ރައީސް އިބްރާހީމް މުހައްމަދު ސޯލިޙުގެ ސިޔާސީ ހަޔާތްޕުޅުން ރައީސް ސާލިހަށް އޭނާ ދޫކޮށްނުލެއްވުނަސް, 2023ގެ ރިޔާސީ އިންތިޚާބުގައި ރައީސްއާއެކު މަސައްކަތް ކުރާން ދަތި ކަމަށް އެމްޑީޕީގެ ކުރީގެ ޗެއަރ ޕާރސަން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅު ވެއްޖެއެވެ.
ފާއިތުވެދުޔަ މަޖިލިސް އިންތިޚާބުގައި، އިމްތިޔާޒު ފަހުމީގެ ކެމްޕޭން ޖަލްސާއެއްގައި ވާހަދައްކަވަމުން، ހަސަންވެސް ހިމެނިވަޑައިގަންނަވާގެން، އެމްޑީޕީގެ އިސް ބައެއް ބޭފުޅުންގެ ނަންތައް ވިދާޅުވެ، އެބޭފުޅުންނަކީ އެމަނިކްފާނުގެ ސިޔާސީ ހަޔާތްޕުޅުގައި ހަނދާން ނައްތަވާލައްވާނޭ ބޭފުޅުން ނޫންކަމަށް ވިދާޅުވެ ރައީސް ސާލިހު ދެއްކެވި ވާހަކަފުޅުގެ ވީޑީއޯއެކު ހަސަން ލަތީފް ކުރެއްވި ޓުވީޓެއްގައި އޭނާ ވިދާޅުވެފައިވަނީ، ރައީސް ސާލިހާއެކު 2023ގެ ރިޔާސީ އިންތިޚާބުގައި މަސައްކަތް ކުރައްވަން އޭނާ ބޭނުންފުޅު ނުވަނީ ރައީސް ސާލިހަށް އެ އިންތިޚާބު އެމްޑީޕިއަށް ކާމިޔާބު ކޮށް ނުދެއްވޭނެކަމަށް އޭނާއަށް ފެނިވަޑައިގަންނަވާތީ ކަމުގައެވެ.
ރައީސް އިބްރާހީމް.މ.ސޯލިޙް. ރައީސްގެ ސިޔާސީ ހަޔާތްޕުޅުން ރައީސްއަށް އަޅުގަނޑު ދޫކޮށްނުލެއްވުނަސް, 2023 ގެ ރިޔާސީ އިންތިޚާބުގައި ރައީސްއާއެކު މަސައްކަތް ކުރާން އަޅުގަނޑަށް ދަތި. އަދި އަޅުގަނޑަށް ލަފާކުރެވެނީ ރައީސްއަށް އެ އިންތިޚާބު MDP އަށް ކާމިޔާބު ކޮށްދެއްވެން ނެތް ކަމަށް. pic.twitter.com/uR1X4KvaQv
— Hassan Latheef🎈 (@HassanLatheef) July 2, 2022
ފާއިތުވެދިޔަ އަހަރުއްސުރެ އެމްޑީޕީގެ އެތެރޭގައި އުފެދިފައިވާ ކޯޅުމުގައި ހަސަން ލަތީފު ފާޅުގައި ތާއީދު ކުރައްވާފައިވަނީ އެޕާޓީގެ ރައީސް މުހައްމަދު ނަޝީދުއަށެވެ. އަދި އޭނާއަކީ މަޖިލިހުގައި އުފެދިފައިވާ ދެ ފެކްޝަންގެ ތެރެއިން ނަޝީދުގެ ފެކެޝަނަށް ފާޅުގައި ތާއީދު ކުރައްވައިގެން ހުންނެވި މެމްބަރެއްވެސް މެއެވެ.
ހަމައެއާއެކު، ފާއިތުވެދިޔަ މޭމަހު ނިމިގެންދިޔަ، އެމްޑީޕީގެ ޗެއަރޕާރސަން އިންތިޚާބުގައިވެސް ހަސަން ލަތީފު ތާއީދު ކުރައްވާފައިވަނީ، ނަޝީދުގެ ތާއީދާއެކީ އެ އިންތިޚާބުގައި ވާދަކުރެއްވި އިމްތިޔާޒު ފަހުމީއަށެވެ. އެހެންނަމަވެސް އެ އިންތިޚާބު ކާމިޔާބު ކުރައްވާފައިވަނީ ރައީސް ސާލިހުގެ ތާއީދާއެކު އިންތިޚާބުގައި ވާދަ ކުރެއްވި، ރައީސް ސާލިހުގެ ކެބިނެޓުގެ އިކޮނޮމިކް މިނިސްޓަރު ފައްޔާޒު އިސްމާއިލަށެވެ.
ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ތާއީދު ނުކުރައްވާނޭކަން ހަސަން ލަތީފް ހާމަ ކުރައްވާފައި ވާއިރު، ރޭ ބޭއްވުނު އާސްކް ސްޕީކަރ ޕްރޮގްރާމްގައި ވާހަކަ ދައްކަވަމުން އެމްޑީޕީގެ ރައީސް މުހައްމަދު ނަޝީދު ވިދާޅުވެފައިވަނީ އެޕާޓީއަށް އެންމެ ރަގަޅު ގޮތަކީ 2023ގެ ރިޔާސީ އިންތިޚާބުގައި ރައީސް ސާލިހު ވާދަ ނުކުރުންކަމުގައެވެ.
މި ޕްރޮގްރާމްގައި ވާހަކަ ދައްކަވަމުން ނަޝީދު ވިދާޅުވީ އެމްޑީޕީގެ އެތެރޭގެ ކަންކަން ހިނގަމުންދާ ގޮތަށް ބަލައި، އަދި ރާއްޖޭގެ ކަންކަން ކުރިއަށްދާ މިސްރާބަށް ބަލާއިރު ރައީސް ޞާލިހު ވާދަ ނުކުރެއްވުމަކީ ޕާޓީއަށް އެންމެ ފައިދާވާނެ ގޮތްކަމުގައެވެ.
އެހެންނަމަވެސް ރައީސް ސާލިހު އެންމެ ފަހުން ނޫސްވެރިންނާ ބައްދަލު ކުރައްވާ ވާހަކަ ދައްކަވަމުން ވިދާޅުވެފައިވަނީ، 2023ގެ ރިޔާސީ އިންތިޚާބު އެމްޑީޕީއަށް ކާމިޔާބު ކުރަން ބޭނުންވާނަމަ، ޗޮއިސްއެއްގެ ގޮތުގައި އެމަނިކްފާނު ހުންނެވި ކަމުގައެވެ.
ހަސަން ލަތީފު ހިމެނިވަޑައި ގެންނެވީ، އެމްޑީޕީގެ އިސް ސަފުގައި ތިއްބެވި ބޭފުޅުންގެ ތެރެއިން ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ތާއީދު ނުކުރައްވާނޭކަމަށް ފާޅުގައި ވިދާޅުވި ފުރަތަމަ ބޭފުޅާ ކަމުގައެވެ.
ކޮމެންޓު ފޮނުވާ