މިދިއަ މަހުގައި ސެކިއުރިޓީ ވަރުގަދަ ކޮށްފައިވާ ބޮލީވުޑް އެކްޓަރު ސަލްމާން ޚާނާއި އޭނާގެ ބައްޕަ ސަލީމް ޚާނަށް މަރުގެ އިންޒާރު ދީފިއެވެ.
މިދިއަ މަހު ބަޑީގެ ހަމަލާ ދީގެން ޕަންޖާބުގެ ލަވަކިއުން ތެރިއާ ސިއްދޫ މޫސް ވާލާ މަރާލުމާއި ގުޅިގެން ސަލްމާން އޭނާގެ ސެކިއުރިޓީ ވަރުގަދަކުރިއެވެ.
ސެކިއުރިޓީ ވަރުގަދަ ކުރިތާ މަހެއް ވެސް ނުވަނީސް ކޮން ބައެއްކަން ނޭނގޭ ބަޔަކު އިންޒާރު ދިނުމާއި ގުޅިގެން މިހާރު ވަނީ ރިޕޯޓް ކޮށްފައެވެ.
މުމްބާއީ ފުލުހުން މި މައްސަލަ ތަހުގީގު ކުރަމުން އަންނަ އިރު، އަދި މިހާތަނަށް މައްސަލާގައި ކުރިއެރުމެއް ނުލިބެއެވެ. އެދެބަފައިނަށް މަރުގެ އިންޒާރު ދީފައިވަނީ ސިޓީއަކުންނެވެ. އެ ސިޓީގައި އެމީހުން މަރާލަން ރާވަމުން ދާތީ އެކަމާ ސަމާލުވުމަށް ބުނެފައި ވެއެވެ.
އެ ސިޓީ އަކީ މީގެ ކުރިން ވެސް ތަކުރާރުކޮށް ސަލްމާނަށް މަރުގެ އިންޒާރު ދީފައިވާ ލޯރެންސް ބިޝޯގީ ގޭންގްގެ ސިޓީއެކެވެ. އެ ގޭންގުން ވަނީ 2008 ވަނަ އަހަރުވެސް އިންޒާރު ދީފައެވެ.
