ސްރީ ލަންކާގެ ރައީސް ގޮޓަބަޔަ ރާޖަޕަކްސަ މަގާމުން އިސްތިއުފާ ދެއްވައިފިކަން، އެގައުމުގެ ގާނޫނުހަދާ މަޖިލިހުގެ ރައީސް ރަސްމީކޮށް އިއުލާން ކޮށްފިއެވެ.
މިއަދު ހެނދުނު ސްރީ ލަންކާގެ ގަޑިން ހެނދުނު 7:30 ގައި ގާނޫނުހަދާ މަޖިލިހުގެ ރައީސް މަހިންދަ ޔަޕަ އަބޭވަރުދަނަ ގައުމީ ޓީވީ މެދުވެރިކޮށް، ގޮޓަބަޔަ އިސްތިއުފާ ދެއްވިކަން އިއުލާން ކުރައްވަމުން ވިދާޅުވެފައިވަނީ، ގޮޓަބަޔަ މަގާމުން އިސްތިއުފާ ދެއްވާފައިވަނީ މިމަހުގެ 14ވަނަ ދުވަހުން ފެށިގެން ކަމުގައެވެ.
އަދި އާ ރައީސަކުން އައްޔަން ކުރުމަށްޓަކާ މިމަހުގެ 16ވަނަ ދުވަހު ގާނޫނުހަދާ މަޖިލިސް އެއްވާނޭކަމަށްވެސް ގާނޫނުހަދާ މަޖިލިހުގެ ރައީސް ވިދާޅުވެފައި ވެއެވެ.
ސްރީ ލަންކާގެ ކުރީގެ ރައީސް ގޮޓަބަޔަ ރާޖަޕަކްސަ މަގާމުން އިސްތިއުފާ ދެއްވާފައިވަނީ، ފިއްލަވައިގެން ރާއްޖޭގެ މަގުން ސިންގަޕޯއަށް ވަޑައިގެންނެވުމަށްފަހު، އެމެއިލްއެއް މެދުވެރިކޮށެވެ.
ސްރީ ލަންކާގެ ގާނޫނުހަދާ މަޖިލިހުގެ ރައީސްގެ މީޑިއާ އޮފީހުން ހާމަ ކުރިން ކޮށްފައިވާ ގޮތުގައި، ގޮޓަބަޔަ ދަތުރު ކުރައްވަމުން ގެންދެވި މަތިންދާ ބޯޓު ސިންގަޕޯރއަށް ލޭންޑުކޮށް، ގޮޓަބަޔަ ސިންގަޕޯރއަށް ވަޑައިގެންނެވުމާއެކު އިސްތިއުފާގެ އީމެއިން (އިސްތިއުފާގެ ސިޓީ) ގާނޫނުހަދާ މަޖިލީހަށް ފޮނުއްވާފައި ވާކަމުގައެވެ.
އަދި އެ އީމެއިލްގެ ގާނޫނޫ ސައްޙަކަން ކަށަވަރު ކުރުމަށްފަހު، އިސްތިއުފާ ގަބޫލު ކުރެއްވިކަން މިއަދު (ހުކުރު ދުވަހު)ގެ ވަގުތެއްގައި ހާމަ ކުރައްވާނޭ ކަމަށްވެސް ގާނޫނުހަދާ މަޖިލިހުގެ ރައީސްގެ މީޑިއާ އޮފީހުން ކުރިން ހާމަ ކޮށްފައި ވެއެވެ.
ސްރީ ލަންކާއަށް ކުރިމަތިވެފައިވާ އިގްތިސާދީ ކާރިސާއިން އެގައުމަށް އަރައި ގަނެވޭނެ މަގެއް ނުފެނި، މަގާމުން އިސްތިއުފާ ދެއްވާނޭކަން އެންމެ ފުރަތަމަ ގޮތަބަޔަ ހާމަ ކޮށްފައިވަނީ ފާއިތިވެދިޔަ ހަފްތާގައެވެ. އޭރު ގޮތަބަޔަ ވިދާޅުވެފައިވަނީ މިމަހުގެ 13ވަނަ ދުވަހު މަގާމުން އިސްތިއުފާ ދެއްވާނޭ ކަމުގައެވެ.
ނަމަވެސް، ރައީސް ގޮޓަބަޔަ ގައުމު ދޫކޮށް ފިއްލަވާ ރާއްޖެ ވަޑައިގެންފައިވަނީ މަގާމުން އިސްތިއުފާ ދެއްވުމުގެ ބަދަލުގައި ވަގުތީ ރައީސްކަމުގެ މަގާމަށް ބޮޑުވަޒީރު ރަނިލް ވިކްރެމެސިންގެ އައްޔަން ކުރެއްވުމަށް ފަހުވެއެވެ.
ފިއްލަވައިގެން، ސްރީ ލަންކާގެ އަސްކަރީ މަތިންދާ ބޯޓެއްގައި ގޮޓަބަޔަ ރާއްޖެ ވަޑައިގެންފައިވަނީ އޭގެ ކުރީ ދުވަހު، ސްރީ ލަންކާގެ އިންޓަރނޭޝަނަލް އެއަރޕޯޓުން ދުބާއިއަށް ވަަޑައިގަންނަވަން ކުރެއްވި މަސައްކަތް ނާކާމިޔާބު ވެވަޑައިގަތުމާއި ގުޅިގެންނެވެ.
ގޮޓަބަޔަ ރާއްޖެ ވަޑައިގަތުމަށް ދިވެހި ސަރުކާރުން ފުރުސަތު ދެއްވުމާއި ގުޅިގެން ގިނަ ބައެއްގެ ފާޑުކިއުން ސަރުކާރަށް އަމާޒުވެފައި ވަނިކޮށް، ގޮޓަބަޔަ ރާއްޖެއިން ސިންގަޕޯރއަށް ވަޑައިގެންފައިވަނީ ސައުދީ އެއަރލައިންގެ ޕްރައިވެޓް ޖެޓެއްގައި އިއްޔެގެ މެންދުރުގެ ވަގުތެއްގައެވެ.
ސްރީ ލަންކާގެ ގާނޫނު އަސާސީގައި ވާގޮތުން، މަގާމުގައި ހުންނަވާ ރައީސް އިސްތިއުފާ ދެއްވައިފިނަމަ، ދައުރުގެ ބާކީ އޮތްބަޔަށް އާރައީސަކު އައްޔަންކުރާނީ އެގައުމުގެ ގާނޫނުހަދާ މަޖިލީހުންނެވެ.
