ޔޯގާ އިވެންޓު ބޭއްވުމަކީ އެންމެ ފުރަތަމަ ހިންގުނު ގޯސް ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

ރާއްޖޭގެ ގިނަ އަދަދެއްގެ ދީނީ އިލްމުވެރިން ޔޯގާ އިވެންޓު ނުބޭއްވުމަށް ތަކުރާރުކޮށް ސަރުކާރާއި ކަމާއި ގުޅުންހުރި އިދާރާތަކުގައި ދެންނެވި ނަމަވެސް، އަންގާރާ ދުވަހު ވަނީ މިއިވެންޓު ބާއްވަން މަސައްކަތް ކޮށްފައެވެ. އިވެންޓު ބޭއްވުމަށް ރަސްފަންނު ނުދިނުމުން މިއިވެންޓު ބާއްވަން މަސައްކަތް ކުރީ ގަލޮޅު ދަނޑުގައެވެ. ދަނޑުގައި އެހަރަކާތް ހިންގުމަށް ނިންމުމުންވެސް އެއީ ދީނީ ގޮތުން ރަނގަޅު ކަމެއް ނޫންކަމަށް ބުނެ ތަކުރާރުކޮށް އިލްމުވެރިން ދިޔައީ މިކަން ނުކުރުމަށް ސަރުކާރަށް ދަންނަވަމުންނެވެ.

މިހަރަކާތާއި ދެކޮޅަށް އަންގާރަ ދުވަހު ހިނގި ހަމަނުޖެހުމާއި ގުޅިގެން ޝައިޚު ޒައިދު ވިދާޅުވީ، ފުރަތަމަ ގޯހަކީ ޔޯގާ އިވެންޓް ބޭއްވުންކަމަށެވެ. މިއާއިއެކު ތަޅާފޮޅާ ހަމަނުޖެހުން ހިންގުމަކީވެސް ބަލައި ގަނެވޭނެ ކަމެއް ނޫންކަމަށެވެ. މުންކަރާތެއް ހިނގާނަމަ އެކަމާއި ދެކޮޅަށް އަޑު އުފުލުމަކީ ކޮންމެ މީހަކަށްވެސް ލިބިގެންވާ ހައްގެއްކަމަށް ޝައިޚު ޒައިދު ވިދާޅުވިއެވެ. އަދި އެފުރުސަތު ދޭންޖެހޭކަމަށްވެސް ޝައިޚު ވިދާޅުވިއެވެ.

ޔޯގާ އިވެންޓު ބޭއްވުމަކީ އެންމެ ފުރަތަމަ ހިންގުނު ގޯސް! އަދި ތަޅާފޮޅުން ހިންގުމަކީވެސް ގޯހެއް! ނަމަވެސް ސުލްހަވެރި ކަމާއިއެކު ޝުޢޫރުފާޅު ކުރުމުގެ ޖާގަ ދިވެހި ކޮންމެ ރައްޔިތަކަށްވެސް އޮންނަންވާނެ! ވަކިން ޚާއްސަކޮށް ބޮޑު މުންކަރާތެއް ހިންގާނަމަ އެކަމާއި ދެކޮޅަށް ވާހަކަ ދެއްކުން ވާޖިބު.

– ޝައިޚު އަލީ ޒައިދު ވިދާޅުވިއެވެ.

މިހަމަނުޖެހުންތަކާއިއެކު ސަރުކާރުން ވަނީ ދިވެހިރާއްޖޭގެ ޚާރިޖީ މަޞްލަހަތަށް ގެއްލުންދިނުމުގެ ޢަމަލުތަކަކީ ޖިނާޢީ ކުށެއްގެ ގޮތުގައި ކަނޑައެޅުމަށް ޤާނޫނަށް އިޞްލާހު ގެނައުމަށް ނިންމާފައެވެ. މިބިލާއިމެދު ކަންބޮޑުވުން ފާޅުކޮށް ޒައިދު ވިދާޅުވީ ޤައުމުގެ ޚާރިޖީ ކަންކަމަށްޓަކައި، ދިވެހިންގެ ދީނާއި، އިސްލާމީ އާދަތައް ކޮމްޕްރޮމައިޒް ކޮށްގެން ނުވަނެކަމަށެވެ.

ޚާރިޖީ ގުޅުންތަކަށްޓަކައި ޤައުމުގެ އިސްލާމް ދީނާއި، މިނިވަންކަން ކޮމްޕްރޮމައިޒް ކުރެވިގެން ނުވާނެ! މިހާރު ޑްރާފްޓްކޮށް ފޮނުވާފައިވާކަމަށް ބުނާ ބިލްގައި ކޮންބޮޑުވުންތައް އެބަހުރި! އެބިލުން ރާއްޖޭގެ ދާޚިލީ މިނިވަންކަމާއި ދީނުގެ ހަމަތަކަށް ބުރޫއަރާ ކަމުގެ ޝަކުވާ އަޑުއަހައިފިން.

– ސަރުކާރުން ހުށަހަޅާފައިވާ ބިލަށް ކަންބޮޑުވުންފާޅުކޮށް ޝައިޚު ޒައިދު ވިދާޅުވިއެވެ.

ސަރުކާރުގެ ފަރާތުން މި ބިލު ހުށައެޅުމުގެ ބޭނުމަކީ ދިވެހިރާއްޖޭގެ ޤާނޫނުލްޢުޤޫބާތުގައި ބަޔާންކުރާ އަމަންޢާންމާއި، ރައްކާތެރިކަމާއި، އަޚްލާޤީ މިންގަނޑުތަކާގުޅޭ ކުށްތަކުގެ ތެރޭގައި، ދިވެހިރާއްޖޭގެ ޚަރިޖީ މަޞްލަހަތަށް ގެއްލުންދިނުމުގެ ޢަމަލުތައް ވަކި ކުށެއްގެ ގޮތުގައި ހިމެނުންކަމަށް ބަންޑާރަ ނާއިބުގެ އޮފީހުން ވިދާޅުވެއެވެ. އަދި އެ ކުށުގެ ގޮތުގައި ބެލެވޭނެ ޢަމަލުތައް ސާފުކޮށް ބަޔާންކުރުމަށްޓަކައި، އެ ޤާނޫނަށް ގެންނަންޖެހޭ އިޞްލާހުތައް ގެނައުމަކީވެސް އެ އިސްލާހުގެ މަޤްޞަދެއްކަމަށް ބަންޑާރަ ނާއިބުގެ އޮފީހުން ވިދާޅުވިއެވެ.

މި އިޞްލާހުގެ ދަށުން ކުށެއްގެ ގޮތުގައި ކަނޑައެޅުމަށް ހުށައަޅާ މައިގަނޑު ކަންތައްތަކުގެ ތެރޭގައި:

– އެހެން ޤައުމެއްގެ ދިދައަށް ޤައުމީ ރަމްޒަކަށް ނުވަތަ ނިޝާނަކަށް ގެއްލުންދިނުން ނުވަތަ ބަދަލުގެނައުން.
– އެހެން ޤައުމަކަށް ނިސްބަތްވާ މުއައްސަސާއަކަށް ގެއްލުންދިނުން ނުވަތަ ގެއްލުންދިނުމުގެ ގޮވާލުން.
– އެހެން ޤައުމެއްގެ ރައްޔިތަކަށް ވީތީ ފުރައްސާރަކުރުމުގެ ގޮތުން އަނިޔާ ދިނުން ނުވަތަ އަނިޔާއެއް ދިނުމަށް ގޮވާލުން.
– އެހެން ޤައުމެއްގެ ރައްޔިތަކަށް ވީތީ، ދިވެހިރާއްޖެ ދޫކޯށްދިނުމަށް ގޮވާލުން.

ދިވެހިރާއްޖޭގެ ޚާރިޖީ މަޞްލަހަތަށް ގެއްލުންދިނުމުގެ ޢަމަލުތަކަކީ ޖިނާޢީ ކުށެއްގެ ގޮތުގައި ޤާނޫނުގައި ކަނޑައެޅުމަށް ސަރުކާރުން ނިންމާފައި މިވަނީ އިދިކޮޅުން އިސްނަގައިގެން އިންޑިއާ އާއި ދެކޮޅަށް ހިންގާ ހަރަކާތްތަކަކީ ޤައުމީ ސަލާމަތަށް ނުރައްކާއޮތް އަދި ރާއްޖޭއިން ބައިވެރިވެފައިވާ ބައިނަލްއަޤްވާމީ މުއާހަދާތަކާއި ޚިލާފު ޢަމަލެއްކަމަށް ރައީސުލްޖުމްހޫރިއްޔާ ކަނޑައަޅުއްވާފައިވަނިކޮށެވެ.