އިސްލާމް ދީނުގައި ކައިވެނި ކުރުން ހުއްދަ ކުރައްވާފައި ވާއިރު، ކައިވެނީގެ އިމުގެ ތެރެއިން، މާތްﷲ ރުހިވޮޑިގެންވާ މަގުންމެ މެނުވީ ޖިންސީ ޢަރީޒާ ފުރިހަމަ ކޮށްގެން ނުވާނެކަމުގައި މިއަދުގެ ހުކުރު ޚުތުބާގައި ވިދާޅު ވެއްޖެއެވެ.
"ފާޙިޝް އަމަލުތަކާއި ދުރުހެލި ވާށެވެ!" މި މައުޟޫއުގެ މައްޗަށް ޚާއްސަ ކުރެވިގެންދިޔަ މިއަދު ހުކުރު ޚުތުބާގައި ވިދާޅުވެފައިވަނީ ދުނިޔެއާއި އާޚިރަތުގެ ބާއްޖަވެރިކަން ހާސިލް ކުރެވޭނީ މާތްﷲ އާއި އެކަނލާގެ ރަސޫލާއަށް ތަބާވެގެން ކަމުގައެވެ. އަދި މާތްﷲގެ މަގަށް ތަބާވެ ތަގުވާވެރިވީ މީހުންނަށް ތަނަވަސް ވެގެންވާ ސުވަރުގެތައް ތައްޔާރު ކުރައްވާފައި ވާކަމުގައިވެސް ޚުތުބާގައި ބަޔާން ކުރައްވާފައި ވެއެވެ.
އިތުރަށް ހުކުރު ޚުތުބާގައި ވިދާޅުވެފައިވާ ގޮތުގައި ދުނިޔޭގައި ފެތުރެމުންދާ ނުރައްކާތެރި ބަލިތަކާއި ވަބާތަކާމެދު ވިސްނާލާއިރު، އެންމެ ނުރައްކާތެރިކަން ބޮޑީ ޙަރާމް ގޮތުގައި ހިންގާ ޖިންސީ ގުޅުންތަކުގެ ސަބަބުން ފެތުރޭ ބަލިތަކެވެ.
މިފަދަ ބަލިތައް އިންސާނުންގެ ތެރޭގައި ފެތުރެނީ، އިންސާނުން އަމިއްލައަށް ކުރާ ފާޙިޝް އަމަލުތަކުގެ ސަބަބުންނެވެ. މާތްﷲ ކަނޑއަޅުއްވާފައިވާ ޝަރުއީ ނިޒާމުން ބޭރު ވުމުގެ ސަބަބުންނެވެ. އެއް ޖިންސުން ގުޅުން ހިންގުމާއި، ޒިނޭ ކުރުމާއި، އެކިއެކި ނަހަމަ ޖިންސީ އަމަލުތަކުގެ ތެރެއަށް މީސްތަކުން ގެނބިގެން ދިއުމުގެ ސަބަބުންނެވެ.
ޚުތުބާގައި ވިދާޅުވެފައި ވެއެވެ.
މިއަދުގެ ހުކުރު ޚުތުބާގައި ބަޔާން ކުރައްވާފައިވާ ގޮތުގައި، ބައެއްގެ ތެރޭގައި ފާޙިޝް އަމަލުތައް ފެތުރިއްޖެނަމަ، ކުރީގެ އުއްމަތްތަކުގެ މީހުންގެތެރެއަށް ފާޅު ނުކުރައްވާފަދަ ބަލިމަޑުކަމާއި، ވަބާތައް އެބައެއްގެ ތެރޭގައި ފާޅު ކުރައްވާނޭކަމުގެ އިންޒާރު ކީރިތި ރަސޫލާވަނީ ދެއްވާފައެވެ.
އަދި މީގެކުރިން އެފަދަ ނުބައި އަމަލުތައް ހިންގި އުއްމަތްތަކަށް ވެގެންދިޔަ ގޮތް ކީރިތި ޤުރުއާންގައި ބަޔާން ކުރައްވާފައިވަނީ އެވާހަކަތަކުން އިބުރަތް ލިބިގަތުމަށްޓަކާ ކަމަށްވެސް ޚުތުބާގައި ވިދާޅުވެފައި ވެއެވެ.
ޚުތުބާގައި ވިދާޅުވެފައިވާ ގޮތުގައި، ޒިނޭކުރުމާއި އެއްޖިންސުން ގުޅުން ހިންގުން އިސްމާލްދީނުގައި މަނާ ކުރައްވާފައިވަނީ، ފާފަވެރި ވުމުގެ އިތުރަށް އެކަންކަމުގެ ސަބަބުން ދިމާވާ އިޖުތިމާޢީ، އަޚްލާގީ މައްސަލަތަކާއި، ފެތުރޭ ނުރައްކާތެރި ވަބާތަކާއި، ބަލިތަކުން ފަރުދުންނާއި މުޖުތަމައު ސަލާމަތް ކުރެއްވުމަށެވެ.
ޖިންސީ ނަހަމަ ގުޅުންތަކުގެ ސަބަބުން ފެތުރޭ ބަލިތަކުގެ ތެރޭގައި، ހަށިގަޑުގެ ދިފާޢީ ނިޒާމު ހަލާކުކޮށްލާ ބަލިތައް ހިމެނެއެވެ. އެފަދަ ބަލިތަކަށް ބޭސް ކުރިޔަސް ޝިފާ ލިބުން ލަސްވެއެވެ. ގުނަވަންތައް ފޭލްވެއެވެ. އެންމެ ފަހުން މަރާ ކުރިމަތިލާން ޖެހެއެވެ. މިއީ މިޒަމާނުގެ ޑޮކްޓަރުން ކަށަވަރު ކޮށްދީފައިވާ ހަގީގަތެކެވެ.
ޚުތުބާގައި ވިދާޅުވެފައި ވެއެވެ.
އަދި މީގެ ސާދަސަތޭކަ އަހަރުކުރިން މާތް ނަބިއްޔާ މިކަންކަން އުއްމަތަށް އަންގަވާ ދެއްވާފައިވާކަން ބަޔާން ކުރައްވަމުން، ފާހިޝް އަމަލުކުރުމަށް ހިތްވަރުދޭ މީހުންނާއި އެކަން މަނާކުރުމަށް މަސައްކަތް ނުކުރާ މީހުންގެ މައްޗަށް ކޯފާ އަތުވެދާނޭކަމުގެ އިންޒާރުވެސް މިއަދު ޚުތުބާގައި ދެއްވާފައި ވެއެވެ.
