ރާއްޖެ ދަރަނި ވެރިކޮށްލިކަމަށް ބުނެ ދަރަނި ދަންތުރަށް ގޮވައި ހެދި މީހުންނަށް ދަރަނި ދަންތުރައަކީ ކޮބައިކަން މިހާރު ސާފުވާނެކަމަށް ރައްޔިތުންގެ މަޖިލީހުނެ ނޮޅިވަރަމް ދާއިރާމެ މެމްބަރު މެމްބަރު މުހައްމަދު ނަޝީދު (މޮސްޓާ) ވިދާޅުވެއްޖެއެވެ.

މޮސްޓާ މިހެން ވިދާޅުވީ ވޭތުވެދިޔަ ހަތަރު އަހަރުގެ ތެރޭގައި މި ސަރުކާރުން 32 ލޯނަށް 2.4 ބިލިއަން ޑޮލަރު (37 ބިލިއަން ރުފިޔާ) ނަގައިފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ދެއްކުމާއި ގުޅިގެން އެކަމަށް ފާޑުވިދާޅުވެ ކުރެއްވި ޓުވީޓެއްގައެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން އެނގޭ ގޮތުގައި 2019 ވަނަ އަހަރުން ފެށިގެން މި އަހަރުގެ މިހާތަނަށް ސަރުކާރުން އެންމެ ގިނައިން ލޯނު ނަގާފައިވަނީ އިންޑިއާގެ އެގްޒިމް ބޭންކުންނެވެ. އިންޑިއާގެ އެގްޒިމް ބޭންކުން 1.2 ބިލިއަން ޑޮލަރު (19 ބިލިއަން ރުފިޔާ) ލޯނުގެ ގޮތުގައި ނަގާފައިވެއެވެ. މީގެ ތެރޭގައި ބްރިޖްގެ މަޝްރޫއުއަށް ނެގި 400 މިލިއަން ޑޮލަރު (6.2 ބިލިއަން ރުފިޔާ) ހިމެނެއެވެ. އަދި ސަރުކާރުން ނެގި 800 މިލިއަން ޑޮލަރު (12.3 ބިލިއަން ރުފިޔާ) ގެ ކްރެޑިޓް ލައިން ފެސިލިޓީ ވެސް ހިމެނެއެވެ.

މިތަފާސް ހިސާބުތަކާއިއެކު މޮސްޓާ ކުރެއްވި ޓުވީޓުގައި ވިދާޅުވީ، ދަރަނި ދަންތުރައޭ ގޮވި މީހުންނަށް މިއަދު އަސްލު ދަންތުރަ ސާފުވާނެކަމަށެވެ. މޮސްޓާ ފާޑުވިދާޅުވެފައިވަނީ ކުރީގެ ރައީސް މުހައްމަދު ނަޝީދަށެވެ. ނަޝީދު ވަނީ އެކި ފަހަރު މަތީން ރާއްޖޭގެ ދަރަނީގެ އެންމެ ބޮޑު ދަންތުރައަކަށް ވެފައިވަނީ ޗައިނާކަމަށް ވިދާޅުވެ ޗައިނާއަށް ވާރަށް ބޮޑަށް ފާޑު ވިދާޅުވެފައެވެ.

ނަމަވެސް މިސަރުކާރުގެ ދަރަނީގެ ތަފާސް ހިސާބުތަކުން ފެންނަން އޮތް ގޮތުގައި، މިސަރުކާރުން ވަނީ އިންޑިއާގެ އެކި ބޭންކުތަކުން ގިނަ އަދަދެއްގެ ދަރަނި ނަގާފައެވެ. މޮސްޓާ ވިދާޅުވީ ވެރިކަން ބަދަލުވާއިރަށް އިންޑިޔާއިން ދިވެހި ރައްޔިތުންނަށް ބޮޑު ވެގެންވާ ނޮހޮރުއްޕާނެއް ޖައްސާނެ ކަމީ އެއްވެސް ޝައްކެތް އޮތް ކަމެއް ނޫންކަމަށެވެ.

ދަރަނި ދަންތުރައާއި ދަރަނީގެ ބަލާ މުސީބާތަކީ ކޮބައިކަން ދަރަނި ދަންތުރަ އޭ ގޮވި ބައިގަނޑަށް މިހާރު އެނގޭބާ. ވެރިކަން ބަދަލުވާއިރަށް އިންޑިޔާއިން ދިވެހި ރައްޔިތުންނަށް ބޮޑު ވެގެންވާ ނޮހޮރުއްޕާނެއް ޖައްސާނެ ކަމީ ޝައްކެއް ނެތްކަމެއް.

– މޮސްޓަރ ވިދާޅުވިއެވެ.

އެމްޑީޕީ އިސްވެ އުފެދިފައިވާ މިސަރުކާރަށް ދެއަހަރު ފުރުމާއި ގުޅިގެން އެމްޑީޕީގެ ހަރުގޭގައި 2020 ވަނަ އަހަރު ވާހަކަ ދައްކަވަމުން އެމްޑީޕީގެ ރައީސް ނަޝީދު ވިދާޅުވީ، ރައީސް ޔާމީންގެ ސަރުކާރުން ދަރަނިތައް ނަގާފައިވަނީ ދެކޮޅު ނުޖެހޭގޮތަށް އެއްވެސް ބަލައިލުމެއް ނެތިކަމަށެވެ.

ނަޝީދާއި ސިޔާސީ ގޮތުން ސަރުކާރާއި، އަދި ރައީސް ޞާލިހާއި މިހާރު ކޮންމެވެސް ވަރަކަށް ޚިޔާލް ތަފާތުވަމުންދާއިރު، ނަޝީދު މިހާރުވަނީ ދަރަނި އިންތިހާއަށް ބޮޑުކަން ގަބޫލު ކުރައްވާފައެވެ. މިދިޔަ ހަފްތާގައި މަޖިލީހުގައި ވާހަކަ ދައްކަވަމުން ނަޝީދު ވިދާޅުވީ ރާއްޖޭގައި މިހާރު ހިންގާ ބޮޑެތި މަޝްރޫޢުތައް މަޑު ޖައްސަލަން ޖެހޭކަމަށެވެ.