ރާއްޖޭގައި އެއްޖިއްސުން ގުޅުން ހިއްގާފައިވާކަމަށް ތުހުމަތު ކުރެވޭ މީހުން ރަށްރަށަށް ދިއުމުން އެމީހުންނަށް މަރުހަބާ ކިޔުމަކީ ލަދުވެތި ކަމެއްކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

ޝައިޚު ޒައިދު މިހެން ވިދާޅުވީ ނެށުންތެރިޔާ މަރިޔަމް ޝިފާ، އަޟްހާ އީދުގެ ކުޅިވަރުތަކުގައި ބައިވެރިވުމަށް ކ. ދިއްފުއްޓަށް ދިއުމުން އެ ރަށުގެ ގިނަ ބަޔަކު ނުކުމެ، އޭނާ އަށް މަރުހަބާ ކިޔުމާއި ގުޅިގެން ގިނަ ބައެއްގެ ފާޑުކުޔުން މިކަމަށް އަމާޒުވެފައިވާ ދަނޑިވަޅެއްގައެވެ.

މިމައްސަލާގައި ދިއްފުށީގައި ފާހަގަކުރާ އީދު ހަރަކާތްތަަކަށްވުރެ ބޮޑަށް ކިޔަމުންދާ ފާޑުކިޔުން ވަނީ ބޮޑުވެފައެވެ. މިކަން އެރަށުގެ ގިނަ ބަޔަކު ދަނީ ކުށްވެރިވެސް ކުރަމުންނެވެ.

މިމައްސަލާގައި ކަންބޮޑުވުން ފާޅުކޮށް، ރަށްރަށުގެ މީހުންނަށް އިލްތިމާސް ކުރައްވައި ޝައިޚު އަލީ ޒައިދު ވިދާޅުވީ އެއްޖިއްސުން ގުޅުން ހިންގާ މީހުން ރަށްރަށަށް ދިއުމުން އެމީހުންނަށް މަރުހަބާ ކިޔައި ހެދުމަކީ ލަދުވެތި ކަމެއްކަމަށެވެ. މިފަދަ މީހުންނަށް ރަށްރަށަށް ގެންދިއުމާއިމެދުވެސް ދެވަނަ ވިސްނުމަކުން ވިސްނަންޖެހޭކަމަށް ޒައިދު ވިދާޅުވިއެވެ.

ޝައިޚު ޒައިދު ވަނީ އެއްޖިއްސުން ގުޅުންހިންގި މައްސަލަތަކުގައި ބޮޑެތި ތުހުމަތު ކުރެވޭ މީހުން މިހާރުވެސް ދޫވެ އެމީހުންގެ މައްސަލަ ނުބަލާކަމުގެ ކަންބޮޑުވުން ފާޅުކުރައްވާފައެވެ. ވީޑިއޯއާއިއެކު ބައެއް މީހުންގެ މައްސަލަތައް ފެންމަތުވެފައިވާއިރު، އޭގެ ތެރެއިން ބައެއް މީހުން ރަސްމީ ކާރުކޮޅުގައި ފުލަހަށް ހާޒިރުކުރުމަށްފަހު ގެއަށް ގެންދިއުން ފިޔަވައި އެޅުއްވި އެއްވެސް ފިޔަވަޅެއް ފެނިފައިނުވެއެވެ.

އެއްޖިއްސުން ގުޅުން ހިނގާ މީހުންނަށް މަރުހަބާ ކިޔާ ހެދުމަކީ ލަދުވެތި ކަމެއް! ރަށް ރަށުގެ ބޭފުޅުން ދެފަހަރަށް ވިސްނަންވާނެ މިކަހަލަ ވިޔާނުދާ ކަންކަން ކުރުމުގެ ކުރިން! އެއް ޖިއްސުން ގުޅުން ހިންގާ މީހުންނާއިމެދު އަދިވެސް އެކަށީގެންވާ އެއްވެސް ނޭޅޭތީ ކަންބޮޑުވޭ.

– ޝައިޚު ޒައިދު ވިދާޅުވިއެވެ.

ގިނަ އަދަދެއްގެ ދިވެހިންނާ އެއްޖިއްސުން ގުޅުން ހިންގައި، ވީޑިއޯކުރި ބަންގްލަދޭޝް މީހެއްގެ މައްސަލަ އާއި، ބައެއް މީހުން އެއްޖިންސުން ގުޅުން ހިންގާ މަންޒަރު ފެންނަ ވީޑިއޯތަކެއްގެ މައްސަލަ ފުލުހުން ދަނީ ތަހުގީގް ކުރަމުންނެވެ. ނަމަވެސް މިހާތަނަށް މިމައްސަލަތަކުގައި މީހަކު ހައްޔަރުކޮށްފައި ނުވެއެވެ.