ގައްދޫ ގޭދޮށު މަސްޕްލާންޓުގެ މަސައްކަތަށް ހުރަހެއް ނާޅަން: އަމީރު

ގ.ގައްދޫގައި ގާއިމް ކުރުމަށް ހަމަޖެހިފައިވާ ގޭދޮށު މަސް ޕްލާންޓުގެ މަސައްކަތް ހުއްޓުވުމަށްޓަކައި ފިނޭންސް މިނިސްޓްރީން އެއްވެސް މަސައްކަތެއް ކޮށްފައި ނުވާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

މިނިސްޓަރ އަމީރު މިހެން ވިދާޅުވީ ސަރުކާރުން ރާއްޖޭގެ އެކި ހިސާބުތަކުގައި ގާއިމް މަސައްކަތް ކުރަމުންދާ ގޭދޮށު މަސް ޕްލާންޓުގެ ތެރެއިން ގައްދޫގައި ގާއިމް ކުރުމަށް ހަމަޖެހިފައިވާ، ގޭދޮށު މަސްޕްލާންޓުގެ މަސައްކަތް ކުރިއަށް ނުދާ ސަބަބު ސާފުކޮށް ދެއްވުމަށް ގައްދޫ ދާއިރާގެ މެމްބަރު އަހުމަދު ޒާހިރު ލިޔުމުން ޖަވާބު ހޯއްދެވުމަށް ފޮނުއްވި ސުވާލުގެ ޖަވާބުގައެވެ. ފިނޭންސް މިނިސްޓަރު އިބްރާހީމް އަމީރު އާއި ގައްދޫ ދާއިރާގެ މެންބަރު އަހްމަދު ޒާހިރަކީ ގައްދޫ އަށް ނިސްބަތްވާ ދެ ބޭފުޅުންނެވެ.

މިނިސްޓަރ އަމީރު ވިދާޅުވީ ދައުލަތުގެ މާލިއްޔަތުގެ ގަވާއިދުގައި ބަޔާންކުރާ ގޮތުގެ މަތީން ޕްރޮކިއުމަންޓެއްގެ އަގު 5 މިލިޔަން ރުފިޔާއަށް ވުރެ ބޮޑުނަމަ އެކަމެއް ކުރުމަށް ހުއްދަ ދޭނީ ޓެންޑަަރ ބޯޑަށް ހުށަހަޅައި އެބޯޑުން ނިންމާ ގޮތެއްގެ މަތީންކަމަށެވެ. ގައްދޫ ކައުންސިލުން ކުރިއަށް ގެންދިޔަ ގޭދޮށު މަސްޕްލާންޓް ހަދައި އަދި ހިންގާނެ ފަރާތެއް 17 ޑިސެމްބަރު 2020 ގައި ކުރި އިއުލާނާއި ގުޅިގެން ޕްރޮކިއުމަންޓް މަރުހަލާ އަދި އެކަމާއި ގުޅޭ އެއްވެސް ކަމެއް ފިނޭންސް މިނިސްޓްރީގެ ފަރާތުން ކޮށްފައި ނުވާނެކަމަށް މިނިސްޓަރ އަމީރު ވަނީ ވިދާޅުވެފައެވެ.

ގައްދޫގައި ގާއިމް ކުރުމަށް ހަމަޖެހިފައިވާ ގޭދޮށު މަސް ޕްލާންޓްގެ މަސައްކަތް ކުރުމަށްޓަކައި މިހާރު ކުރެވެމުންދަނީ ޑެންޑަރިންގެ މަރުހަލާއެވެ. ގޭދޮށު މަސް ޕްލާންޓް ގާއިމް ކުރުމަށްޓަކައި ކައުންސިލުންވަނީ ބިންވެސް ކަނޑައަޅާފައެވެ.

މަޖިލީހުގައި މިދިޔަ ހަފްތާގައި ވާހަކަ ދައްކަވަމުން އަހުމަދު ޒާހިރު ވިދާޅުވީ ލާމަރުކަޒީ ނިޒާމުގެ ތެރެއިން ބޭރުގެ އިންވެސްޓަރުން ޝައުގުވެރިވެގެން މަސްފެކްޓްރީއެއް އަޅަން ހުށަހެޅުން ކައުންސިލް ބިޑްކޮށްގެން އެމީހުންނަށް އެކަން ކާމިޔާބު ވުމުން ދެން ސަރުކާރުން ކައުންސިލް ތެރެއަށް އަތްބާނައިގެން ނުފޫޒު ފޯރުވައިގެން އެބިޑް ފޮނުވާލީ އިކޮނޮމިކް މިނިސްޓްރީއަށް ކަމަށެވެ.

މިގޮތަށް 8 މަސްދުވަހު ކައުންސިލާއި، އިންވެސްޓަރުންނާއި ދެމެދު މިކަން ހިނގައިދިޔަފަހުން، އެގްރީމަންޓް ތައްޔާރުކޮށް އެލްޖީއޭގެ ހުއްދައާއިއެކު މަސައްކަތް ފެށުމަށް ކޮންޓްރެކްޓް ކުރަން އުޅުމުން ސަރުކާރުގެ ނުފޫޒުން ކައުސިލް އެންގީ ބިޒްނަސް ރަޖިސްޓްރީ ކޮށްގެން އައުމަށްކަމަށެވެ. އެކަން ކޮށްގެން ކޮންޓްރެކްޓަރު އައުމުންވެސް އަދިވެސް އިތުރަށް މަޝްވަރާ ކުރަންޖެހޭ ކަމަށްބުނެ މަސައްކަތް ހުއްޓުވާފައިވާކަމަށް އަހުމަދު ވިދާޅުވިއެވެ.

މިކަންކަމަށް ބައެއް ވަޒީރުން ދަނީ ކައުންސިލަށް ނުފޫޒު ފޯރުވަމުން. ޚާއްސަކޮށް، މިޤައުމުގެ ފިނޭންސް މިނިސްޓަރު ކައުންސިލް ރައީސަށް ނުފޫޒު ފޯރުވައިގެން ކުރާހާ ކަންތައްތައް. ތެދެއްމެ ކައުންސިލް ރައީސް ހުރީ މަޅިއެއްގައި ބެދިފަ. އެހެންވީމާ އެބޭފުޅާ ސަލާމަތް ވާންވެގެން ވަޒީރު ބުނާހާ ގޮތަކަށް ކަން ކުރަމުން އެބަ ގެންދޭ. މިއީ ދެރަކަމެއް. ގައްދޫ ރައްޔިތުންނަށް އެލިބޭ ގެއްލުމުގައި ފިނޭންސް މިނިސްޓަރު ޒިންމާ ނަގަންޖެހޭ. އަޅުގަނޑު މިކުރަނީ ފިނޭންސް މިނިސްޓަރަށް ވަރަށް ބޮޑު ތުހުމަތެއް. ކަނޑައެޅިގެން މިކަން ކުރާކަން އެނގިހުރެ އަޅުގަނޑު މިތުހުމަތު ކުރަނީ.

– އަހުމަދު ޒާހިރު ވިދާޅުވިއެވެ.

އަހުމަދު ވަނީ މިކަމުގައި ކައުންސިލް ރައީސް ސަރުކާރުން ބުނާހާ ގޮތެއް ހަދަން ޖެހިފައިވަނީ އޭނާ މަޅިއެއްގައި ބެދިފައި ހުންނަން ޖެހުމުންކަމަށެވެ. އަހުމަދު ވަނީ ގައްދޫ ތައްރައްގީއަށް ކުރެވޭ ކަންކަމުގައި މިނިސްޓަރ އަމީރު ވަރަށް ބޮޑަށް ހުރަސް އަޅަމުންދާކަމަށް ތުހުމަތު ކުރައްވާފައެވެ. އަދި ސަރުކާރުގެ ނުފޫޒު ބޭނުންކޮށްގެން ތަރައްޤީ ހުއްޓުވަމުންދާކަމަށް އޭނާ ވިދާޅުވިއެވެ.