ފާއިތުވީ ހަފްތާތަކުގައި ރަޝިއާއި ޔޫކުރެއިން ސިފައިންނާ ދެމެދު އެންމެ ވަރުގަދައަށް ހަގުރާމަ ހިގަމުންދިޔަ، ޔޫކުރެއިންގެ އިރުމަތީ ސިޓީއެއް ކަމުގައިވާ ސިވަރޑޮނެސްކް ސިޓީ ދޫކޮށް ޔޫކުރެއިން ސިފައިން ދިއުމާއި ގުޅިގެން މިސިޓީ ރަޝިއާގެ ބާރުގެ ދަށަށް ގޮސްފިއެވެ.
މި ސިޓީ ދޫކޮށް ޔޫކުރެއިން ސިފައިން ގޮސްފައިވަނީ، ފާއިތުވި ގިނަ ހަފްތާތަކުގައި މި ސިޓީގެ މަގުތަކުގައި ރަޝިއާ ސިފައިންނާ ދެކޮޅަށް ހަގުރާމަ ކުރުމަށްފަހު، އިތުރަށް ޔޫކުރެއިން ސިފައިންނަށް ލިބިގެންދާނެ ގެއްލުން ކުޑަ ކުރުމުގެ ގޮތުންނެވެ.
ޔޫކުރެއިންގެ ލުހާންސްކު ސަރަހައްދުގެ ގަވަރުނަރު ވިދާޅުވެފައިވާ ގޮތުގައި، "މިހާރުގެ ހާލަތަކީ ޔޫކުރެއިން ސިފައިން ސާބިތުވެ ތިބި ތަންތަނުގައި އިތުރަށް ހަނގުރާމަ ކުރަން ތިބުމުގެ ބޭނުމެއް ނެތް ހާލަތެއް" ކަމުގައެވެ.
"މި ސަބަބަށްތަކާ އަހަރެމެންގެ ދިފާޢީ ސިފައިން މި ސަރައްދު ދޫކޮށް ގޮސް، އާ ސަރަހައްދުތަކުގައި ސާބިތުވެ ތިބި، އަސްކަރީ އޮޕަރޭޝަން ކުރިޔަށް ގެންދިއުމަށް ވަނީ އެންގިފަ،" އޭނާ ވިދާޅުވެފައި ވެއެވެ.
ސިވަރޑޮނެސްކް ސިޓީގައި ޔޫކުރެއިން ސިފައިން އެސިޓީ ދިފާއު ކުރަމުން ދިޔަނަމަވެސް، އެސިޓީގެ ބޮޑުބައެއް މިހާތަނަށް އޮވެފައިވަނީ ރަޝިއާ ސިފައިންގެ ބާރުގެ ދަށުގައެވެ. ޔޫކުރެއިން ސިފައިން މިސިޓީ ދޫކޮށް ދިއުން ވެގެން ދާނީ، ޔޫކުރެއިން އިރުމަތީ ޑޮންބަސް ހިފުމަށް ރަޝިއާ ސިފައިން ކުރަމުންދާ ހަނގުރާމާގައި އެ ގައުމުގެ އަސްކަރިއްޔާއަށް ލިބިގެންދިޔަ ވަރަށް ބޮޑު ކާމިޔާބެއް ކަމުގައެވެ.
