައްސާލުމަށް ދަތުރުދާނެ ރަށެއް ނެތުމުގެ ޝަކުވާއަށް ނިމުމެއް އަންނާނެއެވެ. ކުޑަގިރީގެ މަސައްކަތް ނިމިގެންދާއިރު، އާއިލާއާއެކު ދަތުރުގޮސްލާ، ހިތްހަމަޖައްސާލުމަށް ވަރަށް ހިތްގައިމު މަންޒިލަކަށް މިތަން ވެގެންދާނެކަމަށް އެމްޓީސީސީން ވިދާޅުވެއެވެ.
