ވަރަށް މަދުން ނޫނީ ފިލްމެއް ކުޅެލަން ނުލިބޭ އެކްޓަރު އަބޭ ޑިއޯލް ވަނީ ބޮލީވުޑްގެ ފަތިފުށް އޮތްގޮތް ދާދިފަހުން ހާމަކޮށްފައެވެ.
އިންޓަވިއުއެއްގައި ވާހަކަދައްކަމުން އަބޭ ބުނެފައިވަނީ ބޮލީވުޑްގެ ތަރިން، އެކަކު އަނެކަކު ދެކެ "ލައިކް" ވާކަން ދެއްކުން ހުއްޓާލަން ވެއްޖެކަމަށެވެ. އަދި އެކަހަލަ އެކުވެރި މާހައުލެއް އިންޑަސްޓްރީގައި ނެތް ކަމަށްވެސް އޭނާ ބުނެފައިއެވެ.
މީގެ ކުރިންވެސް ބޮލީވުޑްގައި މިފަދަ އެތައް މައްސަލަ ތަކެއް އުޅޭ ކަމުގެ އަޑުތައް ވަނި ގަދަވެފައެވެ. އަދި ދެތަރިންގެ މެދުގައި އެއްވެސް ރަހުމަތްތެރިކަމެއް ނޯންނަ ކަމަށާއި ފިތުނަ ފަސާދައާއި އެކަކަށް ވުރެ އަނެކަކު ކުރިއަރަށް ބޭނުން ނުވާފަދަ އެތައް ވާހަކަތަކެއް ވަނީ ފެންމަތި ވެފައެވެ.
އަބޭ ޑިއޯލް އަކީ ބޮލީވުޑްގައި މާގިނަ ފުރުސަތު ތަކެއް ނުލިބުނު ފަންނާނުންގެ ތެރެއިން އެކަކެވެ. އޭނާގެ ކެރިއަރު ކުރިއަށް ދަނީ ވަރަށް ބަނަ ކޮށެވެ. އަދި ފިލްމު ތަކުގައި އާންމުކޮށް ފެންނަނީ ވެސް ސަޕޯޓިން ރޯލު ތަކުންނެވެ.
"ޒިންދަގީ ނާ މިލޭގީ ދުބާރާ" ފަދަ ފިލްމު ތަކުގައި މޮޅު އެކްޓިންއެއް ދެއްކި އެކްޓަރުގެ އެންމެ ފަހުން ފެނިގެން ދިޔަ ފިލްމަކީ މިއަހަރުގެ މެއި މަހުގެ 20 ވަނަ ދުވަހު ރިލީޒްކުރި "ޖަންގަލް ކްރައި"އެވެ.
