ސަރުކާރުން އަންގާފައިވާ އެންގުމާއި އެއްގޮތަށް މިސަރުކާރުން ގަޔާނުވާ އެންމެން ހިފާ ހައްޔަރު ކުރަމުންދާކަމަށް ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
އިއްޔެ ހިންގި ޔޯގާ ހަރަކާތަށް ހުރަސް އަޅައި ހަމަނުޖެހުން ހިންގިކަމަށްބުނެ ފުލުހުން ދަނީ ގިނަ ބަޔަކު މިރޭ ހައްޔަރު ކުރަމުންނެވެ. ފުލުހުން ވަނީ ޕީޕީއެމްގެ ހަރަކާތު ކޮމެޓީގެ ޗެއާ މުހައްމަދު އިސްމާއިލާއި، ޕީޕީއެމްގެ ކައުންސިލް މެމްބަރު އިބްރާހިމް ރައްޒާންވެސް ހައްޔަރުކޮށްފައެވެ. މީގެ އިތުރުން ދީނީ އިލްމުވެރިންގެ ތެރޭގައި ހިމެނޭ ޝައިޚު ފަޒުލޫނާއި، ޝައިޚު އާދަމް ނިޝާންވެސް ވަނީ ހައްޔަރު ކޮށްފައެވެ.
ޝިޔާމް ވިދާޅުވީ މީހުން ހައްޔަރު ކުރަމުންދަނީ އެއްވެސް ހައްދެއްނެތި، އަދި ހެތްކެތްވެސް ނެތިކަމަށެވެ. މިހާރު ކަންކަން ދާގޮތުން ޖަލުގައި މީހުން ބޭތިއްބުމަށް ބޭނުންވަނީވެސް ޅިޔަނު ސީޕީ ހަމީދުގެ ހެއްކެއްކަމަށް ޝިޔާމް ވިދާޅުވިއެވެ.
ސަރުކާރުން ދަނީ ފުލުހުންގެ އިންޓަލިޖެންސް މައުލޫމާތުގެ އަލީގައި ކަމަށްބުނެ ގަޔާނުވާ މީހާ ހިފާ ހައްޔަރުކުރަމުން. ތުހުމަތުގައި ޖަލުގައި ބާއްވަން ހެއްކެއް ބޭނުމެއް ނުވޭ، ބޭނުންވަނީ ޅިޔަނު މުހައްމަދު ހަމީދުގެ ސަބަބެއް.
– ޝިޔާމް ވިދާޅުވިއެވެ.
Sarukaarun dhanee fuluhunge 'intelligence' mauloomaathuge aleegai kamah bune gayaanuvaa meeha hifaa hayyarukuramun. Thuhumathugai jalugai baavvan hekkeh beynumeh nuvey, beynunvanee lhiyanu @M_Hameedh ge 'sababeh'🤷🏽.
PPM ge CMs @Muhmed_Ismail adhi @TakeeTakei dhookollan govaalan. pic.twitter.com/mkabT17Zcg— Ahmed Shiyam (@Shiyamaldives) June 22, 2022
މިހަމަނުޖެހުމާއި ގުޅިގެން އިއްޔެ ޕީޕީއެމްއުން ބޭއްވި ނޫސްވެރިންގެ ބައްދަލުވުމުގައި އެޕާޓީން ބުނެފައިވަނީ މިހަމަނުޖެހުމަކީ ސަރުކާރުން ބޭނުން ވެގެން ހިންގި ހަމަނުޖެހުމެއް ކަމަށެވެ. މިހަމަނުޖެހުން އިންސާފުވެރިކަމާއިއެކު ތަހުގީގްކޮށް، މިކަމުގައި ޝާމިލުވާ މީހުންނާއިމެދު އިންސާފުވެރި ކަމާއިއެކު އަމަލު ކުރެވެންޖެހޭކަމަށް އިއްޔެ ޕީޕީއެމްއިން ބޭއްވި ނޫސްވެރިންގެ ބައްދަލުވުމުގައި ވަނީ ބުނެފައެވެ.
މިރޭ ހިންގަމުންދާ ޚާއްސަ އޮޕަރޭޥޝަންގައި މިހާތަނަށް ވަނީ 4 މީހަކު ހައްޔަރުކޮށްފައެވެ. މިއާއިއެކު މިމައްސަލާގައި ހައްޔަރު ކުރި މީހުންގެ އަދަދުވަނީ 10 އަކަށް އަރާފައެވެ.
