އަރަބި މީޑިއަމާއި އިނގިރޭސި މީޑިއަމަށް ކިޔަވައިދިނުމަށް ހާއްސަކޮށްގެން ހުޅުމާލޭގައި، ކުވެއިތުގެ ކުންފުންޏަކުންް އިމާރާތް ކުރާ ސްކޫލުގެ ބިންގާ މިއަދު އަޅައިފިއެވެ.
މި ސްކޫލަކީ ކުވައިތުގެ އަލްޖެރީ ހޯލްޑިންއިންސް އިން އިމާރާތްކުރާ ސްކޫލެކެވެ. ހުޅުމާލޭ ފުރަތަމަ ފިޔަވަހީގައި އިމާރާތް ކުރާ "އަޖިއަލް ބައިލިންގުއަލް ސްކޫލް" އަކީ 1،200 ކުދިންގެ ޖާގައިގެ ސްކޫލެކެވެ.
ހުޅުމާލޭގައި މިއަދު ބޭއްވި ރަސްމިއްޔާތެއްގައި ސްކޫލުގެ ބިންގާ އަޅުއްވައިދެއްވީ ނައިބް ރައީސް ފައިސަލް ނަސީމާއި އަލްޖެރީ ހޯލްޑިންސް ގްރޫޕްގެ ޗެއާމަން ތޮލާލް ހަލީފާ އަލްޖެރީގެ އިތުރުން އެޑިޔުކޭޝަން މިނިސްޓަރު ޑރ. އައިޝަތު އަލީ އެވެ.
މިރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ހުޅުމާލޭގައި އިތުރު 5 ސްކޫލެއް އެޅުމުގެ މަސައްކަތް މިހާރުވެސް އެކި މަރުހަލާތަކުގައި ކުރިޔަށްދާ ކަމަށެވެ. އޭގެ ތެރޭގައި ދެޕްރީސްކޫލުވެސް ހިމެނޭކަން އެމަނިކުފާނު ފާހަގަ ކުރެއްވިއެވެ.
މީގެއިތުރުން ކިޔަވައިދެވޭ މާޙައުލާއި ގޮތްތައް ބަދަލުކޮށް، މަތީފަންތީގެ ތަޢުލީމީ ޚިދުމަތްތަކަށް ބޭނުންވެފައިވާ މިންވަރު ދުވަހުން ދުވަހަށް އިތުރުވަމުންދާ ދިޔުމާއި އެއްވަރަށް ތަޢުލީމީ ދާއިރާ ތަރައްޤީކުރުމަށް ސަރުކާރުން ކުރަމުންދާ މަސައްކަތުގައި އަލްޖެރީހޯލްޑިންސް ގުރޫޕާއިއެކު ސަރުކާރުން ކުރާ މިމަސައްކަތަކީ ވަރަށް މުހިއްމު މަސައްކަތެއްކަމަށް ނައިބު ރައީސް ވިދާޅުވިއެވެ.
"އަޖިއަލް ބައިލިންގުއަލް ސްކޫލް" އަކީ އެންމެ ފަހުގެ ޒަމާނީ ވަސީލަތްތައް ގާއިމުކޮށްގެން ޕްރީސްކޫލުން ފެށިގެން ގްރޭޑް 12 އާއި ހަމައަށް ކިޔަވައިދޭ ގޮތަށް ހަމަޖައްސާފައިވާ އިންޓަނޭޝަނަލް ސްކޫލެކެވެ.
ހުޅުމާލޭގައި އިންޓަނޭޝަނަލް ސްކޫލެއް އިމާރާތްކޮށް ހިންގުމަށް އަލްޖެރީ ހޯލްޑިންއާ ހަވާލުކުރީ މިދިޔަ އަހަރުގެ އޮގަސްޓް މަހުއެވެ.
އަލްޖެރީ ހޯލްޑިންގެ ދަށުން އެ ސްކޫލު އިމާރާތް ކުރާނީ ރަޝީދު ކާޕެންޓްރީ އެންޑް ކޮންސްޓްރަކްޝަނުންނެވެ. އެ ކުންފުނިން އަމާޒު ހިފާފައި ވަނީ އަންނަ އަހަރުގެ އޮގަސްޓަށް ސްކޫލުގެ މަސައްކަތް ނިންމާލައި ދިރާސީ އާ އަހަރުގެ ކިޔެވުން ފެށެން ވާއިރަށް ކުދިންނަށް ފުރުސަތު ހުޅުވާލުމަށެވެ.
